منتديات المرقاب الأدبية - مدرسة التعامل بين الشعراء الكبار (مساجلة بين ابن زويبن وابن عون)

السلام عليكم ورحمة الله

هذه مساجلة بين الشاعرين الكبيرين عبدالله بن زويبن والشاعر عبدالله بن عون، نقلتها لكم من جريدة الجزيرة الصادرة يوم الثلاثاء الماضي،

كان لأسلافنا من أهل الشعر مواقف نبيلة خلدها الشعر الراقي الذي توارثته الأجيال، والشاعران الكبيران عبدالله بن زويبن وعبدالله بن عون في هاتين القصيدتين يعيدان جانباً من ذلك السمو والنقاء في التعامل بين رموز الشعر، حيث بدأ الشاعر عبدالله بن زويبن قائلاً:

[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black"]
مشينا من العارض على صافي الماطور =نهار السفر من لايدنيه مادنا
عسى الله يعديه العواكيس والعاثور =بنا يم أبو سلمان منعوب ومعنا
عزمنا وحنا من محبه وطيب شعور =عليه الحرير أضعف سلوكه يجرنا
يسوقه صبياً من عتيبه طويل شبور =يطوف المواتر كلهن ما يطوفنا
وعلى الباب الأيمن شاعر عتيبه المشهور =ابن عون في طاروقه المنفرد غنا
وأنا والشويب نحسب أن اللحن مكسور =نقول أعدل الطاروق واثر البلا منا
غريباً علينا لا هجيني ولا مجرور =وقعدنا نغرد خارج السرب لاهنا
على الدبك مثل المستجدين بالطابور =وتعبنا وعفنا عقب شفنا وهونا
وقعدنا نعاين بالانبيرات والديكور =تقل فيه شيءً بالغماره مهولنا
لين انا نسفنا نسفت الموج للبابور =بريده وسكان المليدا على ايمنا
لقينا جسوراً تنطوي مع بطون جسور =وعلى واحداً منهن على الرس ميلنا
ولقينا الحويفي واقفاً عند باب السور =نطحنا بكلمة مرحبا حين حولنا
قلطنا وهو يقفي ويقبل تقل مسعور =يشعشع وعده بالتراحيب يالكنا
وعلينا عياله يدرجون اشقراً مذعور =وراه المداخن كل لحظه يرمنا
وسمعنا وسولفنا وجاء للقصايد دور =وسمعنا طرايف شعرهم واسمعوا منا
وقلطنا على السفره عسى خيرهم مكثور =واكلنا من سمان المفاطيح لين انا
سمحنا وعودنا على المجلس المعمور =وقعدنا نسولف ساعتين وتسهلنا
لهلنا وجينا يوم بين شعاع النور =علينا وشفنا والظلام انجلا عنا
ونبيها زياره دايمة كل ست شهور =يزورونا ونزورهم كان خلنا
الأيام لو ما هي بدايم فرح وسرور =تعشت محمد والصحابه ماهو حنا
يقول الخلاوي بالمثل قبلنا بعصور =نعد الليالي والليالي يعدنا
[/poem]فأجابه الشاعر عبدالله بن عون قائلاً:

[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black"]
على وسق جيبٍ كنه الريمي المذعور =رفعنا الهجيني يوم فوقه توازنا
انا والزميل منيف والمنهي المامور =دعينا واجبنا لابوسلمان واذعنا
بعد ما فهق صلبوخ بادرت بالميسور =نغني بيوتٍ من قصيداً ماهوب النا
وابو بدر جاوبنا ولا بان منه اقصور =ثلاثه ورابعنا رفض لا يعاونا
وأبو بدر مثل امقدي الخور بالمقهور =ليا شافنا تهنا الطريقه تماكنا
ويقول انت قدامي وأنا دوب بالناظور =اشوفه وهو قدمي على مثل ماكنا
لا شك الرها ما حط للشك عنده دور =عقيداً لحاله ما غزا معك يامهنا
هو الشاعر الكابر وانا الشاعر المكبور =وكلام الصراحه من كمالة مراجلنا
لو الشعر له لجنة عداله وله دستور =لابو بدر جزلات الجوايز تعدنا
لا شك انحمد ربي على وضعنا المستور =لجان القصايد مثل لجنة مزاينا
أرى شعر بعض الناس رشٍ بدون انذور =إلى مره العاصوف شاله ولاثنا
على جرته تلقا وساع الفجوج ادهور =إلى جا الفياض الظاميه ما سقاهنا
كلامٍ رخيصٍ له يصفق له الجمهور =ولو شجعه ما راح منا ولا منا
يحور ويدور بفكرته ما يجي المحظور =عن المنهج المعتاد ماهون ومثنّا
نجامل ولا نشره على العمي هن والعور =إلى ما رضى اللي قبلنا كيف يرضنا
ومزار الحويفي نعتلي به خشوم القور =وعلى ضلع ابان وما تبين تبينا
هشاشٍ بشاشٍ كل مما حصله مدمور =ودماره على الخرفان والهيل والبنا
عسى اللي سواته من صدوف الدهر ماجور =ويمد بحياته ويحمانا ويمنا
يابو بدر ماعني وعن صاحبي مذخور =تعجرف علينا وانت بالطيب ضامنا
انا والشويب كلنا في رضاك حضور =نجاملك وانته ياجب انك تجاملنا
نقدرك ونراعيك ونرد لك بالشور =ومدامك على هالحال لا عاد تامنا [/poem]