تـلفـــّـاته !
[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
آحب شعر النبط وآحب حبكاته = والواجب يديرني والهاجس آديره ماني مكوسر لحن يشرح معاناته = مع سميره وبنت النور ومنيره لكنـّي الشاعر اللي بعد نظراته = خلاّه يمسك عصاه ويشعب بعيره والشعر ميدان مانعرف نهاياته = والبكره مضمـّره والناقه بـْحيره ! والشاعر أن كان ماتنشدّ لأبياته = ماأبرك من إصغاك له ياكود تصطيره حتى يبطـّل من ممـارس حراكاته = اللي تجي بس في ساعات تصويره ضماته تضم فتحاته وكسراته = ويضم في راسه الزحف بحذافيره تاجر عقارات مدري وش عقاراته = وراعي عقاقير مدري وش عقاقيره لكن تمشيّـه في دربه علاقاته = وبـرّاد شاهي وسط وإثنين تعميره عموما إش لي بحسناته وسياته = خلق من الخلق عند الله تدبيره يالله لي بمن تعقدني مزاجاته = أصبر وأصابر ولاعدوى ولا طيره ياويش مصباحه وياويش مشكاته = بلشت به بين تهليله وتكبيره تكفون ياللي عرفتو وش طموحاته = خذو من أرباحه وغطّو مخاسيره وأنا أتركو لي حقايقه وخيالاته = مابين حسن السلوك وطيبة السيره أسوق رمزيته وآذوق سكـراته = وآعرف حلمه وعندي كلّ تفسيره وآسك له عملته وآفك شفراته = وأقعد وكنـّي وصلت لمنطقة حيـره متحريً صامل الموضوع وإثباته = من ناصر الأحمري والاّ جماهيره في داخل الشخص شخص عدّ زلاته = وإليا أعتذر منه مايقبل معاذيره حدّه على أقصاه وأستهلك مهاراته = وأهلك مجاهيمه وضيّع مغاتيره وأشـْغـلْه عن واجباته وإلتزاماته = حتى تساوت معه ضحكه وتكشيره عزّي لحالي من الشاعر ومسكاته = ياصعب توريده وياصعب تصديره حاولت ألده وأحده عن هواياته = لكنـي أزريت فيه وفي تفاكيره مع أني أستمتع بساخن نقاشاته = إليا حبكها بتمويهه وتمريره ! أحيان ياصُعب تحديد إتجاهاته = بأقصر مشاويره وبأطول مشاويره وأحيان واضح وتاضح كل غاياته = لكن ليا أدلى برايه صعب تغييره ياروس شيكاته وياكـْعوب شيكـاته = قومي على السوق وإغتالي هواميره إي والله الحلّ مع هذا مخاواته = بعد الله المستعان ويالله الخيره يافوق فوق ونجاحاتي نجاحاته = والاّ أسفل أسفل ومن حفره لدحديره والعاقل اللي ليا منــّه جلد ذاته = مابرّر الذنب لو للذنب تبريره خلاص راحت سوالف ودّه وهاته = وراحت مع دربها: خيره وتاخيره العمر مرّه بزيناته وشيناته = والراس وجبه وباقي الجسم تصبيره! لذا كلام الصمايل جات حـزاته = وأنا كلام الصمايل مامعي غيره أبشر بوقفات من تعجبك وقفاته = رمحه رديني وخيله دايم مغيره يقطع لك الدرب مايقطع إشاراته = في داخل الديره وفي خارج الديره ويذكـّر الناسي اللي بعض شطحاته = بأسبابها حلّ تأديبه وتذكـيره يا ناقد الشاعر إستورد عباراته = الآوله عانـها وتجيك الآخيره علومك مصلـّحه والناس شمـّاته = وباب الحسد ينفتح من طاقة الغيره! وجحا بسمار واحد رزّ راياته = وشلون لو هي كثيراتً مساميره كم واحدً يشبهه بحكاه وسكاته = ماله فواتير وتسدّد فواتيره من دون مسمار تشغلنا حكاياته = وأصبح من أعيان ذا الوقت ومشاهيره وختام صولاته ومنتوج جولاته = خشم الريال أنفرك في جبهة الليره! منـّا نهاياته ومنــّا بداياته = راعي مزامير ينفخ في مزاميره ودواير النقد داخل مستطيلاته = تدوردوّيرةً من فوق دوّيره من فوقها النجم يسبح في مداراته = ومن تحتها جرهديً مافيه نوّيره والشعر جا بين نقـده وإنتقاداته = من شبّ نيرانه وولّع دوافيره ناقد ونَـقــّاد كلٍ حسب قدراته = تقبل مقابيله وتلحـق مدابيره لاذا ولاذا تزعّـلني كتاباته = ولاذا ولاذا بأسوقه قبل تحذيره ماهي بلفتة نظـر لكن تلفــّاته = من باب ما للذهيب الاّ مداويره وأبو الريالات تدبل له ريالاته = وأبو الدنانير تدبل له دنانيره والناقد الخارجي يلــغي حجوزاته = سـوالفه كلها لفــّه وتدويره حي السفارات قفــّلنا سفاراته = بالقفل أبو تاج والجيش وطوابيره والناقد الداخلي لو لـه تفـلاّتـه = جاله على دولي الرحلات تأشيره لكن على الله روحاته وجيـّاته = واللي تعسّر على الرحمن تيسيره الله أكبر: وهيجي يامحيطاته = والحمد لله : وإرسي يابوابيره ! كفـّى ووفــّى وبلــّغكم تحياتـه = تقبــّلوها مع شكـره وتقديره ![/poem] |
1 والله 1
:) |
اقتباس:
