انتي هنا بين القصيّر وهذاه
.............. متمكنه بين الضلوع النحايف
متعمقه من دم قلبي مغذاه
.............. ولالك شبيه ٍ من جميع الطوايف

الضمير الحي والا الحي حاره
............. ماعرفنا وش مفاهيم الضماير
ان نظرنا لآخر حدود المناره
............ جاتنا من تحت سيسان العماير

الهديه ماهي حجم الهديه
......................... الهديه رجوعك واتصـــالك

حي هالصوت لو ماشفت شيه
......................... بس بشّر وطمن كيف حالك

لا تحَسْب إن بَعدك ما عليه
.......................... لكن إرتاح مــا أدوّر بدالك

لو تصير المسافه سرمديه
.......................... انت وحدك جنوبك مع شمالك

مرحبا فيك والعشره نديه
.......................... مانســيتك ولا قفـّى مجالك

ماتحريت هذيك وهذيه
.......................... ليش أدوّر وانا قلبي حلالك

رجعتك راس مالي والهديه
.......................... حي صــوتك وياحي اتصالك

http://rlv.zcache.com/mother_and_new...0z85g9_400.jpg



ياطفل حدك .. لاتجي طفة الغيم
............. هي مثلك تدوّر حظن يحتظنها

طفله ماتملك للأمومه مفاهيم
............. بدري عليها لو جبرها زمنها

في طيشها تمرح مع الريح وتهيم
............. عروسة ٍ لحن الطفوله لحنها

فــ /عيونها لفتة براءه من الريم
............. وفي قلبها حلم ٍ يحرك شجنها

ماقلت ما بالخلق مخلوق كامل
............................. لكن ابيك اتمم اللي وعدته

احيان يلزم مع بعضنـــا نجامل
............................. بس الوضوح يجملك كان عدته

لاتلوح بروق من دون وبل ولارعود
................. تمّها سحابة الوصل والا كفّها
والله ان الشوق قاسي على بعض الكبود
................. مير نار العاشق بلي بك طفّها

المشكله ماهي بروس المجانين
............. المشكله في طبلة انسان صاحي
لازم يلف يمين ويسار ويمين
............. يشعل قناديل المساء بالصباحي

اموت واعرف وش مزاجك لياغبت
........ انته تناسى العشق والا ّ تضايق
انا ليامن غبت عني تعذبت
........ اوله على وصلك ولاني برايق

بالله ابا أسألك ليش تجرّك الغيره
................... من عقلك اروح ادوّر وانتي لحالك
انا عشقتك واقول الخيره الخيره
................... اني عشقتك وانرتي ليلي الحالك

تدلعي تراي اموت بتدلعك
.............. تغنجي يام الدلع والغناجه
قولي احبك موت وأروي مولعك
...... هزي لعين اللي ضحك لك حجاجه

وصلك يجي ساعه ليا صرت راضي
........ بس البلا انك طول الايام زعلان
ياخي ترى للحب وضع افتراضي
........ ركز ولاتنسى ان مجنونك إنسان

اخاطبك كبيره بعمر طفله
................. و وأدَلّعك طفله بسن الطفوله
طاريك هاجوس الضماير وقفله
............... وزولك ليا اقبل كلهم وقفوله

مهما تألمت ياعذب اللما .. من وراك
........ تبقى مكانتك الاولى باقيه مانزلت
ابيك وازعل من غيابك وادوّر رضاك
........ وفي غيبتك جزت عن كل العرب وانعزلت

سمي .. سواليفك لها طابع ٌ غير / ما أملها لو تسردين السوالف // يصيبني نشوه على كل تعبير / واقول .. ياعمر الفنى ما يخالف .. !!

خل العصير. .. الله يصبحك بالخير / الصبح تحتاج إلك فنجان قهوه //
ترى حلاتك زائده والحلا غير / وانا عليك اشتاق .. واشعر بشهوه !!

تدللي .. ماغير صدري والاضلاع
.......... تحماك عن مضرة اللي يضرك غيرك عليّه نذر ماني بطماع
.......... وراحت خفوقي يوم اجيك بمقرك

تصدق بعد ماغبت صارت لي علوم / اسهر بليلي والعرب في فرشْها // اجلس من السجات واسج واقوم / والحال هاجوس الغلا مبتلشْها !!

أزريت احدد في هواك اتجاهي
..............اجيك طالب حق واروح مطلوب
سحرك على حله يشد انتباهي
........... وطاعتك في ضلمك تحملني ذنوب

زهمتك على سحابة الشوق يوم أقبلت
........... وحنّ الرعد وامطر من الجفن ديمومه
اشوفك شموخ ٍ في عيوني ولو ماقلت
.......... إلك جاه وإسم ٍ يفطر المجد ويصومه

مدري علامك .. تحب تردني يمك
................. اقفي وتقفي وترجع خلي الاوّل
صحيح انا احبك من احساس واللمك
................. لكن خطاياك بين العالم تهوّل

مامر ّ في عرقي ولا بح ّ صوتي
...... الا ّ غلاك .. وجملة اسمك وطاريك
فضّلت عن كثر التشرّه سكوتي
...... يمكن من الغفوه زمانك يصحيك

تعال وادخل قفص صدري وشف منزلتْك
.......... مالك بقلبي شريك ولاملكني سواك
معزتك عن جميع اللي سواك عزلتْك
..... واصبحت تروي مفاهيم الغلا من غلاك