حيل الله أقوى والقدر مكتوب والحزن الدفيـن
ينمو مـع صـدوف الحيـاة أيامهـا وليالهـا
مرت ليالينا سنة معها سنـة وأربـع سنيـن
وأنا أتذكر موت أبـوي وحالتـي يرثـا لهـا
اشتاق له واحتاج له في كل وقت وكـل حيـن
وعيني على طيفه تـذوب وتستعيـد إرسالهـا
وفي نفس تاريخ الوداع اللي برانـي بالحنيـن
فارقت من كانت ضيـا للكـون عنـد عيالهـا
أمي وفرحت دنيّتـي والحـب والـدر الثميـن
وأغلى الكنوز النادرة فـي هرجهـا وأفعالهـا
جاني خبرها قبل ازاورهـا وجريـت الونيـن
من لوعتي والفاجعـة صكـت علـي إقفالهـا
أزريت أقدم خطوتي وأزريت أشوف الحاضرين
وانتك صدري وامتلأ بأحـزان قلبـي شالهـا
أغيب واصحي وانتبه وافرك جبينـي باليديـن
واصد بعيـونٍ تفيـض الدمـع مـن مكيالهـا
ما غير امثل قوتي يـذاك لـي جنـب متيـن
واضغط على روحي وروحي يعلـم الله حالهـا
قمت أتصبر واحتسب والله يعيـن الصابريـن
بأحكام ربي قد رضـوا فـي دقهـا وإجلالهـا
وكل تعجل بالجنازة حسـب شـرع المسلميـن
غسل وصلاه ودفـن والدنيـا علـى موالهـا
قبلتها عقب الحنوط وقلـت يـا ربـي تعيـن
عسى البياض اللي غشاها من بياض أعمالهـا
وصلوا عليها واقبروها واحتوى قلبـي يقيـن
بان القلوب الصابرة تنبـض بحسـن أفوالهـا
وقفت اعزي إخوانها واصد لا أشوف الثنيـن
اللي جمعنـا عطفهـا فـي اقفايهـا واقبالهـا
في يوم جمعة والسهر رافق عيون الصايميـن
توافقت في دموعها رغـم اختـلاف أشكالهـا
وعقب انتهى وقت العزا ما عاد لي عذر سمين
يوم الهجوس الشاردة عـادت علـى مدهالهـا
غذيّتها مـن خاطـري واسقيتهـا دم الوتيـن
لين أكبرت واستبرمت واركت علـيّ أحمالهـا
ما بي دموع العاطفة تنساق لي من كل عيـن
اليا انتحت بي ذكريات أمـي وقمـت ابرالهـا
ما والله اطلب غير دعوه من قلوب المؤمنيـن
عسى جنـان الخلـد مثواهـا بعـد ترحالهـا
وعسى المزون ليا اردفت والرعد جاي ٍله دنين
على عفيف ثعولهـا تسبـق بـروق خيالهـا
اسبوع ماكف المطـر مابيـن ودان وغشيـن
لين النفـوس الضايقـه تدلـه معـه بآمالهـا
يا عنك ما به كارثة تشبـه فـراق الوالديـن
اقولها مـن تجربـة يضفـي علـي اظلالهـا
والأمر لله والبشـر فـي حكـم رب العالميـن
في علم غيبه قـد قضـى بأرزاقهـا وآجالهـا
الله يرحم والديك الكرام ويكسنهما جنان النعيم
والله يسامحك .. اقسم بالله انها موجعه موجعه موجعه
رثاء فريد في كل شي وطرح ما يتقنه الا الشاعر الحقيقي
يا نواف نايف صح لسانك بس ،
..
|