مراسيل الغلا عبر الهوى ماتنطر العنوان توجهها المشاعر لو تعثر دونها المرسول تواقد نارها من غير لاشعله ولادخان تجاذب مغناطيسي من صفاته يجذب المجهول على سطح البحر من غير لاقارب ولاربان وعلى صحراا الهجر من غير لاحارس ولامسؤول وعلى درب الغرام احلام ماتقطع ظماا الظميان تصول بْنا الظروف وتستمر ابّطشها وتجول |
بالله شمس الغروب,اكتب لروحي رساله على خيوطك قبل ما تعلنين الغروب جول الطيور وسكون الجو يذهل جماله ويْثير عذب القصيد,الله يَغَفْر الذنوب عادي ولو كانت حْروف الغلا في عُجاله بين المواليف رمز يْجيب مافي القلوب لهفة غلانا بسمانا نجمٍ تمَيّز لْحاله والشوق لو مر عـ القطب الشمالي يذوب مناي,نسمة هواي,اقصَى جهودي وصاله لو قصّر الحظ عن بلسم حياتي مـ اتوب وان طاب حظي وسوّىَ الوقت فيني جماله والا بصيص الامل شمعه تضيء الدروب! |
ياميّت القلب يوم العيد ماجاتك؟ رسايلي عـ الهواا والحَدْس جايبها وش غيّرك ياعديم الحس في ذاتك قللي برود المشاعر وش سبايبها ماذكّرك صبح يوم العيد مافاتك من ماضِ الايام مدري من عجايبها راتع وماتع ومستمتع بسفراتك والروح ياسرع ماتقفي ركايبها لو جبت لي نشرةٍ عن جدول اوقاتك مـ اروَى ضمَى النفس كثر اعذار غايبها تصوير,تبرير,واشواق وتحياتك ماتغني العين عن شوفة حبايبها |
يافزعة القاف وينك خاطري ضايق وبعض السوالف تزيد الضيقه زياده والجو لاعج لامزعج ولارايق رطوبةٍ فوق فووق الوصف والعاده صارت لنا عن هوى كورنيشنا عايق لاضببت يرحم الله حالة عباده تزيد من ضيقة الولهان والتايق للي يريده ولاجت له على مْراده دنياه غاية مناه وشوقه الشايق عيّى يجي مايبي والصبر مافاده |
أبي دلةٍ تجلا العماس ويطيب الراس على فوحها لاكثروا هيلها فيها كذا لازم السهره وطبع العرب والناس وكلٍ على ذوقه وكيفه يسويها فيها زعفران بنكهةٍ تنعش الانفاس بلون الذهب مع زنجبيلٍ مزكيها وفي دلة الرسلان تلمع مثل لـَـ الاماس ومـ لذ من غالي وحالي حواليها والا مْن القصيد العذب والرايق الحساس تطيب القوافي لو تشفّر معانيها جذور الهوى ياكم لها يـ الغلا يباس ترقّب سحاب الوسم ياعل يسقيها جفى الوقت وظْروف القهر والسهر والياس عوامل قويه تَهْدم جْسور نبنيها لاهبت عواصفها لو انك قوي الباس تكدر مزاجك لو تحاول تعديها |
السلام عليكم ورحمة الله واسعد الله اوقاتكم ودام تواجدكم واتمنى الجميع بخير'،، |
ياليتني أطلع على قمة طْويق واجر موالي واغني لْحالي ماحولي الا الشامخات الشواهيق اللي صداها مع صدا الصوت عالي لي مع جديد القاف عهْد ومواثيق شعر ومشاعر وان بغيته تسالي معناي مابين الضلوع المغاليق من ماضياتٍ مالها اوّل وتالي هي هكذا الدنيا حْظوظ وتوافيق وكلٍ على ليلاه والعمر بالي ياطير ياللي تاخذ الجو تحليق عطني جناحينك وانا اعطيك شالي واصير طير وكل ماحافني ضيق أفرد جناحي وارتفع فـ العلالي |
| جميع الأوقات بتوقيت GMT +3. الساعة الآن 09:52 PM. |
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.
HêĽм √ 3.1 BY: ! ωαнαм ! © 2010
شبكة المرقاب الأدبية