حلم عابر
[poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
الغلا .. توليفة اغراءات وآلام وأماني = لو تجمّع في خلايا الآدمي ,, يعشق عدوّه هالةٍ من نور ، تتخلل ورى عوج المحاني = غير ربي .. مايردّ احساسها فالكون قوّه ولو يمرّ النور في ليله ..على شخصٍ يعاني = من يلومه ! لاتدحرج شوق من قمة علوّه في ظلامه .. فاقد احياء ومصابيح ومعاني = وفاقد احساس .. الصداقه والمحبه والاخوّه واقفٍ مابين .. خفاقٍ كريم وعقل اناني = ومنتظر له جمرتين وعودتين .. تطيح جوّه خافقه ساعة محب ، ونبضته عقرب ثواني = وكل مايلمح ظلال انسان ماشي ، قال : هوّه اييييه ياحزم الغرام .. اللي جبر عظمة لساني = هذي ورقتي ، وكل اللي تبا تسويّه سوّه من بقايا الغيم وحروف الضما .. شكّل أماني = كنت اظن الغصن ينمو، وخاب ظني في نموّه حلم عابر .. خلّد الذكرى على الروح ونساني = لو خسر كينونة انسان ، وكسب شاعر مفوّه كان الاول في معاليقي .. لأنه شي ثاني = وكان الآخر في محطاتي ، لأنه كان توّه من جماله ! لو شربته كل ساعه مارواني = يحرج الريحان .. من ريحة سوالفه وحنوّه تشرق الشمس بزعل ، وتقول : من ماخذ مكاني = والقمر .. لاشاف تنغيمة ملامحه يتأوه وخانني قلبي ، وخلاني على هاك المواني = اتنازل عن مراقيب الأنا .. واعيش جوه ليه يقراني ! وكنه مايشوف وما قراني = وليه ينكرني ، وانا اللي شايفٍ ليته ولوّه علّموه ان الممات بعزّه .. اهون من هواني= والغلا ، ميّت بسكين الكرامه والمروّه وبلغوا قلبه .. وداع الشوق وشموع الاغاني = والله يسمّح دروب الحب .. ويسامح سموّه وقدّموا له .. كل تقديري وشكري وامتناني = وعلّموه انّ الغلا اللي من طرف واحد .. مشوّه [/poem] |
[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""] الشاعر .. انسان في صدره هموم = مثل البشر ، لايقلّ ولايزيد
وحيد ، ويعيش يومه كل يوم = وعايش مع الناس ، لكنّه وحيد تمطر هواجيسه حروف .. ويقوم = ينشر همومه .. على حبل القصيد عطاه ربّه .. مفاتيح العلوم = اللي يعبّر بها .. عن مايريد لاضاقت الارض ! بجناحه يحوم = ويحقن خيالاة حلمه .. فالوريد ويصنع .. حبيبه وعقدٍ من نجوم = ويرجع من الحلم .. باالعقد الفريد[/poem] |
طيحه بطوليّه
[poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""] من يسمعْك من ورى الجدران !! ياضيقي = والضيق هو هوّ ، والجدران هي هيّه
يتلعثم القلب .. ويغنّي طواريقي = واحرّك الجمر .. من هذي على ذيّه واشكّل الغيم .. من دخان تحريقي = واطيح فوق الورق .. طيحه بطوليّه احروفي امطار .. تنزف من معاليقي = والعشب كذاب ، والاحلام ورديه ياليل ! ما جا علاء الدين .. فـ ابريقي = فركت الابريق .. حتى طاحت يديه مافيه واثق .. يشكك في مواثيقي = لكنّ موت الوفا .. حاجه طبيعيه يااحلامي النايمه .. صحّيني وفيقي = وسادتي في بلاد الحزن .. منفيّه الى متى !! والشموع تجيد تفريقي = اشعل وفاها سهر ، وتذوب انانيه اسقي الضوامي ، وانا اللي ناشفٍ ريقي = والشمس وش هي ! بلا نور وبلا فيّه خاويت همّي .. بتغريبي وتشريقي = ورضيت بالهمّ .. والهمّ مارضى فيّه ونجحَت جحافل متاهاتي .. بتطويقي = حتى .. تعرّت عروقي للحراميه والليل ، لازال يستوطن مواريقي = والصبح ، مابين عصفوره وقمريّه والريح ، تضحك على جنحان تحليقي = تهبّ ، لكن جنوبيه شماليه والقلب ، كنّه ملامح جايع افريقي = لاشاف .. كيس الزباله فالسعوديه[/poem] |
الحجّام
[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
