(( أول رحله على السيكل ))
اشتريت سيكل بقيمة ميه وتسعين ريال من محلات الطفل السعيد بالدوادمي على شارع المدارس قلت للمصري : اللي في المحل ان شاء الله انه كويس السيكل ؟
قال بالمصري : ميه الميه يا بيه.
قلت : اقدر اروح عليه للقصيم والرياض ؟
قال بكل تعجب : بالمصري (أيه!!) لا يا بني .. دا بتاع الولاد الصغار في البيت !
واخذت السيكل منه لاني اعرف ان مهوب السيكل اللي بيمشي في الرحله اللي بينفذ الرحله هو اللي راكب على السيكل اذا كان يمتلك الاراده والعزيمه ما يهمه شكل السيكل وبالفعل سافرت عليه .
في البداية كنت اعرف شباب من عنيزه في القصيم قالوا : تجي تلعب معنا كوره ؟
قلت : ما فيه مشكلة .. متى ؟
قالوا : يوم الاثنين تجي !
قلت : خلاص باجيكم على السيكل .
قالوا : خلك عاقل وعساك تجينا على الموتر .
وخذت السيكل بعد صلاة الفجر ومشيت مع طريق عرجا ووصلت نفي قبل الظهر وتغديت في نفي ووصلت دخنه العصر ، وبعد المغرب وانا في عنيزه والساعه تسع ونصف وانا عند الملعب ! وانهبلوا الشباب وبعضهم ما صدق !!
قلت لهم : بكره برجع عليه اللي يبي يلحقني يلحقني !
وكان ما معي الا خمسة وثلاثين ريال من ضمنها قطة الملعب عشرة ريال وفعلاً لعبت كوره ورجعت من بكره وكانت المسافة اربع مية واربعين كيلو رايح جاي وانتشر الخبر في الدوادمي ودرى ابوي .. قال : ان شفتك رايح ثاني مره كسرت رجلينك .
هو من خوفه علي لكن ما يدري وش الطموح اللي في داخلي ورحت ثانيه وثالثه !! وبلغ الشرطه عني . قال : هذا خبل امسكوه .
مسكوني الشرطه وحطوني في الحجز مكلبش وحاولت اتصل ببعض الشباب يطلعوني . قالوا : ما نقدر هذا البلاغ من ابوك لازم هو يجي ويطلعك .
وبعد اربعة ايام جاء ابوي للضابط واقنعه الضابط انه يطلعني لانه ما شاف علي أي سلوك سئ سواء اني اسافر على السيكل وهاوشني ابوي عندهم بعد ما اخذوا علي تعهد اني ما اسافر على السيكل .
وقال لي : يالخبل فشلتنا .. ومشينا للبيت بعدها قال لي : اذا رحت ثاني مره لو للشعرا ابلغ المحافظ نوديك للحاير لانك ما تنفع وشهد اخواني .
وبعد شهرين والطموح يعيش معي ويكبر قررت اني اروح للدمام حتى لو كان الموضوع فيه الحاير وكانت عندي قاعده (شيٍّ لاهو حرام ولا عيب ما فيه مانع تنفذه) حتى لو ما رضى عليه الاخرين مصيرهم راح يرضون .
==============================
(( الرحلة إلى الدمام ))
رحلتي من الدوادمي إلى الدمام عن طريق الشعرا الرويضه كنت ادرس في ثالث ثانوي في ثانوية النبوان ورحت للمدير اني ابغى منك ثلاثة أيام رخصه مع الخميس والجمعه تصير خمسة ايام سألني : ليه ؟ قلت له : بروح على السيكل للدمام وان شاء الله خمسة ايام تكفيني ! قال لي : صحيح انت بتروح على السيكل انا سمعت انك تروح للقصيم عليه ؟ قلت : ان شاء الله .. لكن اسمح لي ثلاثة ايام وابشر ! قال لي : رح لك اسبوعين ! وبالفعل مشيت الصباح ولا معي الا ثمانين ريال ، يعني اصرف في اليوم خمسة عشر ريال ، ويوم اقبلت على عروى العصر جوني ثلاثه شباب صغار على ددسن موديل ثلاثه وثمانين ضربوا بوري ولفّو علي يحسبوني هندي او بنقالي وبصراحة ما ألومهم على سيكل ولابس بدله وبالشماغ متلطم !! قالو لي : سلام . قلت : عليكم السلام ، وعرفوا اني سعودي وتغيرت معاملتهم قالوا : من وين جاي يالطيب ؟ قلت لهم : جاي من الدوادمي وبروح للدمام إن شاء الله . قالوا : على سيكلك هذا ؟ قلت : إن شاء الله . قالوا : رجلينك ما تعورك ؟ قال : لا إن شاء الله مافيه إلا كل شي زين ، أنا مستعد للرحلة بتمرينات جاده . قالوا : لي اقلط . قلت : مستعجل . قالوا : تامر شي ؟ ناقص عليك شي ؟ قلت : ابد سلامتكم . قال اصغر واحد فيهم : تبا دخان ؟ وهاوشه الكبير منهم !! قال : يا مهبول هذا رياضي ما يشرب الدخان . ومشوا من عندي .. بعد نصف ساعه جتني سيارة هايلكس موديل الفين وصار يدور رايح جاي حولي . قلت : الله يستر .. ويوم بدا الظلام وقفوا بجنبي وفتح الدريشه وولعوا لمبة السياره الداخليه ، قال لي : معليش يالطيب عسى ما ازعجناك ؟ قلت له : لا خذ راحتك .. وحاولت اتعرف عليهم ، وناظرت الي راكب ورا وكان وجهه مهوب غريب علي ، قلت له : انا قد شفتك وين ؟ قال : ما عرفتني ؟ قلت : لا والله . قال : انا راعي التستن اللي اولا !! قعدت اضحك .. وعرفت انهم اخوياي . قال لي : السواق صحيح بتروح للدمام ؟ قلت ان شاء الله . قال : ممكن نسوي معك لقاء صحفي ابن اخينا صحفي في جريدة الجزيرة يقال له محمد غشام العتيبي . قلت : والنعم .. ما فيه مشكله . قال : وين نلقاك ؟ قلت : شفت الخط الاصفر هذا ! مانيب فاكه الا في الدمام ، انا على سيكل وانت على موتر الحقني . وبعد ثلاثة كيلو جاني جيب (VXR) وكابرس ، وسلمت عليهم قالوا : لا تعبت ممكن نعمل معك لقاء صحفي ؟ واخذوا اسمي وبعض الصور وفكرة الرحلة ، وسألوني إذا ناقص علي شي ؟ قلت : سلامتك .. ومشيت من عندهم وقبل الرويضة تقريباً بخمسة كيلو حسيت بالتعب ووقفت علشان انام ، لاني ما اعرف أحد في الرويضة ولا معي فلوس تكفي إني استأجر غرفة وكنت خايف من الشرطة ونزلت في العبارة ولقيت برميل بترومين وانسدحت في وسطه علشان يكون دافئ لأنا كنا في المربعانية ونمت في البرميل الين الساعة احدى عشر ليلاً وكل شوي قايم ولا قدرت ارقد زين وبكره وراي خط طويل وطلعت من البرميل وركبت السيكل ورحت الرويضه وكنت جايع ورحت باتعشى في المطعم ، ويوم اقبلت على المطعم رحب فيني المصري وقال : تفضل حسبت انه يسوي دعايه لمحله ، دخلت وطلبت ربع دجاجه مع الرز مع انها ما تكفي لكنها على قد الفلوس اللي معي واكلتها كلها مع السلطه اللي معها . وسألت المصري : ما فيه شوي رز زياده ؟ قال المصري : ادّي له نفر . قلت له : لا لا تجيب نفر النفر بثلاث ريال يهز الميزانية لان يوميتي كانت خمسة عشر ريال . قال المصري : ادي لوه دا من عندنا . قلت : دامه مجاني جبه . جابه الهندي وكبّه في صحني من الجوع لقطت اللقمه في الهواء واستغرب الهندي !! اللي يقدم الطلبات ، وخلصت النفر في دقايق تصدقون ياجماعه ولا حبه رز طاحت في السماط لأول مره تصير معي في حياتي !! وكان جنبي واحد جالس يتعشى وقام من عشاه وباقي رز وشوي دجاج ، قلت : حرام النعمه هاذي تترك واستحيت اني اطلب زياده ، ورحت باحاسب ، قلت له : كم الحساب مع اني عارف انه سته ريال ؟ قال المصري : لا يابيه انتا ضيف عندنا ، محمد غشام العتيبي اتصل فينا واحنا مستضيفينك اليوم . قلت : يعني بلاش ؟ قال : ايوه بلاش . قلت : عطني حبه دجاج مع الرز ، والهندي من الخوف رفض يجيب الطلب . قال للمصري يجيبه واكلت الدجاجه وغسلت واثرهم مولمين لي الغرفه والسرير وجميع وسائل الراحه ـ جزاهم الله خير ـ ونمت وقوموني الصباح وجاب لي المصري الفطور ورحت منهم مودعاً بالحفاوة والتكريم ووصلت القويعية قابلت اخوياي عيال البداح هناك وجازت لي الجلسه عندهم وقعدت يوم عندهم يوم نويت امشي الصباح جانا ابوهم بداح وما كان يعرفني وعلمه عبدالمحسن ولده قال يبه هذا فهد اليحيى جاي من الدوادمي بيروح للدمام على السيكل ، وناظرني وهو ملبد ملابس وقال : ما حدك الله يا وليدي في هالبرد ،عود لاهلك . قلت : جزاك الله خير . ومشيت من عندهم ومسكت الخط السريع ووقفني أمن الطرق بعد 10 كيلو تقريبا .. قال لي : من وين جاي ؟ خفت اقول له الحقيقه وياخذني للقسم ويعطل الرحله .. قلت له : انا اتمرن عندي سباق بعد كم يوم إذا هو ممنوع مافي مشكله اوقف قال لي : لا خذ راحتك . وسألني : من انت ؟ قلت له : انا فهد اليحيى من الدوادمي . قال لي أي اليحيى ؟ حسيت انه يعرفنا ، قلت : من انت ؟ قال : معك فايز الرويس من مصده قلت له : ونعم معك فهد اليحيى لاعب في نادي مصده ، يوم دريت انه من الديره ، قلت : ياالطيب والله اني من اليوم وانا العب عليك انا الصراحه جاي من الدوادمي وبروح الدمام على السيكل وكذبت عليك خفت انك تعطل رحلتي او توديني القسم . قال لي : بالعكس ، نعين ونعاون .. وعطاني رقم جواله ، وقال : اتصل فيني اذا بغيت أي مساعده . وكملت طريقي لين الرياض ووصلت للرياض وتوجهت لمخرج 9 عند عيال عمي في الشقه عشان انام واطلع من قريب على طريق الدمام وسالوني عيال عمي : من وين جاي ومن وين رايح ؟ قلت : جاي من الدوادمي ورايح الدمام ان شاء الله . قالوا : على السيكل ياخبل ؟ قلت : مافي شي مستحيل . ونمت وقمت الصباح وكنا يوم الاربعاء والشباب مشوا للدوادمي بعد ماخلصوا الدوام
يتبع
|