LEXUS لكزس



[poem=font="Simplified Arabic,6,blue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]

راكب اللي صانعه متقن مهارات الصناعه = ملهمه ربه من أسرار الفنون الهندسيه
صمّمه ويشرّفه ياخذ براءة أختراعه=تعتبر أبسط حقوقه عن نتاج العبقريه
يعجبك في قهقراه ويعجبك عند أندفاعه = والعلامه فارقه فالماركات العالميه
واضحه في هيكله للعين لمسات البراعه = عن جداره ينتزع غصبا وسام الأفضليه
الأناقه والفخامه والمتانه وارتفاعه = في تناغم وانسجام اتذوب فيها الأولويه
منظره كله عموماً بنت في حالة خلاعه =من بنات القاهره والا بنات اللاذقيه
أنسخ الصوره من الأفكار قدر الأستطاعه = والا انا من فضل ربي ذمتي منها بريه
أضبط ارسال التردد واستشفّه بالأشاعه = فوق ذلك لعبتي فن الحروف الابجديه
كل حرفاً في محله يمتثل عند الطباعه = تاخذ يميناً تراصف كنها صفّة سريه
ورّده عبد اللطيف وجمرك اوراقه وباعه = مشترا المعطى من الرزاق خلاق البريه
لانوا الطرقه وفلل تانكيه ثم زاعه = كل مازاد احتراقه زاد روح المعنويه
فزة الحر القطامي كل ماشاف الطماعه = يردف اصرار الأراده بانقضاضه مخلبيه
يضمن النصر المؤزر في ثواني من صراعه = ثم ياقف في تباهي فوق جثمان الضحيه
للمواتر مشي ساعه يقطعه في نصف ساعه = في اريحيه عجيبه مع سكون ارضً خليه
مالك الا همس تكييفه ونغمات الاذاعه= من سمع ياناس منكم بالحياه المخمليه
في عبوره انسيابيه ومن أحسن طباعه =خفّةً توحي لحسّك بانعدام الجاذبيه
لاوقف بين المواتر تتضح فيها البشاعه = التناسق شي أخر غير شكل الفوضويه
صوت سلفه لانقرته صوت ورعً جاه راعه = افتقد طعم الحياه الهانيه والعاطفيه
ماتت امه ودفنوها وانقطع تالي رضاعه = وابتدا الحرمان يكشف عن فصول المسرحيه
في عيونه مسحة احزانه تعبر عن ضياعه =مسكن الآم الليالي حاجر العين الشقيه
يقبل اقبالة شجيعً ممتلي راسه شجاعه = ينتخونه لابته يوم السنين الجاهليه
يكسر البارق لحاله فافتراقه واجتماعه =حايشه صوت العزاوي وامتثل للعنصريه
يشفي أصدور الغلايل ضرب سيفه من ذراعه= يارد حياض المنون ويلحق القوم الرزيه
ويقفي اقفاية جبانً فالوغى خلا متاعه = أنخرش قلبه بعد شاف السيوف الصيرميه
قال كلاً نجدته في مثل هذا من كراعه =وانطلق كنّه على متن الرياح الموسميه
نور طبلونه عجب يجلا النواظر بالسّطاعه = ماتقول الا مصمم من لباب الغشمريه
نيكله مصبوب فضّه يبهرك عند التماعه= ماتقول الا مطعّم من جنوب النافعيه
يزفر ازفارة سجينً زاد همه والتياعه = صكو البيبان دونه في سراديباً خليه
طاوع الحقد الدفين وورده حوض الشناعه = وأغرقه شيطان نفسه في محابيل الخطيه
مابقي فزعة صحيب ولا بقي فزعة جماعه = كلها أستنفذوها وانعقد حبل القضيه
عيّو أخصامه وصكّو كل بيبان الشفاعه = من تقدّم فالوجاهه مالقاله مقدريه
صدّقومن هيئة التمييز حكمه عن قناعه = أستناداً للشريعه والأدله واقعيه
يخطف الانظار لمعة من مصابيحه شعاعه = كنها برقاً تلالا فالمزون العقربيه
تزدحم منه المناشي في سماه وسال قاعه =تختلط مع وبله المدرار زخّات برديّه
لانت عروق الظوامي واختفى وجه المجاعه= واكتسى وجه البسيطه بالنواوير النديه
وأم سالم جالها مابين ريضانه لعاعه=والطروش أسترسلت ترعى عباب المهمهيه
أبشرو ياهل الحلال وأبشرو ياهل الزراعه=رحمة الله وبركاته عمّت الأرض السنيه
شوف صفّات المقاعد في رحابةأتساعه = كنها ديوان زايد يوم يجلس للرعيه
كل حقً للمواطن يصدر امره بانتزاعه = حكمته مع طيبته تسحق حصون العنجهيه
مات لكنه بقي في ذاكرة شعبه وداعه = أودعه صون الكرامه واليدين الحاتميه
كل منهم يرفع الكفّين يدعي في ضراعه = يالله أنك تجمعه بالحور في جنه عذيه
من مشاعر شاعراً شعره يجسّد أنطباعه =لاتعنّى مايجيب الهافيه والا الرديه
أحسبه من متعة أيام العمر قبل أنقطاعه = بيد أن الصالحات الباقيات أحسن بقيه
أتذلل في خشوع وأنكسار وأنخضاعه= واطلب الله والتجي له بالدعا وارفع يديه
يالله اني طالبك في كل خير وكل طاعه = وتوبةً نصوح تغسل حوبتي قبل المنيه[/poem]