من لمس قلبي ! وفجّرني قصايد ؟ = اشهد انّه مبدع .. الله لايضرّه كان صدري ممتلي .. زحمة فرايد = وكنت .. فاقد شاعرٍ لله درّه مرحبا بي فالبلد .. حسب العوايد = اشرب .. دلال الرزايا والمسرّه شاعرٍ موهوب .. وافكاري شرايد = ومالحقني شك .. لو مثقال ذرّه ابني ابداعي .. على انقاض الجرايد = وانطح الغيمه ، واسولف للمجرّه والتجارب + الايام + = التميّز ، والشدايد ، والمضرّه غربلت صدري .. من عيال البدايد = وطاح من صدري .. ثلاث ارباع شرّه بارك الله فيك .. ياوقت الشدايد = اشكر الله ، واشكرك مليون مرّه كثر ماعندك خساير .. لك فوايد = كل ماتاخذ على المعلوق .. فرّه كنّك الحجّام .. لاحدّ الحدايد = يخرج الدم الملوّث .. من مقرّه طلّع الرديان .. من قلبٍ محايد = واتفل بوجهه ، ليا جاك يتشرّه [/poem] |
اصحاب السعادة
[poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""] كان طفل ، وبه براءات الطفوله = يعشق .. العابه وشارعه وبلاده
وكانت الضحكه .. تمرّه بالسهوله = ماملاه الوقت .. تعقيد وجلاده البياض اللي بقلبه .. كان حوله = بس في عيونه وفي شعره .. سواده وكان كل اللي يبا يقوله .. يقوله = وكان يلقى .. في شقاوته السعاده لاتمرجح .. بين حاجته وفضوله = يرمي اوجاعه .. على ظهر الوساده وكل صبح .. يشايل النفس الملوله = في حقيبته .. الأماني والإراده " سارعي للمجد والعليا " حموله = " وارفعي الخفاق الاخضر " إعتقاده مرّت ايامه .. مدارسه وفصوله = وكبرت احلامه .. بعد جاب الشهاده يابلاده ، فارسك جاب البطوله = شال عمره ، واعتلى صهوة جواده ليه يُصدم فيك !؟ ويكذّب ميوله = وليه ! ماهو قادر يشوفك بلاده وليه شرّدتيه !! يجمع في حلوله = وليه ذاق المرّ ، والسكر زياده ذا ولدك ، ان شفتي احزانه تطوله = افتحي له حضنك ، ولمّي وداده رجل .. يحتاج احتياجات الرجوله = مال ، واستقلال في بيت ، وقلاده لامتى ! نهرب على ايام الطفوله = كل مامال الزمن .. حزن ونكاده ولامتى ! ناكل تبن يااعزّ دوله = والسعاده فيك .. لاصحاب السعاده[/poem] |
فصل خامس
[poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
حبيبتي ، جاك الغرام الزاجل .. يشيل الحمام = اقري من الاسراب .. مايروي غلاك ويشبعه بكره نبا نهدم جدار الصمت .. ويطيح الكلام = والشوق يسترسل دفا .. حتى تطيح الاقنعه لاتحسبيني سالي ، وقلبي عن عيونك ينام = لاوالله الاّ ..عاشق يدوّر بعينك مصرعه في كل ليله .. يرفع يدينه ويستسقي الغمام = ويخايل البرّاق - من صوت الرعود - ويتبعه ياشيخة غيوم السما ، تناثري فيني غرام = وانا اجمعك ، حتى اجمع احساسي معك ، حتى اجمعه مجنون ماني صاحي .. ولو كنت صاحي ، ياسلام = ماكان .. لعّب خافقي عقلي على راس اصبعه كان اندفاع الشوق نحوك .. اوّل فصول الغرام = ومااكذب عليك ان قلت : ماكنت امنعه ، كنت امنعه لكن غلاك .. احتلّني بسرعه وانا جيوشي نيام = وانتي جمالك مجرم ، ونظرة عيونك مقنعه والظاهر انك حلمي اللي كنت اشوفه .. كل عام = ياكثر ماصبّيته بكاسي ، ولاكنت اجرعه تعالي نفصّل امانينا .. من خيوط الهيام = ونحاصر الشك - بمحبتنا اليقين - ونقطعه قلبي دليلي ، مايورّدني على درب الملام = اشوف قلبك ، والمس احساسه واشمّه واسمعه واقرا ذكائك ، واستراق الشعر في جنح الظلام = ومحاولة .. تشويه صورة خافقك فـ المعمعه يازين جوّك .. والفصول الاربعه ماهي تمام = لنّك فصل خامس .. لغى كل الفصول الاربعه [/poem] |
عبدالله الشلواني
