منتديات المرقاب الأدبية - المسعودي والعصيمي قبل 25 عاماً

هذه محاورة جمعت فقيد المحاورة عبدالله المسعودي الهذلي يرحمه الله والشاعر العلم مستور العصيمي أمد الله في عمره وكانت هذه المحاورة قبل نحو 25 عاماً في مكة المكرمة والتي بدأها المسعودي مرحباً :

مرحبا عداد نوضة برقها وألا رعدها

يشرب الشعب البعيد ويشرب الشعب القريبي

عادة التجار تشري كل سلعة من بلدها

وإن خسرنا وإن كسبنا لارجاي ولا نصيبي

العصيمي:

البقا ياعزوة توعد وتافي في وعدها

وش حصل من مشكلة ماعندنا شي غريبي

وإن نسينا الأوله والثانيه واللي بعدها

مانسينا الرابعة ياراع الرأي الصليبي

المسعودي :
السوالف يا عميل الخير ما يحصى عددها

والدفاتر ماتضيّع شي وأفهم يا صحيبي

المطية ما تقدم رجلها قدام يدها

لو راعيها يخليها عشا حصني وذيبي

العصيمي :

خابر الديرة حيا واليوم مدري وش حصدها

والمريض من العلاج يطيب ماأدري مايطيبي

والمطية رأسها وديوسها في فم ولدها

مير ياذيب الخلا بعواك لا تقنب قنيبي

المسعودي :

ما عليه اللي ليا منه بغى الحاجه وجدها

أحسن من الشجره اللي لا صبوح ولا حليبي

كانت العذرا تهوش وترفع البيرق بيدها

والعشيه هلت العبره وقالت يا حبيبي

العصيمي :

ما لمحت ألا الجنازه يوم طبت في لحدها

مير قلي موتها مدري رضى وألا غصيبي

روح أبو زيد الهلالي من نشدها من نشدها

غير في وقت المحاسب والله لخلقه حسيبي
ا

لمسعودي :

يا هل النبوت ما يبني البيوت ألا عمدها

إحسب إني موت وأرواح العرب في وسط جيبي

ليت للسلعه مقدّر ما يقلل من جهدها

لو يقولون أربعه هذلان وإثنعشر عتيبي

العصيمي :

كان طولت البيوت وبنيها أولى من هددها

لا يضيع العلم ما بين المنادي والمجيبي

ثابته ومثبته بشهودها وأقرا سندها

كان مايسترك ثوبك لا تلبس من ثويبي

المسعودي :

الصحيحه كل ماجاها الخطر تسعى جهدها

والضعيفه هينه لو تأكل التمر الربيبي

أحبتي المحاورة طويلة ولكن لم نفز من ذاكرة ناقلها سوى بالآنف ذكراً تقبلوا تحياتي وقريباً سأضع بين أيديكم أقوى المحاورات التي جمعت الفقيد بكلاً من مطلق الثبيتي يرحمه الله وصياف الحربي شافاه الله