وش رأيكم في ذا البحر يالربع ؟!!
 

السلام عليكم ورحمة الله وبركاته :

أولاً ما أدري هل هذا القسم المناسب لطرح الموضوع أولا :)

السالفة ومافيها أن أحد الشعراء طرح هذه الموضوع في أحد المنتديات

ويطلب الرأي والمشورة , وأنا لي رأي خاص بهذا الموضوع سأبينه لاحقاً , ولكن حبيت

أستنير برأي شعراء هذا الموقع الذين يعتبرون من كبار ورموز الشعر في العصر الحالي .


يقول أخونا الفاضل في مقدمته وقصيدته :



اتمنى من الشعراء التدقيق في الطرق، انا والله رجال طلعت معي الابيات
وكملت عليها قصيدة طويلة ،ووزنها ما سبق ومر علي ،، لذلك حبيت اخذ
رايكم وماخاب من شاور


رايكم يهمني واتمنى الابتعاد عن المجاملة


اللي يهتمون بالتفعيلة فتفعيلتها كالتالي :


(( مفْعولن مفاعلْتن مفاعلْتن مفْعولن )) في الشطر والعجز


استلموا لاهنتوا





يالديجور يالديجـور خبرنـي عـن خلـي
قصر الحيل عن ذا الليل طقي له ياكفوفـي
مابه خو ولابه ضو ومن لي من لي من لي
مهنا الا انت طلت وشنت تاعدني ماتوفـي
من ملفـاك ليـا ملقـاك لاحيـاك وولـي
فكر دار فـي دوار حافـه همـه حوفـي
سم الحال في هالجال يانفسـي بـه علـي
علي عل لين اثمل كـوده يركـد جوفـي
شفي شف ولابه هـف بلاحسيـن الدلـي
قلت الدرب وخلك ذرب ولاطابت لي نوفي
ذي دنياي خلفة راي حكـم غريـر ولـي
فيها حق ماله حق وانتي حكمـك شوفـي

والله يابو فهد ماادري وش اقول

لكن البحر هذا غريب واول مره القى قصيده عليه

واترك الرأي للاخوان اللي اعرف وابخص مني ..,

..

ارحب ياياسر وارحب يافالح

وأنا تراني مثلكم أول مرة يمر علي :)

ورأيي اللي راح أقوله فيه مجرد اجتهاد شخصي وحتى في نهايته لم أصل لنتيجة حتمية تؤكد
هل هو بحر أم شيء آخر :) وسأبين ذلك لاحقاً

ولكن أبي أعرف وأتأكد هل سبق لأحد الشعراء المعتبرين أن كتب عليه ؟

وأنتم تعرفون المرقابيين ماخلوا بحر ماغاصوه وبنلقى عندهم العلم الوكاد إن شاء الله

:

مرحبـابك

لو كنـت شااعر لاجاوبت .. لاكن حبيت أسجل مروري ومتابعتي للفايـدة

الله يتوفقـك

هذا بحـر شامي !



ابوفهد ..

تشوف الاخوان أعلاه ،
هاحطني معهم كمالة الرصه !


مازد شفته ولازد شفت تفعيلته بعـــد :(

عنمّا محل الماضوع يورّالي انه في الأدب والثغافه !

سلام’ عليكم

والله ياخوان


انا كنت في السودان قبل مده وحضرت زواج احدى القبائل هناك

وحصلتهم يلعبون هذا الطرق اومشابه له


منها

تقريبن

طلعت شمس وغابت شمس قولوللعمي قولوله

وسلامتكم

انا يا الربع عرفت أغنيه :)
و لكن وقفاته واجد ما هي بشوي و فيه جره في آخر ثلاث كلمات
( يا الديجور .. يا الديجور .. )هذي الوقفه توقّف على الأول و توقف على الثاني
( خبرني عن خلي ) و هذي فيها جره كلها على بعض

أما سالفة هل فيه أحد غنّى عليه .؟؟ و الله مدري :)
---> ها وش جايبك :(

هاذي على ما اعتقد لحون شاميه
ويقال الها على ما أظن (( نقازيه أو نقازيات )) ، وسهلة الغناء ، ولاتحتااج إلى تكليف
بل سمعتها من واحد يجرّ عليها الربابه ..


والله اعلم ،،،

العالم مليان بحور

وانا اظن شخصيا إن كل شاعر يقدر يطرق طرق جديد وغير معهود ،،، بس يخاف من النقاده اللي على غير سنع لا يأذونه :)


وهذا النوع اللي اوردته يا الدوسري مهو غريب الوقع على الاذن ،، لأن مثله منتشر في ليبيا ويمكن في بلاد عربيه اخرى.



وبيوتك حلوه :)





تحياتي / حامد

الله الله اعرف ذا البحر

هذي حركات المبدع حجاب بن نحيت


انت اخذها كذا


يالديجور
يالديجور
خبرني عن خلي


قصر الحيل
عن ذالليل
طقي له يا كفوفي


مابه خو
ولابه ضو
ومن لي من لي من لي .. هنا طولها والا هي ومن لي ومن لي


مهنا الا انت
طلت وشنت
تاعدني ماتوفـي



من ملفـاك
ليـا ملقـاك
لاحيـاك وولـي


فكر دار .. فكري مو فكر
فـي دوار
حافـه همـه حوفـي



وانت ماشي على هالموال



وكني تذكرت اغنية حجاب على ذا اللحن جبتها لكنها على ذا الطريقه


يالالال .. يالالال .. يالاله يالاله

هلابك ياعيد , نورت المتصفح , ولاهنت على كل حال .





حسبي الله على ابليسك ياشيخ !
بغيت أشرق بالماء من الضحك وأنا أقرا ردك :)

هاخلك مع الرصه نافداك :)







إضافة جميلة ومفيدة يامطر

والظاهر أن ذا الطرق هو نفسه لكن فيه زيادة حرفين في الأخير

كل الشكر والتقدير لشخصك الكريم




هاوش جايبك ؟!! :)

لاهنت ياابن عبدان وبيض الله وجهك






لاهنت ياابن مشوط على المداخلة النقازية :)
وياليتك تورد لنا بعض ماسمعته ومن قائله إن كان مافيها كلافة .
شكري وتقديري .




هلابك بالمطيري , والحقيقة أنك طرحت وجهة نظر جديرة بالتأمل ,
مع العلم أني حاولت فيما مضى البحث عن بحور جديدة , ولكن كل
ما كتبت على بحر جديد في نظري اكتشفت أن هناك من الشعراء من
سبقني إليه , ولازالت المحاولات مستمرة لعل وعسى :)

أما بالنسبة لتلميحك الكريم بأن ( البيوت ) لي ففي غير محله :)
فهي للشاعر جلاجل الجلاجل من أهل جلاجل :)

تحياتي وشكري .




لاهنت أخوي مبارك على المداخلة الثرية , ولعلك إن شاء الله تسترجع
لنا بعض قصائد حجاب من الذاكرة لامن الإستماع حتى
لا نبوء بالإثم :)





وللجميع مني خالص الشكر والتقدير على هذه المداخلات الهادفة والجميلة

تدري يافراج وانا اخوك

علم الاخ جلال بن جلال لايكثر من فيروز :)

وسلامتك وعفاك