.
.
ياللي تمناني بعد مانسيتك
في ذمّتي ماعاد تطري على البال
العـام جافيني وياما نهيتك
واليوم ياغدار راجع بموّال !
نعم؟..علامك جايني مادعيتك
وقّف مكانك..صعبه اليـوم تحتال
تبغاني آقول إرجع البيت بيتـك!!
لا والذي يخلـق ويفني للاْجيـال
المسأله ماهيب خذني وجيتـك
لاتحسـب إن السالفـه لعبـة إعيـال
ولن كان مستغرب لأني سليتك
آقول عـادي هاكـذا طبـع الابطـال
قلبي كبير ولو جزع مارجيتك
مهما حصـل ماينكسـر قلـب رجّـال
صحيح وقتٍ فات! كلّي هويتك
وفي خافقي كان إلك ممسـى ومقيـال
ومن صافي إحساسي وحُبي سقيتك
مخلص ولا اْسمع فيك حاسد وعَذال
لكن خسارة حُبي اللي عطيتـك
وياللأسـف قابلـت حُبـي بالاهمـال
خاين وبايعنـي بعـد ماشريتـك
اوهمتنـي بالحـب كـاذب ودجّـال
ويوم إنكشفت وبان قصدك رميتك
رمي الحجر من قمّة الشامخ العـال
مادام هاذا منهَجَك! مابغيتك
منهـج ضعافـة نفـس وإسلـوب جهّـال
وإعرف ترى لو في طريقي لقيتك
لقول لـك قـول ٍ يخلّيـك تهتـال:
ياْللْه, اِهناك,اِبعد..تراني نسيتك
وفي ذمّتي ماينكسـر قلـب رجّـال
.
.
|