المشاركة الأصلية كتبت بواسطة مشعان البراق
,
/
/
اللي لي سنين .. بـ اشعاري مدلعّها
ما قدرت ضيقي اللي واضح ٍ فيني
ياكثر ما احبها .. واعشق طبايعها
واشيلها عن طمان الارض بـ يديني
لو ان الايام فيه انسان يجمعّها !
قدّمت لـ سنينها .. ما حاشت سنيني
خلتني اهج بيباني .. واشرّعها
لـ اقسى طعون ٍ تجيني من محبيني
تطعن وانا حالف ٍ .. ماني مقاطعها
لأني من الوقت فيني ما يكفيني
الونه اونّها .. وازريت اطلعّها
وسكوتي يميتني واحيان يحييني
مدري هي الغيره .. تغيّر روابعها ؟
والا لها قصد .. تزعلني وترضيني
ماودي اقسى على قلبي واودعّها
يوم انها اغلا عليّه من نظر عيني
لكنها .. كان ما داوت مواجعها
عزالله اتلى العهد من بينها وبيني
الحين ابقول لي كلمه فـ مسمعها
لاصرت ماني بـ رايق .. لا تناديني
ليت المشاعر تموت .. وهاجسي معها
سمحت / حتى الشعر ماعاد يعنيني
من :+: آخ ـر مراسيـ / لي :+: لــ الهواوي رقم 1 / مشعان البراق 