معربة الجدين

نص [ سطام بن بتلاء ] :

للترقب عيون وللأصايل صهيل ..
والأصايل تبي ترضي طموحاتها ..


مهرتي ماهرة والمحتفل عرض خيل ..
وجات للمحتفل تظهر مهاراتها ..


عن طوال الحواجز لا عدت ما تميل ..
ودها تلمس الغيمة بقفزاتها ..


تعبر السبل لو ماني بعابر سبيل ..
كنها بكل خطوة تزرع أبياتها ..


بذرها الموهبة وأفكاري البكر سيل ..
يسقي جذورها وتطيب خيراتها ..


أحترم بالتنافس كل فارس زميل ..
جاء لـِ بوظبي وأجتاز اختباراتها ..


وأحترم قبل هذا كل شاعر جميل ..
ما تأهل وشارك ضمن جولاتها ..


في سما الشعر تلقى الجدي تلقى سهيل ..
وبه مجرات ماهي من مجراتها ..


أقحمت نفسها ونشوف في كل ليل ..
نورها المصطنع ونشوف سقطاتها ..


ليه ؟ لأن الصحافة ما عليها وكيل ..
كيف ..! سر الصحافة في علاقاتها ..


حبرهم سم له في كل صفحة قتيل ..
أسلبوه أرضه وباعوا مساحاتها ..


ما سِلم من غياب الذمة إلا القليل ..
ومع ضجيج الحناجر ضاعت أصواتها ..


الشعر ضاع بالظلمه بشور الدليل ..
وضاعت أركاب ناسه وإتجاهاتها ..


وطول يدور ويحسب إن دربه طويل ..
مير مالله هدى رجله لمنجاتها ..


خوفه من الهلاك ورغبته بالرحيل ..
أتعبت نفسه وزادت معاناتها ..


وأشرقت شمس حق وسوت المستحيل ..
وانتهت رحلة التيه ومتاهاتها ..


من هنا للتجارب مزج من كل جيل ..
وأمة الضاد شاهدنا حضاراتها ..


يبدأ بـِ خطوة المشوار إلى الألف ميل ..
ومن هنا الخطوة تعادل مسافاتها ..


احتوى النقلة الفكرية اسماً كفيل ..
دون لا يجتهد يحصد نجاحاتها ..


كيف إذا كان تشريفه ومده جزيل ..
ولا ثنى عزم نفسه واجتهاداتها ..


ابن زايد وأخو القايد ولا له مثيل ..
غير في نسج الأحلام وخيالاتها ..


مهرتي كان بتسوين فيني جميل ..
أسعدي نفس خيالك ورغباتها ..




سطام بن بتلاء