[align=center]حيـاة روح المعنـى نايـد القفـره
لاهجرعت في الوريد وحاجبه رفّـي
خطرٍ عليها تفيض بفيضة الزفـره
لا ضاق صندوقها والقلب مختفّـي
كنّه يمزّع مـن المعـلاق بالشفـره
في ساعةٍ يقبل المكتـوب ويقفّـي
قدام عيني وأمنّي النفـس بالنفـره
وأقرأ عليها مـن الأيـات وأنفّـي
كني غريب الديار وحانت السفـره
معاد له في البلد وأهل البلـد شفّـي
يازين دبّارتي في العصـر والدفـره
في خايعٍ من عيون الناس متخفّـي
فيه الخزامى تمايل والنفـل وفـره
والسدر والرمث والحميّض ملتفّـي
علّه من الوسم نصباً زادته طفـره
على خضاره وجاء الخبيّز متجفّـي
ريح الزهر فاح والحوذان له ذفـره
والقاع تاوي لها من وجعة الخفّـي
فيه أم سالم مع المقطـاع والغفـره
كنها تغني على المزمـار والدفّـي
أسوج الاقدام قبل المـوت والثفـره
على أثر سيله وغيله مابعـد جفّـي
وإليا أقبل الليل مانيب راعي العفره
أفرح ليا غط الارض وضفها ضفّي
ممساي في فيضته والى على حفره
لو الشفاء دايجه ماهـوب متحفّـي
أشب ضوّي وغالي الكيف ماخفـره
أبصر بحمسه على كيفي ومن كفّي
وأستدني اللي يشادي داعي الظفره
نجرٍ ليـا دن يطـرب كـل متعفّـي
والدلّه اللي عمار بهارهـا الوفـره
فنجالها يقعـد الضرمـان ويكفّـي
طبع بدويٍ مانْجرف مع عالم الطفره
على سلومه وعرق الاصل ماهفّـي
أسامر النجم في ليـلٍ سمـاه أفـره
مالي ونيسٍ سواه وغايـة الشفّـي
جوّ الخلا والفضا والليل لي غفـره
من ضيقه وهاجسٍ في الصدر تلتفّي
وإن زلّ ثلثين ليلي قمت في سفـره
معَ الدعاء والصلاة ودامعي طفّـي
أناجي الواحد القهـار فـي قفـره
أدعيه وأشكي عليه الحال والحفّـي
يا الله ضاقت على العمده وأهل كفره
ماحيلته غير صفق الكـف بالكفّـي
وأنت العليم الخبير اللي نصر نفـره
فزعتك عن ماسواك تكـفّ وتكفّـي
الله الله الله
الله الله الله
أبو شايع
لله درّك
والله انك
أبدعت
وامتعت
وبيّض الله وجهك
دمت بخير
وفي حفظ الرحمن ...
*************
[/align]
|