السلام عليكم ورحمه الله وبركاته
اقدم لكم قصيده متواضعه اتمنى ان تحوز على رضاكم
ولكم فائق الاحترام والتقدير,,,
ياهاجسي صدري عوى فيه ذيبه
من قو صوته هزّ قلبي وتله
والجرح دامي وانت تعرف طبيبه
والعلم الاول ما جهلناه للـه
وياللي تشيل العلم ودّه وجيبه
للي يبا هرج النواميس قله
الصدق نور ٍ للبشر تقتدي به
مثل القمر بين النجوم المطله
منجاه واهل المَعَرفه تهتدي به
هرج ٍ صحيح ولا يجي فيه زله
والكذب داء ويندفن فيه عيبه
والقلب الاسود دايم ٍ مرتع له
مبداه شين وعلّته تنتهي به
حبله قصير وصاحبه تحت ظله
دنيا عجيبه والليالي صعيبه
وقت ٍ تغيّر صار بالوضع خله
ناس ٍ تحب الكذب واكبر مصيبه
سيف النميمه من غثاها تسله
وسط المجالس كذبها تبتدي به
من هرجها تجلب على النفس عله
زيف الحكي عند الاوادم تجيبه
طبع الردى بالذات لا ماتمله
تاكل لحوم الناس بهت ٍوغيبه
شله سقيمه ماتجيب الادله
عاداتهم ماهي عليهم غريبه
حبل الوصل بين القرايب تحله
شان الزمان وطاح كور النجيبه
ودرب المراجل كل عاقل يدله
بالله ياصحاب العقول اللبيبه
الصدق كيف الكذب ياخذ محله
محمد مرزوق السميري