منتديات المرقاب الأدبية - عرض مشاركة واحدة

#1 05-08-2009, 10:59 AM

السلام عليكم ورحمة الله وبركاته

اسعد الله اوقاتكم بكل خير

قصيدة من قصائد الشاعر والناقد تركي بن ماطر الغنامي

اتمنى ان تروق لكم .

[poem=font="Simplified Arabic,5,darkblue,bold,italic" bkcolor="transparent" bkimage="" border="none,4,gray" type=1 line=0 align=center use=ex num="0,black""]

اخذ عن عقلي زمام الشعر يا وجداني=لا تصير عن الحدث في منطقه معزوله

عقب شيٍ شفت جا عندي كلام ثاني=اقطع قياد المقيد واطلق المعقوله

ثر على حكم العقل والمنطق اليوناني=اقنعه وان ما اقتنع غيَر نظام الدوله

دكتاتورٍ طاغيه معه رسني وعناني=جسّد ستالين لي باشنابه المفتوله

حاصر شعوري ووسع دايرة حرماني=اترك الي يطلبه غيري ويدي تطوله

لاتطيع العقل عقلي هو عقال لساني=ممتل صدري كلام ما قدرت اقوله

جف شعري واللغه وشعوري الانساني=يوم طعت العقل في قوله وفي منقوله

الفرات من الظما لو اشربه ما ارواني=لي سنين اصدر يدي عن رغبتي مغسوله

كن في صدري صدى مستفزع ينخاني=ودي اجيب نخَـواه وقدرتي مشلوله

شعري اللي ما يترجم رغبتي واشجاني=علموني بس ابا افهم هالشعر وشهوله

سامح الله واحد في هالكلام اغراني=عاث في صدري برغم ابوابه المقفوله

ابتدع له مدخل في مدخل شيطاني=واكتشف فالنفس اماكن و اوديه مجهوله

لا طلب رايي ولا استاذن ولا استفتاني=بات فاللاوعي لين اصبح واخذ له جوله

فجر اشياً فيَ كانت للأسف تخفاني=تنتظر عشرين عام اسلاكها موصوله

ما كشفها الشيخ عقل وبحثي الميداني=رغم تمحيصه و رغم جهودي المبذوله

نسخه مع اصدق دعاي لمحسن الهزاني=ما يحوس الرجل مثل الكلمه المعسوله

واسأل اللي جا وشغلني ولا طفاني=صرت اذاعات وحواسب واجهزه محموله

سور هرجه زخرفه والفرش زل ايراني=وين ما ادير الشعور اشوف شي ٍهوله

جر سكينه على حلقي ولا ذكَاني=في تراكيب الكلام ولفظه ومدلوله

واحتوتني دوحة ابداع ثمرها داني=رحلة استمتاع في عرض الكلام وطوله

عالم أخر من متع دنيا الحطام الفاني=وان تغير وجه تاريخي هي المسؤوله

عطر روحي يطرب بليا نغم واغاني=ما يقدر لا بالاوقيه ولا بالتوله

ما خرج عن شرط عبدالقاهر الجرجاني=طول عمر الشيخ في كتبه يدندن حوله

زلزل ارضية شعوري لين هد اركاني=وصرت انا والشعر تحت سيوفه المسلوله

اتصال شعور عبر الهاتف المجاني=لي شهر وخطوط قلبي كلها مشغوله

يعربي فتح جروحي ولا داواني=تحت مبدا موضة الحرية المكفوله

لابسٍ ثوب و وقار العالم الرباني=كل جرح يبرره بالحجه المقبوله

اسئله على طريقة شيخنا الالباتي=خطوتين توصله للغايه المأموله

ايه انا المجني عليه اللي دواه الجاني=جيت كوم الغاز وامست كلها محلوله

مير يا شعر الخيال السامي الروحاني=اطرب نفوس على فهم الشعر مجبوله

يوم بعض الخلق الا يالله لا تبلاني=من جلافتها سلوك اذواقها مفصوله

خل من يسمعك يذكرني ولا ينساني=الغزل والشعر حنا اللي نعرف اصوله

صغت ابن زيدون في نونيِة القحطاني=اخْيله وابداع في خفة لغه وسهوله

تطرب الصوفي وتشبع رغبة العلماني=وهي على منهاج سنَي حنبلي منخوله

المحب المرهف اللي فالحياه يعاني=اعتقد يكفيه من ترياقها كبسوله[/poem]لكم فائق احترامي وتقديري ....!!