[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""] ياصاحبي صوتك عظيم ، وصوت عذّالك نشاز = غنّي ، ترى صوتك تراقبه الطيور الحايمه
تشهد مقامات الصبا لك ، والبياتي والحجاز = ماانته بحاجه .. للعقول وللقلوب النايمه بيتك حديد ، ولايهمك حاسدٍ بيته قزاز = لايمكن تقوم اله مابين العوارف .. قايمه وكلمته ، لايمكن تسبب للمعاليق اهتزاز = اشرب عذوبة حنجرتك ، وخلّي اذنك صايمه ولاعد تلوم .. وجيه لقلوبٍ سوالفها افتزاز = ووجيه تُغسل بالدراهم .. ماعليها لايمه حنا نعيش بـ أزمة ابداع ، ودهاليز انحياز = ممكن تلمّع لك على الجدران .. صوره غايمه (عبدالله الشلواني) انته صوت مبدع .. بامتياز = ولو اسمك اتغيّر ، مزاياك الكثيره دايمه مبدع : وفا واخلاق واحساس ورجوله واعتزاز = ولو جيت اعدّد في مواقيفك .. تطول القايمه[/poem] |
كذبه كبيره
[poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
للسجن ، قفلٍ ضايعٍ مفتاحه = وانا ورى سجني ، وانا سجّاني والقلب ، دوبه ملتهي بجراحه = ماهو بناقص منك .. جرحٍ ثاني إخنق .. شموع اشواقك الفضّاحه = وامسح شريط الذاكره ، وانساني انا معاليقي كذا .. مرتاحه = أرسم سما ، واضحك على جنحاني والدفتر .. امن عروقي النضّاحه = يذوقني ، وانا استلذّ الواني هاجرت ، وطيور السما صدّاحه = وعوّدت لبلادي .. وانا وحداني ومن لايشارك خافقي .. فافراحه = مانيب حاجة دمعته .. فاحزاني لاتلومني ، والليل شفت اشباحه = والصبح .. فاقد وجهه الانساني والطعنه اللي فالظهر .. ذبّاحه = لأنها .. ماهيب من عدواني ولاتلومني ، والغصن والتفاحه = كذبه كبيره .. في جميع اوطاني عايش غريب ، وغربتي سوّاحه = ولا ودّي اعرف .. اسمي وعنواني والطير ، ماابغى اعلّقه بجناحه = ياما جرحت جناحه ، وعنّاني تعب يدوّر فالظلام .. الراحه = ويصدّني .. عن جوّي الروحاني وماني بلايم ..عينك اللمّاحه = لكنّ والله .. مالك فـ رمّاني لي غيمةٍ ، ورى جبال الباحه = اهلّ ماطرها .. عشان اقراني بـ اشعل هدبها ، واستفزّ السّاحه = وآخذ قصايد عينها .. فاحضاني وتفرّد الشاعر .. على مسباحه = وصح الله لسان الغلا ، ولساني وانا هنا سجني ، وذا مصباحه = واللي يدوّرني .. يبا يلقاني [/poem] |
عازف الناي
[poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""] يمكن لي اسبوع ، ولاّ حول الاسبوع = اصحابي .. الليل والدخان والشاي
مابين ترغيب شعر ، ورغبة دموع = ازريت .. اسكّت بصدري عازف الناي جمّع قطيع الهموم .. وصارت جموع = وانا لي شهور .. ماني سامع عواي لا قلت ياشعر : فضفض ، قال : ممنوع = صدر الورق .. مايكفي سيل شكواي اثر القلم عن هجوس الشعر .. مرفوع = لاصار راعيه .. لارايح ولاجاي واكثر مسائل حياته .. دون مجموع = وامعادلاته .. مابين الصفر والفاي ياليل ، لاضاق صدري شوف موضوع = ولاّ .. تعال انت لك موضوع وياي للشوق ، شجرة ضما واوراق وفروع = وجذر .. يتشرّب دموع الملح فـ اقصاي ياليل ، وش تستفيد ! ان ماتت شموع = عطني أمل .. في صباح ايامي الجاي لاتسرق الشمس ، انا ميّت من الجوع = ولا تقطع الماي ، انا محتاج للماي وخلّ لجميع اغنياتي .. صوت مسموع = لاصارت .. اذن الجفا ماتسمع غناي وفجّر عروق الغلا .. ينبوع ينبوع = فـ اللي .. غرامه تسلّل في خلاياي ان كان له قلب مثل الناس ، وظلوع = ماهو مخلّي التعب .. في وجه رجواي لو انّ حبل الرجا .. ماهوب مقطوع = لكنّ حبل الرجا طوّل ، وش الراي ! وانا لو انّي من الاشواق .. مدفوع = مااطيح فوق التراب .. الاّ لمولاي[/poem] |
يافرحة امّك
[poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""] اللي يقول انك جميله .. يذمّك = واللي يقول انّك من الناس .. مجنون
انتي بعيني الكون ، يافرحة امّك = وش لون ماتفرح ! وهي جابت الكون ضحكك صباح الخير ، والليل غمّك = ودمعك مطر هتان ، وعيونك عيون والشمس تشرق .. فيك لك منك يمّك = ووجه القمر ماخذ ملامحك ، ويمون والغيمه احساسك ، والانهار دمّك = وشلال شعرك ماي ، واطرافك غصون وانفاسك الارياح .. فيما يهمّك = يعني .. الغلا تفاح ، والكره ليمون لاضاق صدر لسانك ، وباح همّك = تنفّسي .. بالهون بالهون بالهون فمّك ، وخالٍ جاي من تحت فمّك = جمره ، تحتها عود كبريت مدفون ولا راقت اجواءك .. من احساس جمّك = تدلّعي ، وانتي الدلع فيك مضمون لكنّ .. شوفي شي على اطراف كمّك = اخاف لاتذوبين ، وابليس ملعون ولا مرّت اقدامك .. بكيفك وكمّك = على حديقة ورد من عام مسجون لا تقطفين الورد .. حتى يشمّك = الورد من دونك .. لاريحه ولا لون[/poem] |
أحسنت
[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
أنا بـ دوام الحال .. ماعمري آمنت = كل شي متغيّر .. سوى الدايم الحيّ الوقت علّمني خفاياه ، وايقنت = ان الذي في يديّ .. رايح من يديّ ومهما بلغ جهدي ، ومهما تمكنت = لاضامنٍ هذا ، ولا ضامنٍ ذيّ كم حيٍ ! سلّمته غلاي وتطمّنت = واليوم .. ماقدّر غلايه ولا حيّ ياما عطيت ، ومااذكر انّي تمننت = وياما اعتبرت اللي معي .. مني وفيّ وياما وفيت لكل وافي ، ولاخنت = لن الخيانه والنذاله .. ماهي ليّ ولو كنت اببكي كل غايب ! تجننت = لكنّ .. هذا العمر شمسٍ على فيّ الوقت خلّى قلوبنا .. طوب واسمنت = واللي بقى من باقي قلوبنا .. شويّ ياصاحبي ، ماني معلّمك وش كنت = لكنّ ابطوي صفحة عتابنا .. طيّ لاصرت انا مانيب انا ، وانت ماانت انت = عيش الحياه ، ولاتركز على شي إبدع بتعذيبي .. وانا اردّد : احسنت = واذبحني بغيبتك ، وتشوفني حيّ [/poem] |
اقتباس:
وابو علي يستاهل وعزالله صدقت في ماقلت فيه |
اقتباس:
اشكرك |
صمتك غريب
[poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
( سر ياقلم .. واكتب على بيض الاوراق ) = مطلع مكرّر ، ياكثر ماسمعناه ليه القلم ! دايم وهو يتعب الساق = وليه الورق ! مايشرب بكف يمناه قم ياورق ، شوف القلم ينزف اشواق = احفظ كرامة عينه ، وشمّ معناه افتح له احضانك .. الى حدّ الإغراق = ياماغرق في بحر عينك .. وميناه طال انتظاره .. بين راعد وبرّاق = والشوق لاعب فيه ، والبعد عنّاه إلى متى ! يستنزف الضيقه آفاق = والى متى ! واقصاه مستعمر ادناه غايب على رشفة حنينك ، ولافاق = يبني أمل ، وسكوتك يهدّ مبناه ويرسم خياله .. واقع اثنين عشاق = لا الاوّل استغنى ، ولا الثاني اغناه ومن حب ، حبّيناه والحب ميثاق = ومن عاف ، لو ماادري من يكون .. عفناه يادفتر اوراقي ، ترى خاطري ضاق = وش فايدة حبر الغلا ! ان ما شربناه صمتك غريب ، وطايحٍ بين الاعماق = وانا وقلبي نفهم ، ولافهمناه سؤال ، واقف بين قلبي والاحداق = امّا يروّح ملح ! ولاّ سكرناه صمتك ثقل ! ولاّ معاذير وفراق ؟ = لا تدفنه تحت ابتسامتك .. عطناه كانه غلا ، والثقل قافيه عملاق = انا وصبري والمعاليق .. شلناه وكانه فراق ! يعوّض الله الاشواق = ماني محقق كل شي اتمناه [/poem] |
عندليبك
[poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
