منتديات المرقاب الأدبية - المرحـوم الشـيخ: سعـد بن جـليـد ال قروف الهـاجري

قصيدة حكم ونصائح للشيخ سعد ال قروف

•°•
•°•
•°•

يالله ياعـالم خفى كـل الاسـرار
يـاداير الأفـلاك يومـه وليــله
افرج لمن جابه هواجيس وأفـكار
وليـله مضـى مايرقد ألا قليــله
من شوفتي دنيا كما لـعبة قمـار
وقـت تساوى فيه عـدله وميـله
يالله بلـيل بأمـر ربي له أنـوار
برقه عـروض في قـنيفه نخيـله
يـكم نجـد دار وافـين الاشبـار
ويخص ديرتـنا حـقوق فضيـله
علمه يسر القـلب لاجات الأخبـار
ويصبح غديره نـاقع غب سيـله
ويزوف عشب الوسم وتقوم الأشجار
وكـل على طـاريه قدا رحيـله
وترجع مراتع خد حسكات الأوبـار
وديـار ربعي كاسبـين النفيـله
هواجـر من عصر نوح لهم كـار
لاجا اللقا نروي السيوف الصقيله
هـذي طبـايعنا وكل لـه شعـار
وعـاداتنا نـثني نـهار الذبيـله
وافـعالنا تعجبك لاجـات الانـذار
لا قـابلت ضو المعـادي فتيـله
ظفران لاركـبوا على قب الأمـهار
وخـيالنا بالهوش ينـطح قبيـله
وعـدونا نسقيه من كـاس الأمـرار
ويموت من عوقه وكبده عليـله
وصليحنا يامـن وخـير على الجـار
ونـزبن المجرم وحمله نشيـله
مـثل ابن شبعـان وجـدنا له اذكـار
ماراح ذكره في السنين الطويله
فيـاض أنا باوصيك في شبـة النـار
واتعب على العليا بكل الوسيـله
اللي يبي الطالات يصبر على الحـار
ترى المـراجل ماتهيا بحيـله
وخـلك على ربـعك حليم وصـبار
ترى ابن عمك ماتعين مثيـله
وكثر من الترحـيب لاجاو خطـار
ترى كريـم النفس ربي كفيـله
من لا استشارك لاتخصه بالاشوار
امش بطريقك واتركه في سبيله
ولاتسمع قول عمسين الانظار
قـول بلا فعـل قليل حصيـله
لاتـجهل بدنـياك والوقـت بـوار
كم من خليل فرقه من خليله
لحذار ماتمنعك من سوء الاقدار
ماكتب لك بيجيك والا تجيـله
واليا تـبين لك خصـيم بالاسـرار
فالطم اسبال اللي يعمدك بعيـله
بعض الحكى كنه على الكبد مسمار
لاجـا من اللي مايثمن لقيـله
من طاح داسوه الرجاجـيل ماثـار
لاطاح ماشـالوه ياعـزتي له
وان جيت في المجلس فللصمت مقدار
حتاك تبخص عاقله من هبيـله
ولا تسمع قول من شـفت هـذار
كثر الحكي مايرث الا الفشيله
أنـا لاشيـبت ماهـوب لي عـار
الشيب حق وكل وطر وجيـله
أنا سـعد لامن ردي العـزم حار
يـفرح بي اللي باير به عميله
دمـاح زلـة لابتي لو هي كـبار
واللي عليـهم معتدي نلتقي له
ورفيقنا لاحط بالسجن باوسار
اقطع عليه الخط ويطيب ليـله
وان جاو أهل هجن من البدو ظمار
غب النكايف حاديتهن هزيـله
اجري لـهن بالبن مانيـب زمـار
لامن غلى سـوق الهرافى وحيله
ودلال رسـلان بـها بن وبـهار
ونجر لامن حرك تزايد عويله
خذيت لي في مقبل العمر مشوار
صـعب على راعي اليمـين البـخيله
هبيـت فيها يوم ولم السـعد دار
وخليت طراد السراب بصميله
وتعبت أنا للمرجله سر وجهـار
وحصلت مـنها مايسر القبيـله
أغنيتهم عن حـاجة عند حقـار
يوم الردي كسبه علوم الرذيله
حنا حـرار وكل دار لـها دار
ماحن مـن يرضى ونفسـه ذليله
آلاد قرف اللي لهم فعل واذكار
وعلومـهم عند القبايل جميـله
الفين رجال من كبار وصـغار
لاراح رجـال بـيظهر بديـله
مراكز وأفعال وعزوم وأنظـار
ودرب العلا يرجع لمن يرتكيله
ذا قول منهو لابغى اللعب يختار
أحب زين القـول وأخذ دليـله
مثايل يطرب لـها كل بيـطار
اترك هزيل الهرج واخذ جزيله
وصلاة ربي عد همال الأمطار
على النبي محـمد بالفـضيـله

•°•
•°•
•°•