بسم الله الرحمن الرحيم

السلام عليكم ورحمة الله وبركاته


إخواني أعضاء المنتدى ومتذوقين الشعر من خارج المنتدى ... المحترمين

للتواصل و المشاركه

أود أن أضع بين أيديكم هذه القصيده المتواضعه التي تحمل أكثر من معنى
والتي أرجو أن تحوز على رضاكم .. وكلن يفسرها على كيفه .



(( غــث الـزمـان ))




طاح الحيا والخير شفناه بالعيــــن ــــــ خيره على كل الخليج إمتــداده

وسم(ن) بكور ومرتجينه من سنين ــــــ راعي الدبش عقبه يربع فؤاده

يا ليت من عنده من الذود عشرين ــــــ عشرين تقنعني ولا أبغي زياده

سود(ن)عليها من حلاها عناويـــن ــــــ لا شافها النقّاد ضاع إنتقـــــاده

الله حماها من عيــون الشياطيــــن ــــــ من حازها حاز الهنا والسعاده

وبعيرها من فــوق كل البعاريــــن ــــــ كنّــه من الغربان ماخذ سواده

أبوه وأسراره من إبل الخياريــن ــــــ وأمه من الفصّام تحمل شهاده

راعيه في النخبه خذاله نياشيــن ـــــــ ســـاد المراجل وأستحق السياده

نرعى بها قفرن سواة البساتيـــن ـــــــ بستان فلاح(ن) على أول حصاده

وجيب(ن) من الساير عليه البراهيـن ــــــ من مصنع اليابان جاب إعتماده

أبيض ولونه لو تمعّنت لونيــــن ـــــــ إقماش هــير و زينوا به إقـــلاده

عليه من وصف القطا والشياهين ــــــ زودن على ممشاه عزم وركـاده

قمت أتمنى وأضرب الراي رايين ـــــــ وأثـر التمـني ما وراه إستفـــاده

يجيبها الله ناصر الحق والديـــن ـــــــ اللـي كفــل للعبد شـــربه و زاده

يجيبها ذا الحين وألا بعد حيــن ـــــ أرجـي من المعبود ما أرجي عباده

والوقت ذا وقت إختلا ل الموازيـن ـــــ وقتن على الطيّب سريع(ن)هجاده

لا صار ما يملك رصيد وملاييــــن ــــــ مقرود حـظ ولازمـــته القــــراده

لو إنه أطيب من زمان السلاطيــن ــــ وضعه مع العالم تشــوبه نكـــاده

ومن زاد ماله زان وقته وهو شين ــــ كـلـن يبـي قـربه وغـايـة مـراده

يـقـلط بماله في صـدور الدواويـن ــــ ويشـري مع العالم ويربح مزاده

وحنـا لنـا طبـع ومجـال وقوانيــن ــــــ ما حاشنا غـث الزمـان وفساده

رفيقنا الطيّب على العسر واللين ـــــ اللي مع أهل الطيب يقدح زناده

نتعـب على وصله لو إنّا بعيديـن ــــ ونشيــل حملـه لاتمايـل شـــداده

دستورنا حاضر ولا فيه بعديــن ـــــ وألا الـردي نـاره تعــوّد رمـاده

والرابح اللي يجمع الطيب والدين ـــــ أنا أشهد إنه يستحق الإشــاده

والله خلقنا مـن عدمـنا مـن الطيـن ـــــ وكلن يجي رزقه بحسب إجتهاده



وســلا مـتــــكـــم ....