يالله دخيلك حاربت عيني النوم

وعلي فك الهم تسعين طاقه

وراح الضمير إحراق وعلومي علوم

ولحدٍ درا عن خافقي وإحتراقه

وطال المسا وأنا تراودني هموم

وسهرت لين الصبح بيّن زراقه

وأقول هذا أمرٍ مقدّر ومقسوم

خلقت أنا والهم ربع ورفاقه

لكن على الله يا عسى حظي يقوم

وياقف معي صامل على عظم ساقه

وتستعدل الأوضاع يومٍ بعد يوم

وأنسى الشقا وتحل ساعة فراقه

ويسلى ضميرٍ بالهواجيس مزحوم

وقلبٍ طواه الهم يطلق وثاقه

إطلاق حر ٍ مانعينه عن الحوم

والحر غاية شفّه الإنطلاقة

وأنا عن شفوفي مقيّد ومحروم

وصابر ولو الصبر مرٍ مذاقه

لكن ما دام أن عندي إصرار وعزوم

وعندي على شيل الثقايل لياقه

لابد أحصل ما تمنيت وأروم

روس العلا وأنا أعشقها عشاقه