للرائع / عمر الحجي
عقلي سفير النوايـا , واغترابـي خطـاب
واحلاميّ اكبر مـن الشاعـر ومـا ينظمـه
والصدر غابة غلا جـاروا عليهـا احتطـاب
ليـه الحنايـا وهـي حراسـهـا مجـرمـه
والعين ماتت عطـش وارويتهـا بالسّـراب
لين اكتست بالجفـاف اللـي خذاهـا سمـه
لاصار حقـل التجـارب معرفـه واكتسـاب
لابـد مايشغـل الشاعـر هـدف يرسـمـه
احيان للشعـر فـي حرفـي ثقافـة كتـاب
واحيان احـس العبـاره ترفـض الترجمـه
واحيان افصّل على الصوره بشـوت وثيـاب
واحيان اقلّد علـى صـدر الحيـاة اوسمـه
والنظره اللي دلايلهـا صفـه مـن غـراب
تبقى على قـول مـن ينظـر لهـا مبهمـه
واللّقمه اللـي عليهـا مـا يسيـل اللّعـاب
في ذمة التاجـر اللـي مـا تزيـد اسهمـه
واللي لسانه على المبـدا سيـوف وحـراب
تبقى حـروف الثقافـه تجتـوٍل فـي فمـه
واللي بنتـه الثقـه يبقـى سـؤال وجـواب
كم حق مشـروع تستولـي عليـه انظمـه
مالـم يفـوّت جمـل مانـي مسميـه بـاب
فكـره تحـدد هـدف واقفالـهـا محكـمـه
من شان دمح الخطا زرعت عين الصـواب
لكـنّ عيّـت تلـيـق ونظـرتـي معتـمـه
وابقى عباره عن استفهـام حـول الغيـاب
في عين كل الظـروف اللـي تبـا تخدمـه
حطيت قوسين من حـول اكتمـال النّصـاب
مالي ومـال الذهـب لاصـار فـي منجمـه
باقي بصدري من اوجـاع الحيـاه ارتيـاب
والفتنه اللي علـى جـال الحطـب مظرمـه
فرغت شحنـة لسانـي ليـن ذاب العتـاب
واللي بصدري نما لاضقـت كيـف اكضمـه
في البال يطري كثير اشيا .. (عليك الحساب)
وآنـا علـيّ ازرع الريحـان فـي موسمـه
كم قلت عقلي سفير . وفي لسانـي خطـاب
واحلامي اكبر مـن الشاعـر ومـا ينظمـه
..
|