منتديات المرقاب الأدبية - عرض مشاركة واحدة

30-07-2009, 12:51 PM

\

/

\

جيتكم
.. والله يستر .. من كتابه هالموقف ..

طبعاً فالبدايه اود التنويه ابطال الموقف ..كلهم اعضاء مرقابين .. وانا واحدٍ منهم والعدد (4)اعضاء .
مره من المرات وفي احدى الليالي .. كنا مجتمعين في كورنيش الدمام .. نسولف ونضحك .. ومر علينا الوقت وحنا مادرينا ..
ويوم جينا نسري .. تشاورنا .. وقلنا .. نكمل التكيه فالكورنيش . لين صلاة الفجر .. وبعدها .. نروح لـ اقرب مطعم او بوفيـه .. نفطر فيه .. وبعدين كلٍ يروح لهله ..
المهم .. اذن المؤذن . واستعدينا لـ / الصلاه .. واقمت الصلاه انا يا محاكيكم .. في نفس مكانا فالكورنيش وتقدم .. (س) .. يصلي بنا اللـه يجزاه .. خير ..
((كل شروط الامامه .. متوفره لديه ))..

وكان اتجاه القبله .. بتجاه الطريق المحاذي للكورنيش ..
المهم كبر الامام وكبرنا وراه . وبداء بسورة الفاتحه .. ومن بعدها سورة الاخلاص .. ولما ركعنا الركعه الاولى .. ورفعنا من الركوع صار الموقف ..
اللي ما طراء على قلب بشرٌ منا

البدايه كان صوت بريك(فرامل ) ومن ثم صوت اطلاق نار مع رفوعنا من الركوع .. و الصوت قريب جداً ولا وقفنا زين من الركوع الا واللي يطلقون النار امامنا ..
ومتجهين يمنا .. وهي وحده مداهمه امنيه .. مداهمه سياره .. فيها ثلاثة شباب .. كلنا شفنا اللي صار .. انتبهنا له .. واولنا إمامنا .. الامام الله يجزاه خير ..
سجد على طول .. ولا كبر لـ / السجود الا وهو ساجد .. < --- ماينلام . بغى يروح فطور المداهمه .
وحنا بغينا نسبقه لـ السجود.. وفالسجود انا والله مدري وش قلت .. بس اذكر اني كنت ادعي واقول الله يجعله ( اقصد الامام ) ما يستعجل فالسجود ..
المهم لو بقول لكم .. لو طراء على قلبي قراء ة سورة البقره قريتها كامله فالسجده ذيك
وبعد ما كأن صوت اطلاق النار اختفى .. جلس من السجود امامنا .. واليا والله الاوضاع طيبه .. كملنا صلاتنا .. كلها .. في دقيقه . والعلم عند الله. ..

ولما سلمنا طالعنا في بعضنا .. والله يعفي عنا .. كلٍ انسدح ..من الضحك .. وشف عاد كلٍ وش يقول ..
الامام يقول .. انا ماجبت خبر .. لواني .. صملت .. ولاسجدت بسرعه يمكن يصبيكم الرصاص ويتيتمون عيالكم .. ويصير الذنب برقبتي
ماهوب هين الامام . عرف يصرفها . بس بعدها ماعاد تقدم يصلي بنا كل ما قلنا تقدم يا فلان عيا
المهم كنا متفقين .. نفطر بعد الصلاه .. اللي حصل انا تفرقنا ولا افطرنا سواء .. ذاك اليوم ..
والله لايعيده من موقف ..
عاد مدري وش اسمي هالموقف .. بس الاكيد اني لا ذكرته ضحكت ..

الله الله

وسلام عليكم ..