يامعجبه درب السوالف متاهـات
اما خديني عشـق والا اتركينـي

عطتني الايام من صمت الامـوات
وحبست بين ضلوع صدري حنيني

لمي شتاتي بين اياديـك بسكـات
وليـا تناثرتـي تلمـك يديـنـي

توغلي بيـن المشاعـر والابيـات
وعن نسمة تجرح حشاي احتويني

خليني اوادع خـوي المسافـات
اللـي يودينـي علـى مايبيـنـي

وخليني ابا احيي عمر فايتن فـات
واصافح ايامـن بقـت تحترينـي

رش المواصل يحيي دهور الاوقات
والهجر تذبل منه خضـر السنينـي

تعالي لصـدر تواسيـه الأهـات
أخذ من يدين الزمـن حاجتينـي

اخذ ونيس الذات من غربة الذات
واخذ نديم الجـرح بينـي وبينـي


استمطري نو من الوجـد مابـات
شوقه بحر مسحوب والاهجينـي

واقول مافكرت في كـل شمـات
ريحانتـي نمـت علـى راحتينـي