|
|
لا ذعذع الغربي .. و هبت هبوبه ، قامت تطير من الدفاتر .. حروفك ! حتى لو ظروفك تمر بـ ( صعوبه ) ما تبرر الغيبه ، صعوبة ظروفك ! |
لو .. [ بدونك ] ، عليها من حلاوة [ معك ] ، ما عجزت .. أتبسم ! واخفي أني .. ( حزين ) |
من ضيقتي .. ودي افضفض لـ الاجناب ! ان رحت عنهم .. في دقايق .. نسوني تعبت من رتم السوالف .. لـ الاحباب ! اجامل احبابي .. ! و هم جاملوني يدرون عن حزني بلا ذكر الاسباب ! و لو يجهلون الحزن ، ما يجهلوني ! |
جابتك الاشواق .. والاشواق فوق الظروف ، و عيونك الدّعج .. بيّن في هدبها السهر ! جيتي .. و كل العيون اللي علينا تشوف ! كأنك تقولين لـ [mark=#c2b1b1] العذّال [/mark]: موتوا قهر ! :) |
لا تكشّر .. يا حبيبي ! لا تكشّر انت ، ما يصلح لك الا ! الابتسامه دام وجهك .. بـ الفرح دايم يبشّر ! الزعل منك انت .. داعي لـ الملامه :) |
، انت القراح الزلال ! و غيرك انت الضما ، شوفتك كل الفرح ! غيبتك كل الهموم ! انا حياتي سما .. وانت القمر بـ السما ، لو شفت غيرك نجوم ! أكيد تبقى نجوم ! ، |
يا الكاتب المعتوه .. كلك وقاحه ، قلة حياء / قلة حياء .. ما بها شرح ! تجهر بـ ( ذنبك ) تحت بند الصراحه ، وتقول : انا ممتاز في جرأة الطرح ! |
في غيبتك .. محتاج 1 من 2 اما الصبر والا وجودك بـ جنبي انا ( اناني ) معك ، طيب و بعدين ؟ ذنب الهوى و الحب ماهو بـ ذنبي |
ذات غياب .. لا صرت تدري ! بإني ، أتعب بدونك ، بالله قل لي .. وش تسمي غيابك ..؟ بـ غيابك المزعج .. كسبت العواذل ، وانا الوحيد .. اللي خسرت بـ غيابك و المحور [ غياب ] |
تعالي و إحسبي .. كم عرق باقي ساري المفعول ؟ بعد يبست عروقي .. ما جرى في وسطها .. دمّي ! انا و انتي تقاسمنا التعب ، واللي يقول .. يطول ، خذيتي ما خذيتي .. بس انا اللي قلت لك : سمّي ! :) |
خير و مطر و اخوك بالله ، مزكوم ! ما غير أشوف البرق .. و أصد عنّه :) |
الوصل .. ضخ الدم في كل شريان ، والبعد .. قد يجعلك عرضه لـ جلطه ! الوصل هو الـ صح في عمر خلان ، والبعد ما به ذوق و اشدّ غلطه ! :) |
أرسلت رسالة sms لـ كوكبه من شعراء الابداع بـ المرقاب وكان نصها : أكمل الفراغات في البيتين التاليه :- اليوم ثالث يوم .. ( ................ ) وانا .. ( .............................. ) أجر صوتي .. ( ..................... ) من .. ( ............................... ) وكانت الردود كـ التالي : اليوم ثالث يوم .. ( من يوم غابت ) وانا .. ( ليا غابت عن ارض الفرح غبت ) أجر صوتي .. ( بالقوافي و شبت ) من .. ( حزنها شابت وانا قبلها شبت ) ياسر العتيبي اليوم ثالث يوم .. ( والدمع ما جف ) وانا .. ( قبل مانيب اسبّل دموعي ) أجر صوتي .. ( واضرب الكف بـ الكف ) من .. ( خوف ما يتبع غيابه رجوعي ) محمد العتيبي < = أخو ياسر :) اليوم ثالث يوم .. ( ما اوحيت لك حس ) وانا .. ( على غيابك تزايد حساسي ) أجر صوتي .. ( وانت ما والله تحس ) من .. ( علمك تصير قاسي يا ناسي ) متعب الشيباني اليوم ثالث يوم .. ( يا مشغل الناس ) وانا .. ( اتحرى جيتك يا حبيبي ) أجر صوتي .. ( واضرب اخماس بـ أسداس ) من .. ( قسوة غيابك .. نصيبي نصيبي ) خالد السيحاني اليوم ثالث يوم .. ( من يوم ما اقفيت ) وانا .. ( احسب انك ما تطيقين بعدي ) أجر صوتي .. ( لين قاموا