ياوجودي
 

السلام عليكم ورحمة الله وبركاته

أعضاء وزوار منتدى المرقاب الادبي

وبعد أقدم لكم هذه القصيده وأتمنى أن تنال أعجابكم

ياوجودي لاضلم الليل وانزاح النهار=واستبات النور ماعاد فيه الا النجوم


مثل وجد الحاكم اللي عليه الوقت دار=قام شعبه بالتضاهر يضاهر كل يوم


اجتمع كله من الضيق واصدر له قرار=عقب نصفه مات قال السلامه ماتدوم


قال كلمه تزعل الصدر بالصوت الجهار=روح عنا والزمن فيه معطى ومحروم


واضلمت دنياه ماعاد فيه الا الفرار=وبعد ماكان يحكم صار مثواه محكوم


اتوجد مثل وجده وصار الهم صار=يوم غاب الغالي اللي على خده رقوم


له ثلاث سنين غايب عقب ماكان جار=كل مامريت بيته تذكرت العلوم


قام فلم الذاكره يعرض السيره وسار=مع طريق البين حتى تخاويه الهموم


ثم ذكرت اعيونه اللي كما عيون الحرار=نظرته منها على القلب توريدت سهوم


والخدود الوانها من بياض اليا حمار=الورود تغار منها وتخضع باللزوم


والوصوف الباقيه من تواصيف المهار=يوم تقبل فالمغيره على قطعان قوم


عقب غاب القلب كنه نوى الهجره وطار=مير ترخيه الضلوع القويه لايحوم


ضاق قلبي من ضلوعي وفكيت الزرار=وقمت أدوج بالفيافي تحت ضل الغيوم


نوب أروح يمين وامرار ممشايه يسار=القدم ماتعشق الا منيفات الرجوم


في ركون المعتلي يوم طالعت الديار=مالقيت الا المنازل عليها العج كوم


ضاق خلقي من سواياك ياللي معك شار=ليه تجهل نهج ناس المحبه والسلوم


ليه تجعل حال ضاوي مع ايامه دمار=كل ماينسى وليفه بحر حبه يعوم


والعيون تساهر الليل كله والقرار=ماتذوق النوم فالليل والعالم تنوم


وسلامتكم


dawy22dawy@hotmail.com

ضاوي الشيباني