خذا المسمار بجداره وخلانا بليا اجدار = ورضينا بما حصل لجدارنا ونقوم باعماره
وغايتنا ورا هذي العمارة ربح واستثمار = عسانا نطرد الفقر المهين ونكتفي ناره
وسلمنا مفاتيح العمارة في يد السمسار = لعل الخير في يده ومن ناتج تسمساره
وأجرنا الشقق والكل يفهم عقد الاستئجار = وجا مستاجر النكبة بعفشة في غرف داره
وعلى راي المثل: يقول بد الجار قبل الدار = وباول شهر والجيران كل عازم جاره
قضى العقد ، وبغينا حقوقنا لكن بدت الاعذار = وبدا المستاجر يهلس علينا بكثرة اعذاره
بعضهم اغلق الشقة عليه وما دفع الايجار = بحجة إنه القى القبض في الشقة على فاره
وغيره قال انا غلبان واشكي من غلا الاسعار = وكيف ادفع الايجار وتعرفون السوق واسعاره
،، رحمته ،، قلت له اطلع ولا تدفع ولا دينار = ،،، فلا غادر من الشقة ولا هو يدفع ايجاره
احسب انه فقير اثره من اهل المال والتجار = يغذي سوق الاسهم ويتلاعب به وتجاره
ليا منه بغى سوق السهم ينهار قال انهار = وهو يضحك ويتبختر وخلق الله منهاره
مع هذا رفض يدفع الايجار وقام باسهتار = يماطل بي وكنه ضامن الوقت واقداره
يئست وقلت با ابيع العمار ة واقصر المشوار = وقررت اشتري (فصفص) على الشاطي (وسناره)
وبعناها بربع السعر الاول (والزبون البار) = (جحا) اللي بذنا يوم اشتريناها بمسماره

محمد بن نغموش