,


[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black"]
يا طارف الصحب .. عندي علم غير العلوم = تعال .. ودي أفضفض لك وأعلمك به

ملزوم أعلمك يومنّك تسّد اللزوم = علمي بعد ضاعت الأريا .. معاد أقضبه

حاولت أشد العزوم ولابقالي عزوم = وحزامي المرتخي .. عجزت يدي تكربه

منجوم .. لو أهتدي بمسيرات النجوم = فعيوني .. الربع والأعداء نفس الشبه

مافيه شي أبتهج به في حياتي يدوم = إليا أبتهجت بوجه .. درب الذهاب أذهبه

وإن هبّت بريحة الأمطار دهم الغيوم = فأطرافها الخير .. لكن وسطها الأتربه

نزحت عن واقعي وأنحيت يمّ الحلوم = وعايشت الأحلام قبل أصحى وقبل أنتبه

خذيت من لونها الوردي كبار القسوم = ويا للأسف جت جميع قسومها مرعبه

كتمت فالصدر لين أزرت ضلوع الكتوم = صبر .. صبر .. وأنقضى صبره وضاق إرحبه

وش قولتك : لا أستجن الوقت , والربع قوم = تقفي عن القوم والا تنطح المِنشبه

إن قلت لأجل الكرام أدمح خطاة الرخوم = أقول حمل الكريم اليوم .. حمل رقبه

إليا حكيت الصراحه قام كلن يلوم = يعني عشان السلامه .. كل كذبك جبه

إليا سبحت البحر .. قالوا عسى مايعوم = وإليا صعدت الدرج .. زادو عليك إعتَبَه

حتى لو تطير عنهم فوق .. تعجز تحوم = تجيك حذفة لسانً موجعه , معطبه

ندفع بالأحسن .. ولكن ماسلمنا الهجوم = إلى متى والحليم يغّط صوت غضبه

في تالي الوقت تلقى شخص دون العموم = يكفيك جملة عربك إليا سَلَم مذهبه

والا أكثر الخلق ماتقدر تسّد اللزوم = لو عّدها الرجل .. من روحه ومثل عرَبه

والتاليه .. علها بحمول أهلها تقوم = لين إيحصل خير .. والا الجاي أعلمك به [/poem]




,,