هل البيت ) من .. ( حر مافي صوتي .. اخلفت وعدي ) عبدالله حنيف اليوم ثالث يوم .. ( والوضع ما زال ) وانا .. ( انتظر رده و طوّل و ما رد ) أجر صوتي .. ( واتبع الصوت و الوال ) من .. ( هاجسٍ فالقلب عدّا عن الحد ) ناصر الروقي اليوم ثالث يوم .. ( غايب عن العين ) وانا .. ( على جمر الغرام اتقلب ) أجر صوتي .. ( وانتظر منك بعدين ) منك .. ( استلذ بها و اقوم اتثلب ) and اليوم ثالث يوم .. ( في عيد الاحباب ) وانا .. ( على باب المحبه لـ حالي ) أجر صوتي .. ( واعتلي راس مرقاب ) من .. ( نارٍ الها فالضمير اجتوالي ) محمد السواط بما انه مدير شارك مرتين :) كل الشكر لـ التفاعل الجميل يا مبدعين ولله دركم :) |
لو ينشرى .. صوتك المجنون .. بـ أيامي ، سقت العمر .. في سماع : النبره السلسه ! وشلون لو تنشرى .. جلستك .. قدامي ، ما عاد ابي من حياتي غير هـ ( الجلسه ) |
، انا جيتك تعب .. و ادور الراحه من اوجاعي ! و ما ادري عن علاقتنا صراحه ويش تفكيرك .؟ لويت أعناق خلق الله و ناوي تلوي إذراعي ، انا ما ألومك .. ألوم الظروف بـ طول تقصيرك ، |
من كثر ما أسرفت في حبك من اشعاري ، اليوم ادور شطر واحد .. ما عينته ! حبك .. وضح في قصيدي عند زواري ، وانا لو انه على كيفي .. ما بينته ! |
الصبح هذا ..مطر و غيوم واحساسي ، يعيش بـ أجمل عمر و يعطّر دروبي ! من حقي أتعب و احارب باقي نعاسي ، الغيم ماهو بـ دايم .. يلتفت صوبي ! من كثر ماني سعيد .. تسولف انفاسي ، ما ناقص الا اني اسمع صوت محبوبي ! قولوا له : ان كان ناسي ماني بـ ناسي ، لا غاب عني .. بـ عيني تكثر عيوبي ! ماني بـ قاسي معاه و لا هو بـ قاسي ، ذنوبه بـ حقي .. تصغر من ذنوبي ! |
يا هاجسي .. عد ما واجهت لي .. عده ، كم لي عن الشعر .. يا لذة طواريقه .. ! لي مده اقول : وينك ؟ وانت لك مده ، مآخذ مفاتيحي .. و قافل صناديقه ! الوقت دوار و ظروفي .. على حده ، انام ضايق صدر .. واصحى على ضيقه ! البارحه .. والهبوب .. تهب مشتده ، ما اخذت لي عن علوم الحزن .. ترويقه ! حلمي .. مع الريح ! شفته راح ما وده ، وحلمي من ابسط حقوقي فيه تحقيقه ! |
|
من منطلق واحد و عدة زوايا ، بانت تفاصيلك و شفت وتأملت ! وأخذتها من باب حسن النوايا ، وفكرت في زينك و أخيراً توصلت : ان الجميلات لـ ( جمالك ) مرايا ، هذا بصراحه ، كيف لو معك جاملت ؟ :) |
بحر الخليج .. اقرب من اخوال و اعمام ، انا و [ شاطيه الجميل ] ... نتفاهم ! أجيه و قيود الحزن .. كأنها أكمام ، ما كأن يجري في عروق الجسد دم ! أجيه بايع حزن .. لـ [ الضحك ] .. سوام ، من رجلي ليا راسي .. اشكي من الهم ! عمري مثل دفتر .. والاصحاب / الاقلام ، ما أملك لهم ، الا شكر خالص و جم ! |
، [mark=#c9c3c3]عزيزي الزائر[/mark] .. إفرح و انت تقراني ، وتقبل الشكر .. من قلبي و بـ ( لساني ) ..! إشعر بـ ( حزني ) ولا إتضّيق معي صدرك ، أحزاني .. أنا اللي أتحمل .. عنا أحزاني ! ما أجبرك تحزن معي و تحس بـ احساسي ، ما أنت بـ صديقي ولا أنت بـ ( ثاني اخواني ) زائر .. مروره ، يشرفني و يسعدني ، يقراني شوي .. بس ، شوي ينساني ! |
| جميع الأوقات بتوقيت GMT +3. الساعة الآن 01:13 AM. |
|
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.
HêĽм √ 3.1 BY: ! ωαнαм ! © 2010
شبكة المرقاب الأدبية