منتديات المرقاب الأدبية - عرض مشاركة واحدة

29-10-2009, 04:24 AM

قبل اربع سنوات كنت انا ومطلق الجبعاء وسلطان حنيف ( اخو زميلنا عبدالله ) جالسين في بيتنا
المهم كان عندنا واحد يسولف عن التجاره وعن ان الراجحي بادي من الصفر وفلان وفلان كلهم تاجروا وعاد علمنا ان فيه مزارع تشتري محصولها كامل بسعر بسيط ويباع في السوق بمكاسب مغريه المهم سرى من عندنا وبقينا يالثلاثه نسولف المهم كل واحد راح يفكر كيف وضعه بعد مايصير تاجر وجينا نبي نرقد وعيى يجينا النوم المهم صلينا الفجر وحنا عاقدين العزم انا نروح نصير تجار ههه
تواعدنا اذا قمنا من النوم نمشي ماندري وين بس نمشي وكل واحد يجيب اللي عنده من فلوس المهم قمنا العصر وتواجهنا وخوينا سلطان صار عنده شغل ولا راح معنا ( من حظه ) عاد مشينا العصر نبي مزارع ساجر واكلم خالي عند البل قلت صلح العشاء وحنا جايينك << برستيج تجار هه
وجينا خالي عند اباعره يم شقرا ولقينا الناس متجمعين عنده وتعشينا ويوم سروا الناس قال امرحوا قلنا حنا ريجيل ورانا مراجل ودورة عيشه ماهيب لحية امرحوا ههههه << ليتنا امرحنا
ونسري من عنده ونجي في ساجر ونمرح في فندق بـ 300 ريال ويوم جت الساعه ست وحنا صاحين طبعاً نسمع بسالفة النوم يقطع الرزق هههه وحنا نروح لبوفية الظاهر ونلقى زحمة قلنا اكيد كلهم يبون يتاجرون هههه ونفطر ونطلع ندور مزارع وكل مانشدنا واحد قال خمسين كيلو هنا << يشرون بيدينهم
وموترنا فورد المهم نطلع مع خط زراعي واخذنا شوي وهو ينقطع في وسط ديرة مهجوره ونطيح في تغريزه وينشب موترنا وانا انزل بدف الموتر واجي من عند خشم الموتر وانا اقوم ادف واعاين في مطلق لين وجهه يوم تغير ويعاين على يساري وانا التفت لينه ورع عمره سبع سنوات بالهجري وبالميلادي ست سنوات ونص >> توه درى ان فيها فرق ويبي يفتل عضلاته ههه
وانا اعاين لينه ورع اشهب ووجهه فيه هموم الدنيا كلها وانا اقوم اسمي اسمي وعيا يروح ههه
قلت هذا جني من ذوي الاحتياجات الخاصه ويجينا قال والله ليموت الغدا قلت رح تفاهم مع هذاك لاتهرجني ويروح لمطلق ويقومون يتحالفون هو ومطلق وانا ميت من الضحك ومن الراعه المهم طلعنا موترنا وعلمنا وين المزارع وتوجهنا يمهم ونجي لهاك المزرعه ونقلط عند راعيها قلنا وش زرعتوا السنه هذي قال زرعنا بصل قلت لا لا صدز وش زرعتوا قال بصل يابن الحلال ومطلق يقعد يضحك قال يحسبنا حضر هههه وانا ومطلق مادرينا ان البصل يزرع ههههه
وننشده كم عنده ويعلمنا قلنا نبى الشي الفلاني قال ابد قيمته كذا ، قلنا تم متى يجينا في الرياض قال على شان يكون جاهز 5 ايام وكلموني وحولوا لي الباقي ويجيكم هناك قلنا طيب ودفعنا العربون مبلغ بسيط واخذنا رقم الرجال ومشينا
ويوم وصلنا الرياض طلع مطلق ماخزن الرقم هههههه ( حسبي الله عليه ) ومكان الرجال بعيد ومشوارنا اغلى من العربون ثلاث مرات ههههه

بعده جلسنا في في مكانا الاول وجانا خوينا قال الراجحي والفلاني والفلاني قلنا اطلع برا اجل الراجحي كان حمال وصار كذا ايه هين