....
يالله يامبري من أيوب الأوجاع = يافارج ليعقوب عقب إنتظاري
ياموعد الجنه لمن خافك وطاع = والعاصي أوعدته عذاب(ن) وناري
ياواسع الرحمه وياسامع الداع = يامن بغيب الغد والامس داري
جيتك بقلب(ن) ماتهنى بمهجاع = مع الندم والخوف والضيق ساري
متوسد(ن) كفه على كوع وإذراع = يشكي عليك الي على الحال جاري
من سطوتك ياوالي الأقدار مرتاع = ومن خشيتك عينه تهل العباري
محمل إذنوب(ن) من أشكال وأنواع = ياما جناها بين سر وجهاري
غرره فيها إبليس وأبيلس خداع = يتوه الغافل بضوح النهاري
يارب منها تبت وأعلنت الأقلاع = ولاعاد لرجعه عليها طواري
ماأيست من رحمتك يامحيي القاع = مؤمن بقولك وبصحيح البخاري
إغفر لتفريطي وماراح لي وضاع = وأمحى الذنوب صغارها والكباري
عفوك قبل لاياخذ الروح نزاع = وعفوك إلا صفيت بالحشر عاري
جمل حصادي لاحصد كل زراع = مع اليمين ولا مع أهل اليساري
مايربح ألي لشهوة النفس تباع = ترميه في جوف الهلك والدماري
لو عاش بأنعام وملذات وأمتاع = وقصور وأموال وعبيد وجواري
مصيرها مثل الدهر عقب مرباع = يجدب خضار إغصونا والغداري
الي ربح من إشترى الأخره وباع = دنياء الفلس لاسامها كل شاري
يالله ثبتني على دروب الأسناع = وجنبني إدروب الخزي والمزاري
وإغفر ذنوبي كل أبوها بالأجماع = ياخالق الدنياء وياخير باري
[/poem]