ياسفينه ، علّمتك البوصله درب المرافي = والبحر غدّار ، واحساسك يعلّمك بنصيبك لاتفلّين الشراع .. ويحرمك لذّة ضفافي = اتركي حريّة التعبير للريح .. وتجيبك رغبة التفيكر بالاحساس .. ضرب امن التنافي = كنّي اقول : انتي اشراقك يعبّر عن مغيبك ياأماني ، شرّفي برّ الامان ولا تخافي = والله انّ الخوف مايستوقفك .. وانا حبيبك لاتعدّيني غريب احباب ، وعيونك منافي = عاشقك يابلادي الحلوه ، وانا ماني غريبك من بعد ( وافي وشيمه ) ، لي بعد شيمه ووافي = كيف بالله بـ اتجرّى واجرحك ! وانا طبيبك ماتركت الليل يسهر لك غلا ، والصبح غافي = لين سولف لي الهوى الثرثار .. عن طيبك وطيبك ياملامح غيمة الاحلام .. في وجه الفيافي = كيف بالله ! مااستلذ بلذة امطارك ، واغيبك وانتي البرد يتدفّى في يدك .. ويروح دافي = وانتي انفاسك .. تجي سكر بـ شاهيك وحليبك فوق صمّانك .. صحى قلبي وصحّيت القوافي = وفوق مسرح قاهرة مغليك ..غنى عندليبك كل طرقٍ طاولك ياالنايفه .. ماهوب كافي = وكل عرقٍ صار لك .. عبدالمجيد وكيف اسيبك ! وكل غيمة شعر تنثرني ، وتعلن عن جفافي = ياعساها تدوش عروقك غلا ، لو ماتصيبك [/poem] |
فرقا ونص
[poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""] ايه انا الظالم ، وانا اللي في ملامحك انظلمت = بين حبٍ مالي الدنيا ، ودنيا فانيه
للرحيل ظروف ، وانتي فاهمه وانا فهمت = لاانتي المجني على ماها ، ولاانتي الجانيه رحت احارب نفسي بنفسي لعينك ، وانهزمت = وقبل اذوق البير ، خانتني حبال السانيه لا اقدر ابرّر خطاي لقلبك ، ان قال : انصدمت = ولا اقدر .. اعبّي فراغات اليدين الحانيه ليتني يابنت عم الغيم .. مارحت وندمت = وماحرمت الارض .. من طعم الثمار الدانيه وانتي اجمل حلم حققني .. وبعده ماحلمت = كنت اظن الحزن ميّت ، والليالي هانيه مرّ عام ، وبيتك اللي فالصدر مليان صمت = والغبار .. اعلى الكراسي والأنا والآنيه والزمن واقف - على حطة يدك - يوم ابتسمت = وعقرب الساعه .. على فرقا ونص وثانيه كل مامريت جدرانك وصورتك .. انهدمت = وابني المهدوم في نفسي ، واهدّ البانيه والغواني ، كل ماضقت بفراقك وازدحمت = تطلع الاولى .. وتدخل فالعروق الثانيه ماملى غيرك مكانك .. كثر مالنت وعزمت = وكل يوم .. يطيح من صدر المحبه غانيه هذا انا واقف بقايا .. لازهمت ولا انزهمت = وساعتي فرقا ونص وثانيه .. بالثانيه[/poem] |
ليه الازعاج ؟
[poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""] أصبح الملك لله ، وبدينا الصباح = توّنا فاتحين الركن .. والله كريم
ليه الازعاج والزحمه كذا ! .. ياجراح = خير الايام واجد ، والهواجيس ديم وقّفوا كلكم طابور .. فوق الرياح = وكل جرحٍ .. بياخذ قسمته فالصميم ماذخرت القصايد .. غير للارتياح = وشاعرٍ مايعبّر عن شعوره .. غشيم كل ماطاح جرح ، يزيد صدري براح = والسنابل ، يرقّصها هبوب النسيم ياطيور السما .. رفّي جناح وجناح = وغرّديني .. شعر باقي وشاعر عظيم القوافل ، ركايبها تدوس النباح = والمراجل ، فعايلها تدوس الحريم ما نطق شهريار .. الاّ الكلام المباح = ولو ثيابي عليّ جداد ، قلبي قديم اتنقّى عباراتي .. بروس الرماح = واتنفس خيالي شعر ، واعشق واهيم واتلذّذ وانا اعبّر .. وجمّي قراح = والشعر ( ميم - ياء ) ، وهاجسي ( ياء - ميم ) وماعد يهمّني .. من جا عليّه وراح = بـ اتكرّم على نفسي ، وربي كريم[/poem] |
موعد البوح
[poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
