[align=center]

((رحلة العمر))[/align]

[poem=font="Simplified Arabic,5,firebrick,normal,normal" bkcolor="white" bkimage="" border="double,9,sienna" type=2 line=0 align=center use=ex num="0,black"]
الموت مني يستحق القصيده= مافيه شخص الا وللموت مديون
لو المَلك بالمدح عمري يزيده=كان امدحه مدحٍ كثر مال قارون
لاشك هذا مطلبي مايجيده=الامر بيد المعتلي خالق الكون
الموت لو ياتي بالارقام قيده=وتدري متى كل الاوادم يموتون..
الكل قبل الموت يرفع رصيده=في طاعة الرحمن خاضع وممنون
لاشك ماندري بيوم الوعيده=شايب..ولد..ماهو من الموت مامون
فجأه يجيك وينقلك في بريده=واحيان ..ماتشكي من امراض وطعون
كم من شبابٍ له مطامح مديده=يحلم يجي ملكه مثل ملك هارون
ودنياه تصبح مثل ست الزبيده=يامر وينهى والاوادم يطيعون
الموت في لحظات مزّق وريده=وأمست طموحاته فقاقيع صابون
وكم من فتاةٍ بالمحاسن فريده=تحس فيها عالم الحسن مقرون
تضحك على شمس النهار الحميده=تقول ماهي مثل ماهم يقولون
الشمس ماهي بالجمال الوحيده=ماتنكسف لو خدها خد مزيون!!
وان القمر فيه المحاسن زهيده=يكمل ثلاث ايام ويعود عرجون
انا الذي حزت الوصوف العديده=بالذوق والابهار والشكل واللون
تعيش باحلام الزواج السعيده=من واحدٍ فيها مولع ومشطون
ياما تجاوز لاجلها من مكيده=وخسايرٍ وصلت ليا حد مليون
ليـن الظروف امـست مثل مايريده=مابـاقـي الا شاهــديـنٍ ومأذون
ويوم العزا جاله قبل يوم عيده=ماتت ..وهو لفراقها ضل محزون
وانا شريط الذكريات أستعيده=اللي على بالي مسجل ومخزون
بالباديه عشت الحيـــاه الشديده= عيشة بدو تمشـي على خيل وضعون
ترحل وتنزل بالديار البعيده=ماتنتــظر مـن مجلس الامن قانون
البرق نفرح لاسمعنا رعيده=اللي يبشر في هماليل ومزون
والصيد بأطراف الفيافي نصيده=وان ماحصل خبزٍ من السمن مدهون
والضيف نبذل له جـهودٍ جهـيده= في واجبـه تظهـر سكاكين وصحون
يكـرم ويلقى الواجبـات السديده=قبل الفـنادق والمطاعم يصيــرون
عيشة شغف منها تجارب مفيــده=صبرٍ جميل وعون من يطلب العــون
وجاراتنا لو ما لهلــهن بديــده=معـنا لهن عرضٍ عن العيب مصيون
وعشت الحضاره والقصور المشيده=وأصـبحت في هالات الاعلام مفتون
شعري بدأ كل ٍ يردد نشيـــده=وأعجـاب مطلق عند عاقل ومجـنون
والملعبه بين الخصـوم العنــيـده=حركت في ميدانها روس ومتــون
والذاكره عند المواجـه عتيــده=على مناخٍ بالصراعــات مشحـون
والجاه والتقدير مـخـضرْ صعيـده=والحــب نبتٍ له عناقيد وغصـون
علاقتي باهل المبادي وطــيــده=وأهل الشهامه والكرم در مــكنون
الهم في حشد الوناســه نـبيـده=تفاخرٍ وأمجاد واشعار ولحــــون
والرابح الصابر ســليم الـعقيده=يوم العمــل فـوق الموازين موزون
الزرع يحصد في ليالي حصيــده=وركب الزمن ساير والاعـمار يوفون
ولابد يوم الذيب يعلن شديــده=ويفارق الدنيا والاحـباب يبكــون
ويتم نقلي فوق شبه الحــديـده=اربع رجالٍ ينقـلوني ويمــشـون
وينـزّلونـي والجوارح هميــده=في مظلمٍ مابه ثريـات واْنيـــون
والرمل فــوقي صار مثل النضيده=واصير ذكرى داخل الارض مـدفون
يالله يامن دبــرة الكون بيــده=يارب تانس وحشتي يوم يقفــون
يالله ياللي مطلــبي ما يكيــده=من ترحمه في جنة الخلـد مضمــون
تغفر ذنوبي يامــسامح عبيــده=عبدٍ ضعيف وبين اياديك مرهــون
يارب تحييني حـياةٍ جــديــده=في جنةٍ فيها بسـاتين وعيــــون
روحــي كما لو هي توفّت شهيده=تعـدها بالاجر بالكاف والنـــون
وخبر وفاتي بالعلوم الاكيــــده=ينشــر وياتون الجماعــه يعزون
احدٍ يقول اني كريمٍ وليـــــده=واحدٍ يقول اني بخــيلٍ وملــعون
واحدٍ يدوّن سيرتي بالجريــــده=ذكــرى ومن شان الجماهير يقرون
عشرين يومٍ ذكرياتــي مجيــده=ومن بعدها حتى اقرب الناس ينـسون[/poem]


[align=center]

ذيب الشمري
30/10/2006[/align]