منتديات المرقاب الأدبية - عرض مشاركة واحدة

12-02-2009, 01:02 PM

وش فيك كن صدرك طلع فوقه طويق؟
خلّك من مكابرْك .. لا تقول : لا بـاس
ياخي بلاش مْن الوهـم .. لازم تفيـق
صدقك تسبّب فـإنعزالك عـن النـاس
كنّـك بمشيتْـك وملامحْـك والضيـق
دمعة حزن من شخص ما عنده احساس
حاضرْك ذا شـحّ الرجـال المطاليـق
وماضيك بس اللي عطا الناس نوماس
ومن ياخذ من اقرب بـن آدم مواثيـق
كنّه يشوف ان الأمل جا مـن اليـاس
مـا اخالفـك فـي نظرتـك للمخاليـق
بس انت واحد ضدّ جيش مْن الاجناس
أتوقّـع ان معظـم قناعاتـك اتعـيـق
خطواتك اللي (مفترض) ترفع الـراس
ركّز معي في (مفترض) قبل ما تويـق
على المراجل كيف تحسـب وتنقـاس
نافـق وجامـل وابْتشـوف التوافيـق
كليب مات وعـاش بالغـدر جسـاس
خلّ المبادىء عنْك مـا عـادت تليـق
الصدق مـا يجعـل بجنبينـك أقـواس
بالعكس اشوف الصدق في وقتنا سيـق
للموت لأن النـاس تستـرزق النـاس
آذان صقهـا فـي صـدورٍ مغالـيـق
ونفوس من كسب الأجر تعلن إفـلاس
تدري ؟؟ هنا بوقف عشـان المعاليـق
تمثيلـي الفاشـل بهـا دق الاجـراس
مثلك أنـا .. لكنـي اسعـى لتحقيـق
شي اشبه بجذع شجرة قـاوم الفـاس
أتصنّع شْعور اللي ما يشعـر بضيـق
مثل العزا اللي لابسٍ ثـوب الاعـراس
لكـن بطـوّق مـا تعانيـه تطـويـق
واعطيك من تجربتي اللي على اسـاس
بصبّ لـك نصيحتـي صبّـة ابريـق
فاحت به الحكمة وخل عقلـك الكـاس
إذا امتحنْك الوقت فـي يبْسـة الريـق
صبرك عليه يعيّشه ضيـق الانفـاس

ثاني الدهمشي

صح لسااااانك يا مبدع

استحيت اقتبس بيت عن القصيده

صراحه كل بيت اجمل من الثاني

شكرآً لتواصلك

وننتظر الجديد كما عودتنا