يا كثر ما شال صدري و احتوى من علوم !
حاولت بـ ( أقولها ) و ازريت لا أقولها

حسب : التقاليد فـ ( الدنيا ) وحسب السلوم
اللي بقى من علاقاتي على اصولها

في غيرها .. ما اتلفت لو تطيح و تقوم
سكرت بيبانها و ابطلت مفعولها

صداقة اللي عزومه ما تسمى عزوم
قطّعت يدينها .. وانكسرت رجولها

ان جيت سوق الهزيله ما اتدخل واسوم
اترك صغار العقول .. تدوخ في عقولها

نظرة عيوني ليا عاينت .. يم النجوم
بعد النظر .. ميزة عيوني و مدلولها