منتديات المرقاب الأدبية - سعيد الشهيب X منور الحربي (طاروقين)

السلام عليكم ورحمة الله وبركاته:

هذين طاروقين من محاورة الشاعرين سعيد الشهيب الثبيتي و منور المعمري الحربي في قلطة الوطن:

سعيد الشهيب الثبيتي
ياسلام الله على شيخن بنا بالعز داره = كل ما مريت ناسن بالجمايل يذكرونه
اقتربنا من هدفنا غارتن في سد غاره = والذليل ابن الذليل اللي وراه يحيل دونه
منور فضي المعمري
مرحبا باسم الشيوخ اللي لهم قدر ووقاره = والكلام اللي تبونه يالعتيبي تاصلونه
اعرف ان النار دايم مبتداها من شراره = والردي يهون وانتم مالكم فيها مهونه
سعيد الشهيب الثبيتي
انت يامنور حريبي ما انت ضاري بالخساره = مير قدامك جبل من ينطحه يكسر قرونه
كان فكيت الخفير اللي على باب الخفاره = وش يقول الشايب اللي يتبع الجره بشونه
منور فضي المعمري
الخساره ماتجوز وعرفت الطيب تجاره = ما لزومن يا عتيبه كل وقت اتجربونه
يالثبيتي لا تسبب بينا فتنه واثاره = حقنا مضمون وانتم حقكم ما تجهلونه
سعيد الشهيب الثبيتي
يوم قابلنا المدير اللي على باب الاداره = مالقانا الا مريض عيال عمه يعضدونه
صاحبك ياولد عمي لو يبا ياخذ قراره = ما كسب دمع اليتيم اللي تهامل به عيونه
منور فضي المعمري
انت طولت الخبر والعلم طيبه بختصاره = لن وقع في ايدينكم يا صاحبنا لا ترحمونه
طيع شوري يالثبتيتي ثم صل الاستخاره = من يسوي مثل ما سويت كان الله بعونه
سعيد الشهيب الثبيتي
فيك شيٍ من البداوه فيك شيٍ امن الحضاره = فيك شيٍ يالحريبي مختلف شكله ولونه
وابك انا لو اضرب الميدان يطلع لك غباره - مير يامنور سلام وكيف حالك والمعونه
منور فضي المعمري
وانت برضه جامع الثنتين في برد وحراره = مير ما كل الكلام اللي نقوله تفهمونه

الطاروق الثاني والبدايه عند
منور فضي المعمري

سلام الله سلامن نخص أبه المعازيب = على شعب الكويتي من الشعب السعودي
على شان الثبيتي نبا نرسل مناديب = وهو عارف حدوده وانا عارف حدودي
سعيد الشهيب الثبيتي
هلا في حلة اهل الوفا واهل التراحيب = تراحيبٍ تقدم مثل عد النقودي
انا موجود ماغبت ولا رايح اغيب = ونارك من زنودك وناري من زنودي
منور فضي المعمري
يدوم ابك البقا ما بها شكه ولا ريب = ترقيها سنودي وارقيها سنودي
انا ما اقول لك غبت لكن رحت ياذيب = عساني كل ما جيت وانته فالوجودي
سعيد الشهيب الثبيتي
لو ان المعرفه بالطلايب والمشاعيب = لقينا كل واحد مجند له جنودي
والا يا ذيب يلي على روس المراقيب = انا لو عدت اجيلك على حسب الوعودي
منور فضي المعمري
مدام المعرفه كنز لا اتدور مجانيب = تراني شهادن لك وخلق الله شهودي
على راس الثبيتي تبين الشمس وتغيب = وهو ماهو حسودي وانا ماني حسودي
سعيد الشهيب الثبيتي
ترا ما بان لك علم ولا لك مطاليب = وبعضات السوالف يغثن الكبودي
الا يالله في حايزن نوه منصايب = ونرضى فى الصوادر ونرضى فى الورودي