تعال ، ولاّ اقول ياخافقي : روح = واكسر على راس الفراق .. الربابه لاحزن ، لا آهات ، لاضيق ، لاجروح = ودِّع - على صوت الغرام - الكآبه ابشّرك طاح المطر ، واغرق الروح = وذابت على نار المحبه .. سحابه هلّت خمر ، والورد مخمور ويفوح = والصدر .. شاربها جنون ورحابه والعطر فيها .. مثل الاشواق مفضوح = والشوق فيني .. عطر كلٍ درى به ياشعر ، سولفني ليا كنت مذبوح = تخونني فيها .. حروف الكتابه من وين اببداها ؟ ومن وين ابروح ؟ = وقصة هوانا .. كل ابوها غرابه نعرف بعضنا ، قبل ما ينخلق نوح = وقبل الوجيه تجيبنا .. وانتجابه مرّ اللقا صدفه .. على موعد البوح = ومرّ الرحيل .. اصوات ليل وذيابه وكنا غريبين .. ووطنا له صروح = وعيوننا تنهب بعضنا .. نهابه ورغبة مشاعرنا .. لها صوت مبحوح = والصمت .. كان يقولنا بالنيابه سبحانه .. اللي يربط الروح فالروح = ولاّ ترى الاجساد .. شبه اتّشابه لعيونها ، وعيونها درس مشروح = ليل ، ونهار ، وروح طفله ، وغابه تركت باب القلب - للريح - مفتوح = ومن عادتي .. ماافك للريح بابه لكنّ ذي ، لو تاكل القلب .. مسموح = جمال ، واحساس ، وسمو ، ومهابه [/poem] |
شطر بيت
[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""] الله يسامح موجة اليمّ ، فاليمّ = حطّت بجرحي ملح ، وانا تشافيت
بعض الكلام ، يمرّك اكبر من الهم = ويحيّرك ، وتقول : انا ويش سوّيت ! مرّيت ضامي .. يلتمس موية الجم = وياليتني مت بضماي ، وتعدّيت ياغايتي ، ياسيّد الكيف والكم = ليتك قبل تنطق كلامك .. تحرّيت والله ، مالك حرف واحد من الذم = فكره .. توضيت بمطرها وصلّيت ماهوب انا اللي ينثرك .. لجل يلتم = ياما على شان ابتسامتك ..عانيت كم قلت : لعيونك ولايهمك ، وكم = عرّضتني لاخطارك .. ولا تخلّيت انت الوحيد .. اللي الغلا يحفظك صمّ = وانا الوحيد .. اللي معك ماتسلّيت لامرّني وجهك سما ، قلت له : سَمّ = وان قال : انا بـ اضيّعك ، قلت : ياليت وان شفت خالك ، قلت : ياعمّ ياعمّ = تمنّ - لو روحي - ولك ماتمنّيت وحرفينك .. اللي ولّعت جمرة الفم = من كثر مااتخيّل دفاها .. تدفّيت قلبي طلب قلبك .. وانا قلت له : تمّ = وجيتك على بعضي مهر ، ماتعاليت وماكنت بهروج المخاليق .. مهتمّ = على كثر .. مااوحيت واوحيت واوحيت ولو ماانت قد الناس عندي ، ولااهتم = غسلت قلبي منك مرّه ، وصديت لكن خساره ، جيتني ياالعسل سمّ = هذا ، وانا ماعمري بحقك اخطيت بنيت لك في داخلي .. بيت من دم = وانته ، تحاسبني خطا في شطر بيت [/poem] |
مبارك ياسلطان
بمناسبة زواج الأخ / سلطان بن حمدان الحارثي
[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""] لي طير .. عنده فالظهر عشر جنحان = واليا نوى .. يقدر يشيل المباني له خفة الجني ، وله روح الانسان = ويقدر يلف المملكه .. في ثواني في مخلبه سبحه ، وفي فمّه لسان = ومزهّبه للصيد ,, خلف المحاني لا همهم الهاجس على .. عذب الالحان = يلبّس ثياب الحروف .. المعاني واليوم انا .. ناديت طيري على شان = يوقف على منبر مكاني .. مكاني وانا مجمّل .. مع طويليلن الايمان = والعشر معهم .. ماتعوّد ثماني لكنّ ضيق الوقت ، وظروف الازمان = تشيل قلبي .. فوق عظمة لساني والعذر .. لمحمد وساعد وسلطان = والعذر ، يرضي طيّبين المجاني اخوان ، لا قالوا لنا : وين الاخوان = واعوان ، لا قلنا لهم : ياعواني وافين معنا ، والمواقيف برهان = وامواجهم ، على جميع المواني بالطيب ، وعلوم المراجل ، والاحسان = يشهد لهم فالناس .. قاصي وداني ورثٍ من ابوهم ، وابوهم كحيلان = والجمّ ، تشهد له حبال السواني ياالله ترحم شايبٍ .. قبلهم كان = رمز الشهامه والكرم والتفاني معروف في قوّ العزيمه و الايمان = سبعٍ ، قرا لله سبع المثاني فاللازم بعير ، ومع الفزعه حصان = وكاسب على كل الجهات الرهاني فقيدةٍ ، في عالم اشكال والوان = ماهو معوّض لو يطول الزماني ولو كل حمدانٍ يعوّض .. بحمدان = جاب الزمن للناس .. حمدان ثاني ولاهانوا الفرّيس .. حرث وعتبان = كلٍ يقول : الاوّله ياحصاني هذا وصلى الله .. على أفضل انسان = عداد .. ماصلت عليه الثواني حبيت ابارك لك زواجك .. ياسلطان = والله ، يديم الك الفرح والتهاني [/poem] |
