وين أنت يالفاروق حال العرب شين_ أمّة محمد توخذ اليوم حيفه
 

[align=center]السلام عليكم ورحمة الله على أخواني بالمرقاب والزوار الكرام

قصيدة الشاعر الكبير مهند عيد العشيش الخالدي

في مدح فاروق الأمه

والقصيدة صوتية وموجوده بدواوين أبوعيد بالأنترنت

ولايوجد لدي الخبرة لإضافة أبداعه الصوتي هنا[/align]

[poem=font="Simplified Arabic,5,black,bold,normal" bkcolor="white" bkimage="" border="none,4,white" type=2 line=1 align=center use=sp num="0,black"]


ثاني خليفه شع نوره على الدين = تدبيرة الله بالبلاد المنيفه
مؤمن وامير المؤمنين الميامين = فاروق لابار الحليف بحليفه
من يوم كنت الجاهلي فيك ثنتين = شجاع ماترضخ ونفسك عفيفه
قضيت فيها سن سته وعشرين = ماخير بعدك ياعمر صار ضيفه
إلك السفاره بانقلاب الموازين = منك الجموع اللي غشتها النكيفه
حاشاك يالفاروق هرج المعادين = اللي لهم في خندق البوق شيفه
مثل الحبلّق بين طرش البعارين = ومثل النمل في قاع وادي حنيفه
انت الذي تخشاك روس الشياطين = وانت الذي للدين كنت القذيفه
اعداك ماتبرح من الموت شبرين = في هيّة الفرّيس خصمك تخيفه
رفيع منزل ساطيٍ يا احمر العين = اصلك وفصلك من قريش الشريفه
واللي دعى لك تهتدي يوم الاثنين = احمد رسول الله وجتنا طريفه
الله يعز الدين باحد العُمرين = واختارك الرحمن باحسن وظيفه
اعسر .. جسيم .. ولايغطيك بشتين = شديد حُمره والسباله كثيفه
لله فلا تحتاج قول وبراهين = قايد .. وقاطع .. ماانفدم حد سيفه
لاصار ذكرك واردٍ بالصحيحين = قل للمغفل لايطوّل بزيفه
اعدل من السيف الذي تاه قرنين = وابسط من بلاد الصعيدي وريفه
اصعب رجل .. والْين خفوقه من التين = واسهل من اللي يغرفونه غريفه
اغنى من اللي يملكون الملايين = وافقر من اللي قوت يومه رغيفه
في عهدك الزاهر وضعت الدواوين = في عام عشرين المحرم وقيفه
سبعة عشر ربيع الاول للادنين = تاريخنا الهجري سما في رفيفه
واول خليفه سن فيهم ثمانين = وجمعت قرآن الولي بالصحيفه
حجيت فيهم ياعمر عشرة اسنين = واكملت عمراتٍ ثلاثه نظيفه
حتى اليهود اللي على الدين بادين = هجّت ركايبهم رديفه رديفه
ورستم غدا بين الغماغم طعم لين = تسمع من الميدان زفرة جخيفه
هذا بعصرك لكن اليوم تأبين = ثقلت حمول الكايدات الكليفه
بالامس صارت ياعمر حرب تشرين = واللي كسبنا ياعمر بس جيفه !
وعقب انتفضنا بالثلاثه وسبعين = واقصى املنا نستوي بالنصيفه
كنا شعب واحد وصرنا ثلاثين = والكل يمشي في مزاجه وكيفه
اخيار لكن بين شلة ملاعين = امريكيا مع تل ابيب وجنيفه
ياكلاش ود العلم لعيار خمسين = قله علامه هاجعٍ بالسقيفه
قد قالها الكنعان نبغى الحرمين = مع اليمن والشام لاقصى قطيفه
اقوام تتسلح من ايسار ويمين = استوحشت من عقب ماهي اليفه
وين أنت يالفاروق حال العرب شين = أمّة محمد توخذ اليوم حيفه
ليتك تعيد القادسيه بعد حين = لنّ الهلال اليوم ولّى قنيفه
ياليتك تشوف العراق وفلسطين = وأحوالنا وشلون صارت ضعيفه
وأعلمك حنا غدينا مساكين = لعبوا بنا لعب الوليف بوليفه !
أجسادنا تسكن بدار المسنين = وقلوبنا راحت بيديهم خطيفه
والدين ماحنا على الدين ماشين = هذا بلانا ماورثنا حذيفه
عاهه على الصحه سوات النيكوتين = وعشنا يابو حفص الحياة السخيفه
ياأمّة الاسلام رحنا على وين ؟ = الدرب مظلم والنوايا كفيفه !
يالله بامرك نقضي الدَين بالدَين = والسيل الاحمر مايوّقف نزيفه
لو كنت مثل اللي تقول المجانين = ماكنت يالفاروق ثاني خليفه ![/poem]

وعليكم السلام والرحمه ..


