مع العملاق فيصل الرياحي
 

هذه المحاوره جرت في مدينة الرياض الصيف الماضي عسى ما نقدم الا ما يرضيكم 0
سعيد الفهري=
هلامرحبا ما يسجدون المخاليق = لرب خلق خلقه من اجل العباده
يقولون طاروق يكفّي طواريق = ليا حصّل الطاروق شربه وزاده

فيصل الرياحي =
يدوم البقا يالطيبين المطاليق=مقابل هل الناموس طيب وسعاده
ولا يا سعيد اببتدي معك تحقيق = وتحقيقنا ما فيه عيب ونقاده

سعيد الفهري =
يا كبر الرياحي عندنا كنه طويق = ولكن حظه فيه بعض القراده
ترانا على هرج الجزاله مشافيق= وفنجال بن وطيب والطيب عاده

فيصل الرياحي =
حياتي وحظي وجه ابيض وتوفيق = وحظ البقوم اكبر وحظي زياده
ولا يا سعيد من السعه رحت للضيق = ولا اقول عينك مثل عين الجراده

سعيد الفهري =
اخاف الدهر يهزع رفاع المعاليق = وتضرا على الجلسه ونوم الوساده
يقولون بعض الهرج يحتاج تدقيق =ويحتاج لاصحاب الفكر والشهاده

فيصل الرياحي =
مواقف هل التاريخ تحتاج توثيق = ولا انته بقايد تشترك فالقياده
على نارنا الحمرا تفوح الاباريق = حطبها سمر ماهو برمث وعراده

سعيد الفهري =
لك الله رقينا فالجبال الشواهيق = واخذنا من التاريخ نص الرياده
لو ان ديننا طبق على النفس تطبيق = تشوف اكثر العربان مسرج جواده

فيصل الرياحي =
تعملقت يا عملاق بين العماليق = وسموّك سيد تستحق السياده
ابا اصب لك دله معا فكة الريق = بعد ما سمعت اجابتك والافاده

سعيد الفهري =

تعملقت من شان العيون الغواريق = ولاجل اليتيم اللي حديث الولاده
ترا الرابح اللي ما يشاور مطافيق = ويذخر بني عمّه وكل اقتصاده

فيصل الرياحي =
وش اللي ورا حدب الضلوع المغاليق = بعد ربطة العجرود فوق العضاده
لو المرجله توخذ بمزح وتعاليق = تقلد بها الفاضي وصارت قلاده

ياسلام عليكم ..

محاوره قمه يالفهري :)

لكن أبا أنشدك ياخوي عن كلمه مدري حرف دائم يرددونه شعار المحاوره ،

اللي هو : ( ألا )
ألا ياسعيد ، و ألا يالعازمي ، وألا ياحددانا .... إلخ
وش معناها ؟


مع اطيب تحيه ليك :)

..

يا سلام


محاوره جميله ورائعه


صح لسانك وصح لسان الرياحي


لك كل الود


:)

صح لسان الشاعرين

صح لسانك وصح لسان الرياحي

لك كل الشكر

ودّي وتقديري

صح لسانك ياسعيد ولسان الرياحي

وبالنسبة لسؤال أبوعتيق عن ألا :

فهذه كلمة لاتختص بشعر المحاورة بل توجد أيضاً في النظم سواء نبطي أو فصيح

كقول امريء القيس : ألا أيها الليل الطويل ألا انجلِ...بصبحٍ وما الإصباح منك بأمثلِ

وهي : حرف تنبيه مبني على السكون لامحل له من الإعراب .