وانا مشيت للدمام على الطريق السريع وكانت رحلتي الساعه 9 الصباح وريحت المساء في محطه ساسكو بعد 140 كيلو تقريبا وانتشر خبر الرحله في قصر الجماعه بالليل ودرى ابوي عن الرحله واتصل علي ولقى جوالي مقفل وكان عنده بدر اخوي ، قال : أببلغ الشرطه ؟ قال : بدر ادحر الشيطان ، وفهد قال انه بيجي يوم السبت اذا جاء الاحد بلغ على كيفك . قال : خير ان شاء الله الاحد قريب وانا ماكنت اعرف عن القصه هذي أي شي عرفتها بعد مارجعت . واليوم الثاني مشيت لاكمال الرحله وفي العصر وقف عندي صالون ارامكو رجال عمره فوق الخمسين ، فتح الدريشه وقال لي : (فري فري جود) بالانجليزي طبعا قعد يكلمني بالانجليزي وانا ماادري وش السالفه !! يوم خلص قلت : والله ماادري وش تقول ياابن الحلال ، مير عليكم السلام . قال : الاخ سعودي ؟ وهو مسرور ويضحك ومتعجب ! قلت له : أي نعم وجاي من الدوادمي وباروح الدمام . قال : يعطيك العافيه ، وهذا فخر للسعوديين . وعطاني كرته ، وقال : لازم تزورني في الخبر وانطلقت مكملا الرحله والمعنويات مرتفعه حسيت اني بديت انجح واوصل الفكره للاخرين ومشيت يوم جت الساعه 8 باالليل وألقى لي سياره متعطله وداق الفليشر وقفت سيكلي ورى موتره وربطته باالشبك ومشيت لمّه وطقيت الدريشه عليه وناظرني وهو منهبل وكان معه عياله الصغار وصنم وهو يناظرني !! قلت له : افتح الدريشه ونزل الدريشه شوي .. وقلت له : سلام عليكم . ناظرني .. وقال : بسم الله الرحمن الرحيم انت انس والا جن؟ ضحكت انا وماعرفت اتعامل مع الموقف .. وقلت : انا فهد اليحيى وجاي من الدوادمي . قال : انت من وين طلعت لي ماشفت وراي سيارات ولا انوار ؟ ضحكت .. وقلت له : انا جاي على السيكل شف سيكلي واقف وراك . انهبل زود !! وقال لي : شكرا ماابغى شي ، وسكر الدريشه واصريت الا اني اساعده وقلت له : ياابن الحلال ترى عندي خبره في الكهرباء والميكانيكا يمكن يكون فيوز بسيط واصلحه لك وتوكل على الله ؟ قال لي : لا انا الكفر عندي مبنشر . قلت له : اسهل واسهل .. اصلحه لك . قال : حتى الاستبنه خربانه ! قلت له : مافي مشكله اصلحه لك ! حس ان الموضوع مافي فكه فتح الشنطه وقال : شفها ورى ! وهو مانزل من السياره اخذت الكفر وحطيت اغراضي بشنطته وقلت شوي واجيك ، وقلت له : انتبه لاغراضي تراها معك ورحت للمحطه تقريبا 4 كيلو مسافتها رايح جاي 8 كيلو ورقعت الكفر تيوبلس ونفخته وجيته يوم وصلت له حس ان الموضوع جد ونزل وسلم علي ، وقال لي : معليش يالطيب الصراحه انك هبلتني ! قلت : له ماألومك واسترح بالسياره الين اركب الكفر انا يديني قد توصخت ولاياكلك البرد وركبت الكفر وقام يشكر ويثني على الموقف وعطاني كرته وقريت الكرت ولقيت مكتوب النقيب عبدالرحمن الدوسري . قلت : انت عسكري ؟ قال : أي نعم . قلت : ودك تخدمني ؟ قال : أي نعم تفضل يشرفني قلت : فكني من امن الطرق تراهم اشغلوني .. من وين جاي ؟ من وين رايح ؟ وتشرب شيي ؟ رجليك ما تعورك ؟حنا في الموتر نتعب ! قال لي : ابشر وين يلقونك فيه ؟ قلت : في المحطه هذي واشرت عليها ، ومشى من عندي ورحت للمحطه ونمت بعد ما عشوني اليمنيه اللي في المحطه 3 نفر مندي لحم مجانا كاستضافه ، وقمت الصباح ومشيت من عندهم وطلعت على الخط السريع وجوني أمن الطرق .. قالوا : سلام عليكم .. انت فهد اليحيى ؟ قلت : أي نعم . قالوا : كلمنا زميلنا الدوسري ونبي نرافقك للدمام وباالفعل رافقوني كل نقطه تسلمني للنقطه الثانيه حتى بقي 30 كم تقريبا على الدمام واستلمتني آخر دوريه اللي بتوصلني لشرطه الدمام وكان يدعى العسكري ابو محمد وياالربع ياهو منسم عليه اسئله تفقع الراس مغير من يوم لقيته وهو ينشدني من وين جاي ؟ اهيب ياهذا رجلينك ماتعورك ؟ انا في الموتر ودوامي 4 ساعات افحم !! انت في السيكل ماتفحم !! انا فحمت وانا اناظرك واشعلني باسئلته الواجد !! قلت : خلني اعطيه معلومات تشغله عني !! قلت له : يابو محمد عداد الموتر يشتغل وكالعاده كل ماسألته سألني ! وقلت له : من أدب الكلام الاجابه ثم السوال الذي تريده . قال لي : روح العداد يشتغل . قلت : صفره وامش وراي اذا مشينا كيلو اضرب بوري ! وقال لي : روح .. ومشيت ومن حبه للخبر اسرع عشان يخلص الكيلو ويبدا ينشدني يوم خلص الكيلو ضرب بوري وقفت وجاء جنبي وفتح الدريشه ، وقال : علامك ؟ وقلت له : لحظه قعدت احسب في راسي بعض الاعداد ! قال لي : ابك انت علامك تتمتم فيك شي ؟ قلت له : لحظه الله يهديك بتعرف كل شي الحين خلصت من حسابي وقلت له : يابو محمد ؟ وقال : سم . قلت : تدري كم عدد عيون القطط من الدوادمي الي الدمام على الخط الاصفر ؟ ناظرني بتعجب وذهول واندهاش !! قال لي : اسم الله الرحمن الرحيم الحكومه ماتعرف عددها انت كيف عديتها ؟ قلت : المسأله سهله ، انا حسبت الكيلو كم فيه من حبه وضربته بعدد الكيلوات وهذي مسأله في الرياضيات . قال لي : الرياضيات منتازه ياولد .. قال : انا طالبك ياليحيى علمني اللي في السريع كله كم ؟ قلت له : سهله يابو محمد اضرب 143000 في 4 مسارات يطلع الناتج ! قال : انا ماافهم الرياضيات مامعي الا سادس ليلي وناجح بالواسطه وابن اخي المدير . ضربتها له وعلمته الناتج 570000 حبه ! قال لي : ياولد الرياضيات منتازه نبي نعود للمدرسه على الحرام ان المقاول يوم جاء يكتب العقد انه مسجل 800 وماخذ الفرق الحكومه ماتعرف عددها لي 8 سنوات وانا في الدوام على الحرام اني ماعرفت عددها غير ما جيتني اليوم . ومشينا يوم قربت اوصل الدمام زاد الحماس عندي وكلمني بالمكرفون ، وقال لي : اليحيى تتريح ؟ وانا ااشر له بيدي عشان مايوقف وكررها علي وانا مصر على المواصل وهو ملقوف يبي ينشد وحاكاني باالمكرفون وقال : ياخوي حنا تعبنا . ووقف وخلاني ، واضطريت اني ارجع له وامارس هواياته بالأسئله علي !! وقال لي : ريح واشرب عصير انت علامك ؟ واخيرا وصلنا للدمام عند سعد اخوي واستضافوني في فندق (الهوليدي ان) وبعد عودتي من الفندق قال لي سعد اخوي : ابوي اتصل ينشد عنك . قلت : الله يستر عسى مهوب يقول لك بلّغ والا اسجنه ؟ قال : لا هو مبسوط .. وقال : سلم لي على البطل ، بعد ماشاف المقابلة في جريده الجزيره في الصفحه الاخيره بعنوان (الرحاله اليحيى يستعد للسفر من الدوادمي الى دبي) مع اللي التقيت فيهم في عروى ، وحول لي 60000 ريال مكافأة ودعم للرحله وتحول التوبيخ الى مديح والخبل الى بطل والفشل الى شرف والعار إلى وسام .. كلها عبارات تغيرت بفضل الله ثم بالعزيمه والاصرار وتوظيف القدرة الذاتيه بالشكل الصحيح والقدره الذاتيه عالم آخر يحتاج له شرح طويل وسأحدثكم عنه فيما بعد ، ورجعت للدوادمي ولقيت ابوي مسدد القسايم اللي علي 10200 ريال ومطلع لي جواز سفر وقايل لي رح لايردك الا امريكا . هذا بالنسبه لقصه الدمام واقناع والدي حفظه الله ورعاه ودعمه اللا محدود لي .
(( رحلة العمرة .. من الدوادمي إلى مكة المكرمة ))
بعد وفاة والدتي رحمها الله واسكنها فسيح جناته بأسابيع قليله قررت الرحيل لأداء العمره عن والدتي على السيكل على الرغم أنها رحمها الله كانت من المؤيدين لرحلاتي قبل وفاتها وكانت جريده الجزيره تحت راسها توريها كل من جاها رحمها الله
طلعت من الدوادمي إلى مكة مرورا بالبجاديه ، وقفوني نقطة تفتيش بالبجاديه ، قال لي العسكري : على جنب ياراعي السيكل !وقفت .. وقال لي : من وين جاي ؟
قلت : جاي من الدوادمي وباروح لمكه آخذ عمره وباطلع لجده !
وناظرني .. وقال : انت مريض والا سكران انت تستعمل حاجه ؟ قلت : بالعكس .. انا رياضي وعندي طموح .
قال لي : انزل نبي نفتشك . فتش الشنطه وقال : يارياجيل الرجال معه حراماته ويبي مكه انتم علامكم عليه ناظرني خويه قال لي : انت تبي مكه والا تبي شهار حق المجانين يمكن انك تلعب علينا ؟
قلت له : ان شاء الله اني بروح لمكه .
قال : الحكومه لوتكلفني بمهمه على موتر 2003 بهالليل ماسريت تتروح على سيكلك يامريض ؟
قلت له : ان شاء الله وهذا طموحي . وقلت له : اني اخطط على موسوعة قينيس للارقام القياسيه .
قال : قينيس وشنهي قينيس ؟
قلت : هذا كتاب للارقام القياسيه .
قال : هذا كتاب الكفار وش تبا به .. جانا خويهم وكان راعي موتر شكله كان ريسهم . قال : علامه ابو سيكل وانا واقف بينهم يحسبوني مااعرف لهجتهم كاني هندي بينهم !!
قالوا : تعين المبدول هذا جاي من الدوادمي يبا يروح مكه على السيكل !
قال لي : وش اسمك ؟
قلت : اسمي فهد اليحيى من سكان الدوادمي .
قال : انت اليحيى اللي تتروح لالمانيا على سيكلك ؟
قلت : هو انا .
قال : يامهبول (الفيكسار) يخبط ماوصلها ومكينه الفيكسار 8 سرندل انت تبي تروح على سيكلك يامريض ؟
قلت : ان شاء الله .
