مخايل

[poem=font="Simplified Arabic,5,green,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
طـاري وجـاري والعـلوم عـلوم = والـدرب واحـد والهـدف قـدّام
ما يكسب الطاله ضعيف عزوم = ما يكسب الطاله سـوى مقدام
والناس ذا مْعـطى وذا محـروم = مهما أجتهد راعي العزوم ورام
والله ما ياخـذ سوى المقسـوم = اللي قسـم له ربّ حام وسـام
آمنت بـك ياحـيّ يا قيـّوم = ياربّ ثبـتـنـي على الإسـلام
ماني عن دروب الخـطا معصوم = ياكم ذنـوبً فـدتها وآثام
والنفـس لوّامه ويكـفي لـوم = وأنا هنـا المليـوم واللـوّام
ياما رقـيت النـايف المـزموم = وياما سـريت من اليمن للشـام
مدري غلبـت الفرس والاّ الروم = والاّ غلـبت الفنـس والأقـزام
بس الوكـاد إني فـرقت السوم = وريـّحت من بعـدي مية سوّام
واليوم ياغبـني عليّ اليوم = اللي جمعـته بثــته الأيـام
بين أمس ياراسي وصح النوم = قضــّيت ليـلي والعبـاد نيـام
ما خفت لايسري بي الجاثوم = الخوف قام وطاح طاح وقام
آقـوم والاّ آنـوم والاّ آقـوم = الحـزن واقع والسـرور أحلام !
مرحوم يا حلـم الشقي مرحوم = بعدك تـرى أحلام الحياه أيتام
أسمع وأشوف وماني بملـزوم = أسمع وأشوف وكلبـوها أوهام
هناك حرب أسما وحرب نجوم = وهـنا رصاص وقـنبله وألغـام
صكـات وأحداث الزمن بالكـوم = ويروح كـوم ويقتفيـه أكـوام
الضيـف يقلــط والعـدو ملطـوم = والكـفو له صدقان وإله أخصام
عنـده حـروفً ظاهــره ورقـوم = ماضاع بين أحرف وبين أرقام
واللي يقـول إن الأمل معدوم = صدّر على دنيـاه حكم إعـدام
وجهة نظـر هي والحقيقه توم = وقبـولها ماهو عليـه إلـزام
أن قلتها لعتبــان والاّ بقـوم = لابــد تاصـل لقــْحطـان ويـام !
تركـض من الدمام للخرطوم = وتـزحف من الخرطوم للدمـام
تجـارب الرجـّال مشـي وعوم = ماهي تجـارب راعي ولحـّام
عمـْره ودمـْره وأوديـه ورجوم = وكهوف وقصور وخلا وخيام
وروحه وجيـّه وإختـلاف قسوم = ماهي بكبْر أسما وكبْر أجسام
ياكـم بخيـلً يامـر ومخـدوم = وياكـم كـريمً ما معـه خــدّام
وياكـم فقيـرً في اللقا شغموم = وياكـم غنــيً مايشـد حـزام
وياكـم منـادين لصـلاه وصـوم = وهم لا مصلـّينً ولا بصيـام
وكم منتصر شفنا وكم مهزوم = وكم منصحً نسمع وكم نمـّام
وكم دالهً سالي وكم مهموم = وكم يضحـك حجاج وتـعَضّ إبهام
وكم داخلك يالسجن من مظلوم = رفيع راس وداسـته الأقـدام
وكم حايمً لو هـو يجيد الحوم = وقــّع على راسه بعـد ما حـام
دوله وحكـم وحـاكم ومحكـوم = وكم مات محكـومين يا حكـّام
هذي الحيـاه أحيان حبّ خشوم = وأحيان لا والله كسـر عظـام
مع إن تالي وقـتنا مضيـوم = والوقـت مهما صار ما ينـلاّم
أوامـرً بكتــابة ً ورســــوم = ولا لهــا كاتب ولا رســــّام !
جات العجـايب ما عليها هـدوم = ويكفي عن التفصيل روس أقلام
العود يَـرْبَـع والولد مسمـوم = والبنـت مدري والعجـوز وحـام !
جيل الشيوخ اللي بدون ختوم = ساق الشيوخ اللي تشلّ أختـام
والقصـد والغايه حـلال القوم = لكن حـلال القـوم راح أقسام !
هذا الصحيح وفي العلوم علوم = والعـلم شاره والسـلام ختـام [/poem]

ناصرالأحمري

المرأة تبقى. مرأة
ومن تقول انها لا تحتاج إلى رجل في حياتها.
فهي. كاذبه.
أو لم تكتشف هذي الحقيقه إلى الان. ?.