راكان بن محمد بن بدن

ليت لي قلبٍ على الضيقه جسور
مير وين اللي من الدنيا ومن
لو سليت أيام وألا قل شهور
ماتعيّن شخص لأوضاعه ضمن
العمر مشوار ، والدنيا عبور
لو يقول الوقت : يا ابن آدم تمن
حطّها ربّي متاعاً للغرور
للقلوب اللي تعامن وانعمن
يلعن الله كل مختالٍ كفور
وكل منهو حب خضراء الدمن
ما اعتلا طيرٍ مراقيب الصخور
لو وصل في عالي القمّه طمن
الوعد لاجا الوعد يوم النشور
لابدا المحشّر وشبّت في اليمن
واحدٍ في نار لآهبها سعور
وواحدٍ في الخلد يبشر بـ الأمن