سعود ناهض الرويس

لو يوزن الاحساس بالعقل والديـن
ماكان بعض الناس ضيّـع شبابـه
مايدري بحجم الخطأ غيـر بعديـن
إن كان ماخطّاف الانفس غـدا بـه
وإن كان باقي من شقا عمره سنين
لازم يوفّـي قبـل يرحـل حسابـه
ما ترفع أعماله وفي ذمتـه ديـن
ويشوف ميزة عودته مـن ذهابـه
كانت تمرجح به كفوف الموازيـن
واختار في غيبة ضميـره غيابـه
لو كان ما يدري رحيله على ويـن
شد الرحـال وراس مالـه ثيابـه
مع شلّةٍ مـا تحتويهـا عناويـن
تجمّعوا باسـم الطفـش والكآبـه
وهناك خاضوا في الحجج والبراهين
وتفرّدوا بالعلم فـي وسـط غابـه
والحق له منزل على الراس والعين
ولا يخفّى عـن عيـون الرقابـه
لكنّهم بالحـق مـا هـم بداريـن
وعادوا بلدهم وأستحلّـوا صوابـه
بالحلم آخذناهم وقلنا لهم ( زيـن )
توبوا وهذا العفـو مفتـوح بابـه
وصاروا مثل مستبدل الزين بالشين
وقاموا بثـورات الفتـن والحرابـه
وأعذر بلدنا في مساعيـه بالليـن
والله على اللي ما يوفّـي نصابـه
شعب وحكومه صف ماهوب صفين
مافيـه حزبيّـه ولا بـه عصابـه
حنّا بديـن الله وبالحكـم راضيـن
الديـن يجمعنـا وحنّـا قـرابـه
لو تجتمع كل القوى يـا مساكيـن
بوجيهنا ... ما زادنـا إلا صلابـه
أمـا محقناكـم بسيـفٍ بحـديـن
وإلا بدعـوة مسلـمٍ مستجـابـه

صالح بن هريس

صح لسانك واعتلا شانك

شاعر مبدع الله لايضرك وانا اخوك