محمد العسكر
اتت صارخة .. هكذا .. اتت
..
هي المشاعر هكذا .. عندما تحتضر!!
تاتي .. صارخة .. !!
.
.
.
.
.
جتك المشاعر تسوق الكره محتده
ـــ تشرح لك الوضع ليتك تفهمه ليتك

مابيه وقت ٍ معاك الله .. لايرده
ـــ عقب المحبة تراي بجد .. وطيتك

دامي خسرتك ترى الصده هي الصدة
ـــ في دار الاموات عن دنياي عديتك !!

رح دوّر اللي عطاك الشوق وتوده !!
ـــ كان الخطا من خفوقي يوم حبيتك !!

الحب غلطه معك ( يلعن ) ابو ( جده )
ـــ لا عاش راسي تشوف ان كان مبكيتك

اعطيتك اللي تعجز الناس عن عده
ـــ مافيه شي ٍ ( طلبته ) ثم رديتك ..!!

لقيت دربك به الحسرات ممتده
ـــ ظلمت نفسي خسارة كيف عليتك !!

سليت سيفك بوجهي حيل وتحده
ـــ ماكني اللي نزفت الجرح واغليتك

العالم اللي دخلته مانتب ( بقده )
ـــ نسيت عمري وراك ولا تناسيتك

ابشر بقسوة تبد الحيل .. وتهده
ـــ ومع كل هذا .. ترى ماظني اوفيتك

ذكراك تبقى بوسط الجوف مسودة
ـــ لو الليالي تعرفك زين .. ما جيتك

خلاص كرهي تجاهك واصل ٍ حده
ـــ من نفس كاسك عطيتك كاس واسقيتك

مابيك وقت ( الرخا ) ولا بيك ( بالشدة )
ـــ مليت منها ( حيـاتك ) دام خليتك !!

انهيت حبك وباب ( الهم ) باسده
ـــ ماعاد قلبي مثل ما كان هو ( بيتك )

بعض المشاعر تموت ولا لها ( رده )
ـــ بالضبط مثلي نسفت الحب وانهيتك
.
.
.
واعذب الود
لقلوبكم النابضه
به / محمد العسكر