الله اكبر يا هـ المبدع اشهد بالله ان هـ النص فيه من الفوائد الشي الكثر سبك / حبك / امتاع / تميز ولا هو غريب عليك يا ابو يحيي صح لساانك ملالالاين ولا هنت ايو الله تقديري . |
مرحبا يا بو يحيى
والله العظيم ان ما في الكلام فود قصيده اكبر من التعليق من بدايتها الى شكرك وتقديرك صح لسانك مدد واعجابي ومحبتي |
يالله عليك
عزالله اني قريت قصيده وكل بيت يدهشني اكثر من سابقه اذهلتني دمت بألف خير |
الله أكبـر: وهيـجـي يامحيطـاتـه
والحمـد لله : وإرسـي يابوابيـره ! كفّـى ووفّـى وبلّغـكـم تحيـاتـه تقبّلوهـا مـع شكـره وتقـديـره ! ناصر لا هنت .. شاعرية لا تضاهى .. صح لسانك تحياتي .. |
لا و الله يحتاج لي قراءه ثانيه قسم بالله
جايكم بعد ما اروح آخذ زقاره بعد هالوجبه الشعريه و راجع هذي ما يبي له قرايه مره واحده و روحه بلا رجعه.. هذي يبي لها جلسه صح و تصريف الحساوي اللي جنبي عشان آخذ راحتي.. :) دقايق |
مجنوووون شعر
لله درك يابويحيى |
الله
الله الله الله اقسم بالله حبك وسبك وجزاله وشعر بكل ماتعنيه الكلمه لله درّك وصح السانك مدد ،، |
55
خمسه و خميسه في وجه الحسود ما شاء الله تبارك الرحمن يا ابو يحيى اشهد بالله انك جبت قصيده اقدر اشبهها بأنها جيش مغولي زاحف اجلى من على دربه و هدم ما وصل اليه و تجاوز الى منارات النصر صح لسانك و صح بيانك و صح شعرك و يا وجه الله الجليل تحياتي اللوجستيه لهذا الجيش المغولي و لقائده الناصر ابن يحيى المغولي :) |
ناصر الأحمري
صح لسانك ابدعت وامتعت والتفاته في محلها غيمار |
سبحان ملهمك
:) |
كبير بو يحيى
شاااااااااااااااااااااااااااعر علم وكلام من عقل صاااااااااااااااااااحي ابو يحيى كبير |
زادك الله من فضله ,
ماشاء الله تبارك الله والله اكبر :) |
ناصر
لا هنت .. شاعرية لا تضاهى .. صح لسانك تحياتي |
والشاعر أن كـان ماتنشـدّ لأبياتـه
ماأبرك من إصغاك له ياكود تصطيره حتى يبطّل مـن ممـارس حراكاتـه اللي تجي بس في ساعات تصويـره ضماتـه تضـم فتحاتـه وكسراتـه ويضم في راسه الزحـف بحذافيـره تاجر عقارات مـدري وش عقاراتـه وراعي عقاقير مدري وش عقاقيـره لكـن تمشيّـه فـي دربـه علاقاتـه وبرّاد شاهي وسط وإثنيـن تعميـره عموما إش لـي بحسناتـه وسياتـه خلق مـن الخلـق عنـد الله تدبيـره :) حاولت ألده وأحـده عـن هواياتـه لكني أزريـت فيـه وفـي تفاكيـره لا والله لاتلده ولاتحده يابو يحيى الا خله على هواه ,, إي والله الحلّ مـع هـذا مخاواتـه بعـد الله المستعـان ويالله الخـيـره يافـوق فـوق ونجاحاتـي نجاحاتـه والاّ أسفل أسفل ومن حفره لدحديره لا بالله الا فوق فوق فوق ياقيصر يا(قيصر الشعر) ياقائد لواءاته *** لله درك على دُرتك الآخيره ابو يحيى عز الله ماانت في حاجه شهادات واشادات لكن والله انك رقم صعب فالشعر صح لسانك ولاعدمناك ولا عدمنا ابداعك تحياتي لك .. |
الغالي ناصر الاحمري
قصيده اكبر من التعليق صح لسانك وزادك الله من فضله اخوك |
، ماشاء الله ،لاحول ولاقوة إلا بالله
الله لايضرك حول الـ 60 بيت كل بيت عن قصيده الله لايضرك ابداع وجزاله ، ورمزيه وحرفنه مالها مثيل المبدع الكبير ناصر الاحمري اقسم بالله انك بحر |
لله درك .!
|
ناصر الأحمري :_
كفيت ووفيت ,, ماشاء الله تبارك الرحمن .. ملحمة شعرية طاغية .. . لاجديد .. سوى الروعة والابداع .. وجنون شعري طاغي .. وإجرام رمزي بـ .. فن .. وحرفية عالية في الحبك والسبك .. لله درك لله درك لله درك لله درك ,, |
:
ياسلام ياسلام الكلام والتعبير يقصر من دونها يابو يحيى .! عزالله انه ابداع وتميز وتفرد غير غير صح الله لسانك ولافض فاك |
الله الله
الله الله الله الله الله الله يا حلو بدعك يا بويحيى ويا قوّ بيتك ماشاء الله عليك صح لسانك عدد حروفها ،، .. |
بسم الله الرحمن الرحيم
يا خوي انت تعفسنا و تدخلنا في متاهات آمنت باللي وهبك الله لا يضرك و يبارك لك |
انصر . اسم اقترن الابداااع
صح لسانك تقديري |
ناصر الأحمري
صح السانك مبدع وحضورك دائما رائع كل الود والتقدير .. |
| جميع الأوقات بتوقيت GMT +3. الساعة الآن 07:53 PM. |
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.
HêĽм √ 3.1 BY: ! ωαнαм ! © 2010
شبكة المرقاب الأدبية