منتديات المرقاب الأدبية - الحمد لله ماشكى صدري الضيق

بسم الله الرحمن الرحيم

السلام عليكم ورحمة الله وبركاته

اخوتي الكرام هذه القصيده جديدي واتمنى أن تحوز على رضاكم

إليكم القصيده

والقصيده موجوده صوتيه
http://www.rofof.com/dw.png

[poem=font="traditional arabic,6,darkblue,bold,normal" bkcolor="transparent" bkimage="backgrounds/49.gif" border="none,4,gray" type=2 line=0 align=center use=ex num="0,black""]

الحمد لله ماشكى صدري الضيق=عايش بها الدنيا ومرتاح بالي
الهم لو يرسي كما يرسي طويق=ينــزاح يوم ادعي لربي لحالي
لي منــزلي بين الرجال المطاليق=وصحبة رجال المعرفه راس مالي
اللي لقاهم فيه متعه وتشويق=وعلوم من غالي توجه لغالي
ماهي علوم ملفق الهرج تلفيق=اللي على نقل الرديه يلالي
اعز نفسي عن ضعوف المخاليق=وارفع مقامي عن قصير الحبالي
لي مع هل الطاله عهود ومواثيق=على النقا والطيب في كل حالي
ارقى جبال الطيب لو هي شواهيق=ماهاب راسي من طوال الجبالي
العزم صامل والخوافي صناديق=ولا ملت لو شلت الحمول الثقالي
عزي من الخلاق فطره وتوفيق=يوم ان غيري عزته بالريالي
ماقل قدري لو على يبسة الريق=شيمة وفا ماهي غرور وتعالي
وهرج الردى دونه سموعي مغاليق=راع الهروج العوج ماله ومالي
اللي يفبركها ويطمع بتصديق=ياجعلها فاله ولا هي بفالي
خاب الحقود مسوق الزيف تسويق=لو نار حقده تبتدي بالموالي
تبطي حلومه ماتهنت بتحقيق=اللي بناها فوق جرف هيالي
مايجرح العقال هرج المطافيق=ولا يكسب النوماس راع الهزالي
للعار دار وللمراجل عشاشيق=ولاتنقل الحمله ضعوف الجمالي
وضح النقا ماهو سواة المداريق=والدرق ماهو من طبوع الرجالي
وانا بشر واغفي على الذّنب وافيق=ما كامل الا ربنا ذو الجلالي
لكن ودي من قصدني بتعليق=مايختفي ويقول هرجه قبالي
كانه يبينا نلحق العلم تدقيق=مانيب عاجز عن جواب السوالي
واليا عرفنا وش وراها لواحيق=يبشر بعلم يجعل المر حالي
علمٍ يجي له دور مشهود ويليق=أقولها وانا من آلاد عالي
ماينحني راسي ولا حاشني ضيق=ولا خفت غير اللي على الخلق والي
[/poem]