السلام عليكم ورحمة الله وبركاته
و مساكم خير بأذن الله


[poem=font="simplified arabic,4,darkblue,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
ماعلينا ,خلــــــنا من سيــــرة العــــــــذال = لا تكدر خاطرك واليوم دار الحول
هل من مزن المحيا ما يسر الحال = الثواني لا تجف و شوقنا مبلول
خلني بعلــــــــــمك عن شاعرك وش قال = وانت خــل عيونك تفل السهر وتقــول
بكتبك ما عمّرت روحي وعمرك طال = القلم خيّال فكري والحروف خيول
من ملا عين القصـــــــيد وعلمه يختال !؟ = من وصل بي ذروة الالهام صوت و زول
عَدْ من عيني لعيني واكسر الفنجال = واقهر الليل و سواده وانثر المجدول
في حضورك لا انحنى غصن الغرام ومال = ودي أن الخلق عميا والزمن مشلول
كم لها روحي دهر , تروى سراب اللال = وانت طيحت الحيا من يوم جيت سيول
في بحر حسنك غرقت ولا طرى لي جال ! = ليه ما اغرق فيك يابحر الدرر واللول
طلتك , والشمس تلقى في هدبك ظلال = والقمر لو يشبهك , ما غازلك مذهول !
ضحكتك , ترسم صباح اول شهر شوال = ضيقتك , تكتب للأرض تعيش خمس فصول
قبلتك , كل الجهات لقبلتك تحتال = همستك , كل اخر حروفك يجي : "مشغول"
رقتك , والنسمة تحن و تضم الشال ! = مشيتك , والقاع مبصر والخطاوي حوول !
اسمك , وتتعب على طاريه هيبة "آل" = رسمك , و وجه المرايا يلمحه و يزول
فيك ماجاوز حدود العقل فـ العقّال = فيك مافوق الخيال اصدق من المعقول
كل سيرة عشق فيها ينقتل رجال = وانت سيرة عشق فيها حزني المقتول
لا عدمت رضاك وانت رضاك راحة بال = ازرع جروحك هنيّا , وازهل المحصول
وان تجرا الدمع في عينك نهار وسال = لك عليّه ماتبات و محجرك مبلول
كل عام و حبنا طيب وباحسن حال = كل عام و كلنا لقلوبنا بنقول :
الجفا والبعد والوقفة على الاطلال = الثلاث اللي عليها الصبر ما من طول[/poem]