منتديات المرقاب الأدبية - والله ما عااااد يسترنا يكود القبور

بسم الله الرحمن الرحيم

مني اليكم والسلام عليكم

الحمد والشكر وأجل الثناء للالاه= الله يجعل لنا في ضلمت القبر نور
ا لمعطي اللي يمدون العطى من عطاه= المانع القادر البر العزيز الشكور
الواحد الخالق الباري تعالى علاه= الماجد الواجد النور الودود الغفور
الرافع الباسط الوالي لكل الولاه= المغني الواسع الحق الرشيد الصبور
يا لله عفوك ألاهي خالقي والنجاه= يوم ألقيامه إذا حان البعث والنشور
في ساعةٍ يسهي المسلم عن أمه وأباه= كلن يدور إلى ألجنه وأهلها عبور
وأجعل لنا نور نمشيبه بكل اتجاه= بعد الحياة الكئيبه في لحود القبور
أنت الذي ما يخيب كل عبد رجاه= اجعل لنا في جنان الخلد مأوى ودور
وإليا ذكر سيد الأسياد صلوا علاه= محمد الهادي العدل الأمين الوقور
عليه منا عدد ما نذكر اسمه صلاه= صلوا على افضل بشروازكى نبي يا حضور
هزيت جذع القصيد العذب واسقط جناه= والشعر سحر البيان وترجمان الشعور
وإن ما كتبته وخلدته صدور الرواه= حرام يكتب عشان يموت بين السطور
كم شاعرٍ خط شعره مير محدٍ قراه= وكم شاعر ناحتٍ شعره بوسط الصدور
وكم شاعر تومي ارجوله وتومي يداه= ويقول انا اللي بمعرفتي سبحت البحور
ويلبس الشاوي الثاوي بشوت القضاه= ويحط ربعه مكان سهيل والناس بور
وإنه كريم وشجاع وراس منصى وجاه= وإن كان حت للحقيقه ما يلام معذور
أهل المجامل تصفق له وزاد بعماه= ثم شد حيله وقال انا العديم الجسور
والطيب اللي بهم الدين ربي حباه = السان شعره عن الاسلام سيفٍ بتور
يا عل شعري وما تملك يميني فداه = اي والله ايهمني همه وكلي قصور
صحيح يالربع انا همي صعيب دواه= تكفون ما عادني على المكابر صبور
الشام غيم من افعال النصيري سماه= وسيل المصايب على الاسلام واهله حدور
إستعجلتنا الخطأ والوقت دارت رحاه= لين انكشفنا وصرنا من دبور لدبور
يا شامنا عذرنا يكسر عظام الجباه= ما عاد منا على الاسلام وأهله غيور
عشنا بلا دين وأغرتنا حياة الرفاه= وطرنا مثل ما يطير مع الهبوب البخور
واصل يا بشار صناع القرار الدهاه= ما همها الا مضاهر وحب الضهور
يا سنة الشام بيعونا خمار الفتاه= ما عاد فينا قعيده يحتمون السبور
المشكله ماهي ببشار والا إزملاه= الحرب سنه وشيعه يا ولات الامور
المسلمه توخذ برجلينها يا سفاه= والعود راسه يوطى والغلام معثور
ابو بكر يلعن ويشتم ما هذا جزاه= وعمر من الشتم والتوبيخ ينصاه دور
والطاهره امنا تقذف بفعل الزناه= وقلوبنا مغتشيها الران وعيون عور
والعقل تفكيره اليا فكر اقصى مداه= اما وش اللبس والا في العشاء والفطور
نلبس وحنا ليا جات الحقيقه عراه= والشام تنزف وحنا يا حياة الثبور
يا امة محمد المختار ماهي حياه= حتى لو إنا سكنا فارهات القصور
تكالبو ضدنا يا مسلمين الطغاه= وقامت علينا المصايب والدواير تدور
لاكن هبو بقدر الاستطاعه حماه= واللي ما يقدر يجهز غازين ما يبور
وإن كان مالله ها ثم اللي نعيش بذراه= هو نمرنا اللي تحت ضله تنام النمور
بكره يزيزل سما الشام المحاصر نداه= اليا حيينا نصر والموت جنه وحور
وان كان عشنا كذا على ما حنا علاه = والله ما عاد يسترنا يكود القبور