من الأرشيف للتواصل .. تقبّلوها ..





مستمطر السحب أبا أوصّيك في حاجه
أبيك تستمطر (إ)وصال السنافيّه


شفّي سحابة وصل بالغيث ثجّاجه
في ليلٍ أبرز سماته زود حنيّه


في وسط صدري رعايا الشوق محتاجه
والصدر من غير وصل أرضٍ سناويّه


والفكر من بعدها يا ما اكثر انتاجه
بأبيات فيها على ماقيل ماريّه


كتبتها يوم كلٍ يضحك حجاجه
وأنا على نارٍ (إ)من فراقها حيّه


شيٍ نشرته ، وشئ لا زال فأدراجه
وأبيات تنقال من باب الخصوصيه


للي عطاها الجمال اليوسفي تاجه
و مُحال تلقى شبهها فالسعوديه


كم ليلةٍ زاد شوقي وأوقد (إ)سراجه
لمعانق (إ)طيوفها على أمل جيّه


ويُطفي سراجه كثر ياسه ولا واجه
لاطيفها في مفارقها ولا هيّه


أكيد تسمع لحكي العذل وإزعاجه
ولاّ من (إ)عدود حكي العذل مسقيّه


العذل سهلٍ دخوله ، صعب مخراجه
لكنّ حسبي على اللي ينوي السيّه


والعذل داءٍ قويٍّ يصعب (إ)علاجه
للي مناعة شعوره هشّه شويّه


ولاّ ، بقول إسعفيني يوم بمواجه
وتكفّين صفّي على ماقالوا النيّه


همّي سكنّي وخلاّ الرجل دوّاجه
وخلاّ عيوني من الفرقا شقاويّه


والهمّ بحرٍ عجزت أصارع أمواجه
وسلامتي في يدك ماهيب في يديّه


والهمّ مثل السجين ولحظة إفراجه
ماغير شوفتك يا البنت السنافيّه

Magid20@