السلام عليكم
عذرا ً على الإنقطاع



[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=2 line=1 align=center use=ex num="0,black"]
يامعدّ أخبارنا وأخبارنا معدوده = لا تعدّ ولا تزود الطين طين وبلـّه
عارفين ٍ موجزك وش نقصه ووش زوده = قبل لا تقرا تفاصيله نعرفه كلـّه
يمّك أنظار العرب لو أنـّها مشدوده = العرب نص العرب لا مذهب ولا ملـّه
هاك كحلك لا كحلت عيونـّا المرموده = والمخل اللي سواد العين عانه خلـّه
آوي ٍ لعيوننا من دمعة ٍ معهوده = مدري المنديل من زرق الدموع آو ٍله
القلوب مجرّحه وكبودنا ملهوده = والضمير الحي كانه حي مات بغلـّه
حيّنا يمشي على البيدا ويمشي دوده = حي ماهو حي .. مدري ويش هو حي ٍ له
آه ياحر المهبّ اللي تذعع نوده = وآه يابرد الدمي .. والحامي أخذه خلـّه
صابرين ٍ صبرما عاقبْته ابمحموده = نضحك وحجّاننا ما فرّدت من فلـّه
الرجاوي كلـّبوها فوقنا معقوده = أنعقد حبل الرجا يالله يارب تحلـّه
ماش عز ولا ش فيها ردّة ٍ مردوده = مخفي الله عز قوم مبيّنين الذلـّه
والبعير اللي شمخ نابه وعض بدوده = ( الهمل ) تطحن ضلوعه و( الصبي ) يطحن له
بين حد الناب والسكين والجلموده = وبين تبريد الكبود وبين صلو الملـّه
كل ماشفته لحقني بالنظر منقوده = أستحيت وقلت يا سليمان قلـّه قلـّه
لي ثمان اليال مدهال القصيد أروده = جيت في حلّه وعيّا لا يجي في حلـّه
دون بيضه ماعلي ولا حدتني سوده = وفوق دقـّه ماوقفت وطمعتي في جلـّه
يكذب اللي قالّك بيجود من مـاجوده = أصلا ً الشاعر شعوره ماهو بملك ٍ له
الحدث ، والمعرفه ، والفكره المولوده = كلّبوها فالشعور الشاعري خشر ٍ له
من كثر مادجت رجلي كنـّها مبروده = والمواطي كنـّهنّه فالتراب أهلـّه
القريحه من ضلوعي نارها موقوده = والحنايا صلوها يقلب بهار الدلّه
أشتعل ( جثمور ) هاجوسي ودخّن عوده = وأختنقت امن أوّل أكسيده وشفت الخلـّه
( عرق ) يامسعود بالميسم على مسعوده = وأنجض الكيّه عساها ما تطيب العلـّه
المجازر فوق غزّه ماهي ابمحدوده = فالخليل وفي رفح والضفـّه المحتلـّه
مـ / ألحقت ستين عام عدودنا الموروده = يالمرت الدلو فالجم الرهاوي دلـّه
ماركتنا ماتجيك اللا بختم الجوده = إعتصام .. وشجب .. واستنكـار ..فأبهى حلـّه
كل واحد شال مزماره وطق اشنوده = المغنّي يرقص وجمهوره يطبلـّه
راعي الأفعال تنميق الكلام يكوده = لا توحّى فالشرود اللي جفل من ظلـّه
لا سمن كبش الفدا جيناك قود نقوده = سم بـ / اسمك واذبحه .. حنا نسمّي بالله
أمش فـ/ أيّة دار تختاره وصحّ ارقوده = ماتشيل ( الإف سطعشر ) علانا هلـّه
في بنوك الدم لو دمّانّا مرصوده ؟ = كان كل مسلم .. شرى رنج وشرى له فلـّه
دون خشم المدفعه ، والفرد ، والباروده = دوك خشم الكيس لا تزعل وخشم القلـّه
العرب لو تجتمع فالقمّه المعقوده = مايسوّون العرب فالإجتماع ( البلـّه )
كل واحد مع رفيقه بالش ٍ بحدوده = وإل / رفيقه ما يبا لا هلّه ولا شلّه
عذري لبلفور لو أنـّي نسيت اوعوده = أشغلونا في وعود ٍ سامجه وامّلـّه
(فارض التهجير) يدعونه (بحق العوده) = تستخّف اعريبيا واعقولها مختلـّه
أحسبنّي بين ناس ٍ روسها مسنوده = واثرني من بين ناس ٍ روسها منصلـّه
عالم الإسلام لو أنّا نعد ايهوده = من مية مليون .. صافيهم قليل ٍ ثلـّه
لو سرى برق ( السلام ) ولو تحن ارعوده = بارق ٍ مقفي ولا خلناه لله لله
يا مكلفتنا بوسط الفجّه المقعوده = أفتل الحبل أفتله لا تفتله وتفلـّه
إن شهدت أشهد مع اللي حجّته مجحوده = ليه ما تشهد مدام إن الشهاده لله
إستمع في حجّته ثم استمع لشهوده = القضيّه تحترك وأطرافها منشلـّه
تحت قصف ( البي ) واليا هلّت ( العنقوده )= ردّ سيفك في جفيره من عليه تسلـّه ؟
راح وقت الطيّب اللي طيّبين اجدوده = في زمان الطيّب اللي مخرجه يدّلـّه
ياصلاح الدين لا تبطي علانا العوده = لا تعجّب من تمنّينا تراه جبلـّه
الدعا ماهو بحيلة من قليّل فوده = والنبي رافع يده في كثره وفي قلـّه
الغبي في وضعنا الراهن يصفّ جنوده = والغشيم يقول جر الجيش ( يا عبدالله )[/poem]

وسلامتكم

( تــنــاقيــــــــع )







..