وكرر علي : انت تستعمل شي ؟
قلت له : لا والله .
قال : اعترف احسن لك ترى بنحللك !
قلت : انا واثق من نفسي وسو اللي تبي .
قال : مشينا للمركز نبي نتاكد من حالتك الصحيه ، هم ماسكيني الساعه 11 وفكوني الساعه 2 بعد ماكتبوا على تعهد اني مااركب السيكل !!
قلت له : ليه ماهو من الرياضه والا حرام ؟
قال لي : لا .. بس ماهوب من سلومنا .
قلت : الله يهديك انا خاطب منك !
وكتبت التعهد وطلعوني ، وكملت رحلتي واخذت العمره وطلعت لجده وكرموني في شركه دله البركه للشيخ صالح كامل ورجعت من بكره بالسياره .
هذه باالنسبه للرحلات الداخليه وفيه بعض الطرائف التي لم تكن ضمن احداث الرحله وساذكرها لكم
---------------------------------
قصتي مع الهندي ودرج إسكان الدمام
بعد ماواعدني احد الشباب انه بيجيب لي موافقه من رعاية الشباب وكان جاد في كلامه لان ابوه كان مدير رعايه الشباب تحمست وحسيت ان الفرج جاء وفصلت من المدرسه وتفرغت للتمرين وحطيت فلوس المدرسه الاهليه في النادي ويحسبني ابوي ادرس واتمرن بعد العصر الين العشاء في النادي واريح الين الساعه 10 واطلع واركض 10 كيلو باتجاه اسكان الدمام كنت اعرف واحد من الشباب هناك وابدا طلوع الدرج من الساعه 11 وانتهي الساعه 6 الصباح علما ان العماره ارتفاعها 17 دور وكنت اطلع وانزل 50 مره كل يوم لمده شهر علما ان طالع نازل تصير عده وحده من الـ 50 وكان الهندي اللي في العماره يشوفني وانا اطلع وانزل قال لي : وش تسوي ؟
قلت : اتمرن !
قال : انتم ياالسعوديين مخ مافيه .
قلت له : ماتقدر تسوي زيي ؟
قال : انت فلوسك واجد وامك وابوك يصرفون عليك وفلوسكم واجد وانا مسكين لازم اشتغل عشان اجمع فلوس .
قلت له : اذا سويت مثلي يوم واحد بااعطيك 500 ريال !
انهبل .. وقال : موافق خلاص بكره .
جاء بكره وهو جاهز بالملابس الرياضيه وحذرته ان الموضوع خطير وانه مايقدر عليه لان ماعنده لياقه .
قال لي : انت خايف وماتبي تدفع فلوس ومن الاستهزاء اللي فيه قال لي : اذا ماقدرت ابعطيك 200 ريال .
وبدينا نرقى الشاهد انه رقى 10 مرات بعدين وقف في الدور الثامن تقريبا .. قلت له : ياالله ياصديق خلنا نمشي ؟
قال : مافي يقدر رجول عور .. وجلس على ركبه وانسدح !
قلت له : وش فيك قعد يصايح ويقول (هوسبتل..هوسبتل )
سحبته ونزلته في الاصانصير ونزلته تحت ودخلته غرفته ، واتصل على مستشفى تبع الشركه اللي مأمنة لهم وجو بالاسعاف وماقدروا يشيلونه إلا بعد 3 ابر .. جاه تمزف في العضلات ونوم خمسة ايام في المستشفى .. وزرته وتطمنت عليه !! وقلت له : وين الـ200 ريال ؟
قال : انا مسكين خصموا علي الشركه !
قلت له : طيب نفر سعودي خربان والا كويس ؟
قال : نفر سعودي ميه ميه هندي كلو خربان يبي الفكه من الـ 200 ريال وهذه قصه اسكان الدمام ..
[OVERLINE]
من الايميل
[/OVERLINE]
|