شحب وجه الفضاء اللي طاح من صدره ثلاث نجوم
ولا أدري كم بقى واللي بقى لا يآمن الطيحه
شكينا للمجرّه عقب ما جاء بالعلوم علوم
وجريّنا خطاياها بتهليله وتسبيحه
أنا وشلون أجامل وأتحمّل محدثات اللوم
ولي قلب ٍ ليا صارح ما جنّب عن تصاريحه
أبينّها ولا عندي على الممنوع حبّ خشوم
ولو كثروا وزادوا ناطحين الصيحه بصيحه !
حشى وأبداً ما أقول أنّي عن أسباب الخطاء معصوم
أقول أن الخطاء يآجب على العقـّال تصحيحه
ألا يا ضلعنا الشاهق ضروف الامس غير اليوم
لو أنكّ راسي ٍ واللي يزيحك ربيّ يزيحه
تحت ظلّك تطبّ طيور ومن فوقك طيور تحوم
ولا نعرف جواريح التطوّر من مجاريحه
لمسني ما لمسك ولا لنا إلاّ حظنا المقسوم
عسى ربي يسامح من يشككّ فيّ ويبيحه
تعيش الناس من نوعين أحد معطى وأحد محروم
وكم ناس ٍ على الدبكه .. وكم ناس ٍ على الريحه
لكنّي لا قفلت الباب من دونك وأنا مهموم
لا تنشدني عن الباب وعن القفل ومفاتيحه
للدكتور / سداح
|