السلام عليكم ورحمة الله وبركاته

متواضعه للتواصل مرروها الله لا يهينكم

صلو على النبي

ودك الرجال ينفع والدينه=لا كبر واحدهم وشوفه تردا
كان وده دايمٍ ربي يعينه=تحت ما طاهم كما البزر يتقدا
ومن قصر يمناه عن الذبح السمينة=جعله من الضيم يفطر ويتغدا
الردي لو تنثر السمن بيمينه=فاللوازم ما يسر ولا يسدا
علةٍ وسط النحر ومجربينه=فالرخاء صنديد والكل يتحدا
ما تفرق بين بنت أمه وبينه=لا زهمته يرتخي مشيه وهدا
والصميدع خابرين وذاخرينه=لا بدا اللازم تحزم واستعدا
السنين عجاف والألسن رطينه=والقدر ما للبنادم عنه صدا
العمر لو طال من طين وجبينه=تحت رمل القاع لو يتعب وكدا
كود من قدم لآخرته ودينه=صالح الأعمال والخير استمدا
كم من الحكام حول من عرينه=بأمر رب الكون جاهه غصب هدا
دورة الأيام والأنفس حزينة=مستريح البال من ينزل وشدا
كل خلق الله على ظهر السفينة=أبحرت ما بين جزر وبين مدا
بث من الأخبار وأعلن يا جهينة=وإن عصاك البث لك عندي مردا
ترسل الأيام شيٍ خابرينه=بين ضيق وبين هزل وبين جدا
لاح وسط الرأس شيب ومبصرينه=والذلول مدربه والوقت عدا
درهمت والليل بأطراف المدينة=موحشٍ وأحدٍ كسب وأخر تردا

وسلامتكم من كل شر والسموحه على التقصير