منال الشريف
[poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""] سلموا لي ..على استاذه منال الشريف = وقـولـوا الله يـزيـدك يالشريـفـه ..شـــرف
بنت روس المراجـل ، والحسـام الرهيـف = لابــــةٍ ، مــاخــذ الـتـاريــخ مـنـهــا طــــرف ماتمـثـل ، هــل الـديــن الـقـويـم الحـنـيـف = غــاويــه ، دفّــهــا شـيـطـانـهـا وانــصـــرف فـعـلـك يمـثـلـك ، ويـمـثـل اهـــل القـطـيـف = يـوم لعبـوا علـى عقـلـك كــذا ، وانـحـرف تقـنـع المسـلـمـه ..لـــو مابـيـدهـا رغـيــف = وانـتـي اســوأ مـثـال ..لمخـرجـات الـتـرف ومجتمعنا ، ماهو رجعي ولاهـو ضعيـف = مجتمـع مسلـم محافـظ ، وشـاف وعـرف ان درء المـفـاسـد ، فـالـزمــان الـمـخـيـف = قبل جلـب المصالـح ، يـوم سيلـه جـرف والـمــره ، مانعـرّضـهـا هـبــوب الـخـريــف = مـــن بـدايــة ولادتــهــا ..لـعـمــر الــخــرف جوهـره ، صانهـا الله فالحجـاب المريـف = لو تسوق ،انكشف وجه الحيـا وانعـرف وانتي آداه ..فـي كـف الضميـر الكفيـف = علـمـنـوك ، وتعلـمـتـي الــغــوى والــقــرف سوقي ، وشوّهـي الوجـه البـرئ العفيـف = وافتحي مصرع الباب ..لقضايا الشـرف [/poem] |
دانه وبحّار
[poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
نموت ، والاحباب .. دانه وبحّار = ماحولهم .. بحر وسفينه ومينا نحلم ، ونستغفل تهاويل الاقدار= واحلامنا ياوقت .. منا وفينا ياليتنا .. في وجيه الايام نختار = ماكان لارحنا ، ولاكان جينا مرّيتنا .. ياحلم وافي وغدار = وندري بـ أنك حلم .. ياابن اللذينا لكنّ ، لاسوّى الزمن حولنا جدار = نرسم عليه .. اللي نبيه ويبينا كانت فرس .. واعطيتها الصدر مضمار = وقلت : اركضي فوق الغلا واطربينا ومع كل ضربة حافر .. اتنفس اشعار = واقول : ياكف الحياه اكتبينا الوقت ، مااعطانا من الواقع ثمار = وعلى سحاب الامنيات .. التقينا الصبح ماهو فيه ، والليل محتار = يدوّره .. ولاّ يدوّر علينا كان الهوا .. يلعب بنا يمين ويسار = وعلى كثر .. كثر الحكي ماحكينا بعيوننا .. نتبادل آلاف الافكار = ويبان في نظراتنا .. مانوينا كنا نشوف الشمس ، ونشم الازهار = وننسى ، ونذكر بعضنا لانسينا اذا بدينا .. ننتهي مثل الامطار = واذا انتهينا .. كنّنا ما بدينا والشوق ساحر ، والمعاليق سمّار = ونشرب لهيب احساسنا .. ماروينا وكنّ الشموع تذوب ، وتقول : يانار = والنار طفّتها .. وجات بيدينا مايدري الاّ عقرب الساعه .. اش صار ! = وحنا .. ولو مرّت سنه مادرينا هنا انقطع حلمي ..على حبل الافكار = ياالله على الواقع .. سرينا سرينا [/poem] |
مية فُلّ
[poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
