شعري سلامة خاطرك والاحاسيـس
وشفيك طالت غفوتك صار كم يـوم
قم لاعدمتك عـوذ بالله مـن ابليـس
فيض المشاعر ماصحى بك من النوم؟
نزفي أردّه عـن بيـاض القراطيـس
ممزوج بين الشوك وازهار يشمـوم
خلطة مشاعر دون فـرز ومقاييـس
لو تندفق في صفحتي صارت عْلـوم
عطني بولّع مـن جديـدك فوانيـس
وابدع جديد القاف والقصـد مفهـوم
عطني بفصّل فاخرالحـرف واقيـس
من خاطري ماهوب ملبوس واهـدوم
لاجتني العطلـه تثيـر الهواجيـس
ويثور حزنٍ بيـن الاضـلاع مـردوم
ماعاد أبي شيلـه ولابـي مراويـس
ودي بجـوٍّ بيـن وديـان وارجـوم
بعيد عن بعض العرب والجواسيـس
واكتب على ماجاز لي وابعد الحـوم
واجـر مـوالٍ يثيـر الاحاسـيـس
تصحى عليه الصم والبكـم وتقـوم
شاعرة نجد
عز الله انك ثرتي الاحاسيس في هذه الفاتنه
ابداع ولا غرابه من شاعره تعودنا منها على الابداع
تحياتي
|