حيّ الله أحمـــد :)



ومشكور على القصيده التي تدل على ثقافة شاعرها التاريخيه الاسلاميه ..

لكن ماقولك في هذا الشطر :
قايد .. وقاطع .. ماانفدم حد سيفه



وعندك بيت العراق وفلسطين أيضاّ يحتاج تعديل كلمة " ويا " مزوّدة الطبخة شوي !

الظاهر ماغير واو بس:)



وعفاك .

فعلا شاعر كبير

شامخه هذه القصيده ومصبوبه صب الذهب

بارك الله فيك يا أحمد

وصح لسان الشاعر الكبير / مهند الخالدي ،


..

رضي الله عن الفاروق



قصيده شامخه في مدح فاروق الامه رضي الله عنه



جزاك الله خير يا احمد وصح لسان مهند الخالدي وجعلها الله في موازين اعماله

ياسلام ياسلام

نص شامخ وشاعريّه فارقه

صح لسانه ولاهنت على النقل يا أحمد

[align=center]
قصيدة جزلة وراااائعة

صح لسااان مبدعها مهند الخالدي


وتسلم يا أخ أحمد على اختيارك الجميل


وياليت يا أخ عبدربه توضح لنا وش المشكلة في بيت العراق وفلسطين :confused:

ياليتك تشوف العراق وفلسطين *** وأحوالنا وشلون صارت ضعيفه

البيت مضبوووط وما فيه مشكله :)

تحياتي [/align]

^
^

هلا والله يابوفهد ،


الحين مضبوط ، وألاّ قبـل كان على هالنحو : ( ياليتك تشوف العراق ويا فلسطين )



لكن احتس لي في حق السيف ، هل هو مدح وألاّ ذم !!


:)

بانتظارك ياناقدنا الواعي ..


..

[align=center]
^
^
^

:confused:

حياك الله مره ثانية أخوي عبدربه


بصراحة أنا مالي بناقد .. لأني افتقد أبرز صفات الناقد وهي القدرة على التقاط مواطن الضعف والقوة اللي يمكن تخفى على القارئ العادي

بس الأكيد إني أستفيد منك لأنك تمتلك هالصفة بتفوق

وبالنسبة لبيت السيف:

لله فلا تحتاج قول وبراهين *** قايد .. وقاطع .. ماانفدم حد سيفه

إذا كنت تقصد عبارة (ما انفدم حد سيفه) .. فأنا أفهمها على إنها مدح لأنها جاءت في سياق مدح .. وأكيد بفهمها على أنها ذم إذا جاءت في سياق ذم :a16:

وإذا كان فيه تأويل لها فهو إن الشاعر قصد بعبارة (ما انفدم حد سيفه) نفي الضعف والهوان بشكل عام .. والتأكيد على دلالة الشجاعة (قايد وقاطع) ..

وما أكذب عليك أنا ما أعرف معنى كلمة (انفدم) بس من السياق أيضاً فهمت انها بمعنى (انثلم) .. وبما إن الإنثلام صفة ضعف (للسيف بالدرجة الأولى) فالشاعر نفاها عن السيف وهو يقصد نفيها عن الممدوح أيضاً

رغم إن انثلام السيف يمكن يكون دليل على الشجاعة أكثر من كونه دليل على الجُبن

وإذا كنت فهمت غير اللي تقصده ياليت تنورنا


تحياتي[/align]

^
^
100 ./. فديتــك . . :)


هذا الذي كنت أقصده ، وأنت أجبت وبرّرت وقرّرت بما فيه الكفاءه !



خل منك منتب ناقد ، بيّن صورة نطرة الإندهاش اللي في صورتك هههههههه

:)

احمد الخالدي
عبدربه
بداح السبيعي



شكراا ثلاث مية ,,

لو كنت مثل اللي تقول المجانين
ماكنت يالفاروق ثاني خليفه !


صدق والله .. كلمات مؤثرة ووافية


شكرا يا احمد على هذا النقل



تحياتي



..

بارك الله فيك يا احمد

صح لسان الشاعر ويكفيناهدف القصيده السامي

وابو عتيق يقصد والله اعلم ان البيت يمكن ان يفهم بان السيف لم ينثلم لقلة استخدامه :)

وهي صفه منتفيه عن الفاروق الذي فرق الله به بين الاسلام والكفر

لاهنت لاهنت ياغالي

محبتي ومتابعتي

اخوك

صح لسان الشاعر مهند الخالدي

قصيدة شاعر صحّ والله ينصر المسلمين

لا هنت على النقل يا احمد