شجْرة حياه ، وفايدتك اربع .. ولا تقِلّ = طالبك وحده من ثلاث ، ووحده فداك ياالاوكسجين بداخلك ؟ ياالتوت ؟ ياالظلّ ؟ = وانا لو ابرد .. مااحطبك للنار وادفاك ياواحده ، ياست عن عشر ، ومية فُلّ = يااللي تعبت اضيع في عينك ، ولا القاك يااللي ملامحك استحاله .. مالها حلّ = من ساحل عيونك .. الى جنة شفاياك شوفي صبايا الحي ماتوا .. غيره وغلّ = من يوم صرت اسيّلك حرفين ، واقراك وانا لو اني كنت .. ابي بعض وماابي كلّ = مارحت شايل نهرك بعيني .. وانا اضماك الريح خلّتني شتات ، وعينك تطلّ = وماحاوَلت .. تجمع بقايا انسان يهواك شوفي عقارب ساعة اشواقي .. وهي تهلّ = طاحت ثوانيها تعب ، من يوم فرقاك اخاف ، لا اروى من سرابك يوم واملّ = واروح ، وابقى صورة الحايط بذكراك تغانميني .. قبل مااحرّرك وافلّ = بعدين انا اللي في وصالي .. بتحدّاك صحيح طاير في سماي العاليه .. خِلّ = لكنّ .. ماارضى اكون واحد من ضحاياك لا جيت ! اجي مرّه - فقط - لو كنت ماادلّ = وان رحت لاتقولين مابنساك .. بنساك [/poem] |
سبق/ ابيات (1) : [frame="7 50"] علمت "سبق" أن هيئة التحقيق والادعاء العام بالرياض تواصل التحقيق في قضية غسيل أموال، متهم فيها رجل أعمال وشاعر محاورة مشهوران. وتشير المعلومات إلى أن القضية عبارة عن "دعوى عامة"، وتنظرها دائرة التحقيق في قضايا المال التابعة لهيئة التحقيق والادعاء العام بالرياض، ولم تثبت حتى الآن؛ إذ تتواصل فيها التحقيقات. وتبيّن المعلومات أن التهمة مصدرها شخص، ضُبط بحوزته كمية من المخدرات ومبلغ مالي مجهول المصدر، وأفاد في التحقيقات بأن المبلغ أمانة لديه، ويخص رجل الأعمال والشاعر؛ ما تسبب في رفع قضية غسيل الأموال عليهما. .[/frame] [poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""] يسعد صباحك ياوطن ، كيف الاحوال ! = عسى النخل مليان .. عرجون عرجون ! الله يزيدك خير ، ويزيدك افضال = ويبان خيرك .. في ثلاثين مليون والله يسامح .. من غسل فيك الاموال = وانته بحاجه كلك .. لـ ما وصابون لكنّ ، لاتزعل ولاتشغل البال= ولايهمك في .. وكالة يقولون شعبك تغنّيه المواويل .. يامال = ومرتاح من فضلك ، ولاعنده ديون ( الفول بريالين ، والخبز بريال ) = ويشوف خير المملكه .. فـ التلفزون [/poem] |
سبق/ ابيات (2) : [frame="7 50"] قالت محللة سياسية متخصصة بالشؤون الدولية: إن السعودية تبتعد عن الولايات المتحدة التي باتت بالنسبة لها "دولة جبانة"، مضيفة أن السعوديين يلعبون دوراً قد يكون الأخطر في تاريخهم، مشبهة دورهم في سوريا بمن "وضع قدمه على رأس أفعى مميتة، هي النظام، دون أن يتمكن من سحقها ودون أن تتدخل أمريكا لمساعدتهم". وقالت المحللة والمراسلة المتخصصة في الشؤون الدولية بصحيفة وول ستريت جورنال، كارين إيليوت هاوس، رداً على سؤال حول حقيقة الموقف السعودي: "أظن أن السعوديين هم من قرر التخلي عنا، فبالنسبة للسعودية -باعتبارها مجتمعاً قبلياً- فالمظهر الضعيف قد يشجع الآخرين على ارتكاب أعمال عدائية.. السعوديون لا يرغبون في السير يداً بيد في منطقة الشرق الأوسط المضطربة مع أمريكا الجبانة.. هذه هي وجهة نظرهم"..... الخ .[/frame] [poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""] هذا يُسمّى بـ ( الهياط السياسي ) = اللي على وجه الحقيقه بـ وجهين والمملكه في عيني ، وفوق راسي = لكن وين تروح ! من فيتو الصين مع احترامي .. للعرب والكراسي = في نظرة امريكا ، مجرّد .. عناوين ولو كان .. ينفعنا الكلام الحماسي = ماكان راحت من يدينا .. فلسطين وين العشا ؟ هاتوا كبار التباسي = وخلوا سواليف السعه ذي .. بعدين [/poem] |
| جميع الأوقات بتوقيت GMT +3. الساعة الآن 02:01 AM. |
Powered by vBulletin® Version 3.8.6
Copyright ©2000 - 2026, Jelsoft Enterprises Ltd.
HêĽм √ 3.1 BY: ! ωαнαм ! © 2010
شبكة المرقاب الأدبية