صديقي القارئ مساء الخير
لاشفت لك قارئ معك قل له
الشعر مايحتاج للتفسير
ان كان مانت بفاهمه خله

نفس البنادم قبل تحديد المصير
مثل الفراشه بالورود مخيّره

تشمّ ريح النرجس وريح العبير
وتاخذ رحيق من الزهر وتغيّره

وانا حلا الدنيا على كبدي مرير
ونفسي من هموم الحياه مذيّره

بخير لكن هاجسي ماهو بخير
لاجتني افكار القصيد مسيّره



صغير وابغى اوصي اخوي الكبير
اللي هقاويّه مهيب صغيّره

رجال وسنافي وواحد من مطير
وعلى العلا رجله مهيب قصيّره

ياصاحبي حثّ القدم على المسير
مسيّر وكلّ العباد مسيّره

هقوة بلادك في مساراتك تسير
افطن لهقوات العقول النيّره

العلم نور الكون والجاهل ضرير
عصاته ظنون ٍ تسوق بعيّره

قناعته مع فكره اللي به تحير
من فكر غيره بالعيار معيّره

ولا انت فكرك موج يالبحر الغزير
ولك ربع باللازم شيوك مجيّره

لاينثني عزمك بكلمة مايصير
دوّر على اللي مايصير وصيّره

المغترب لو ينعطى جنحان طير
متن الهبايب للبلاد يطيّره

والرجل مايندم على شور الشوير
لين الليال السود تلعن خيّره