معدي المرقاااب
سلام والدنياء تعب والباس فالراس الكبير
ـــــــــــــ وان شفت ابن مسفرعطيته فالعلوم اخيارها
افرح ليا خاويت فالطرقه هل السيف الشطير
ــــــــــ ربع ن تميز فالعـلوم اطـوالها واقصـارها
محمد
يا مرحبا ترحيب فيه المسك الأصلى والعبير
....... تنساب مع فوح الــدلال اللي يخن بهـارها
خوة بعيدين الهقاوي تجبر العظم الكسيــر
....... الربعة اللي يا معدي ما تغيّر كــارها
معدي المرقاب
دام البقاء وافطن لعينك واسبح البحرالغزير
ـــــــــ ماكل سباح ن مع الغبه يخوض اغمارها
البحر هايج والمراكب جالها فوقه خرير
ـــــــــ وان طول الاعصار كل السفن جاب اخبارها
محمد
تبقى سفينة نوح لو ان الليالي تستدير
.......رمز الرساوة فالبحور اللي تهول اخطارها
لكن ليت اللي سرى يبدي على سودة عسير
.........حتى عليه القوم من حوله تمد انظارها
معدي المرقاااب
المعركه دارت رحاها وانفراء الجمع الغفير
ــــــــــــ واشوف بقعا من وراء الضلعه تسوق احمارها
مافيه شك ان اغلب العالم يحسبنه وزير
ــــــــــــ وانه ولي امر العباد اكبارها واصغارها
محمد
ام الكباير باركة والحمل في ظهر البعير
.........دوب استوى ليله وفارق ناقته وحوارها
العالم الثالث تناقش قمته سعر الشعير
.......واهل الصناعة فالفضاء العالي تبث اقمارها
معدي المرقاب
لاصارت الدعوى تنافس مع ضغاين وش يصير
ــــــــــــ يا شينها لاجت على الجره تشيل اوزارها
المشكله بين المدير المغتصب واول مدير
ــــــــــ وان طولت تباء تنوش العاملين بنارها
محمد
لا صارت الدعوى تنافس طار من يقدر يطير
........واللي بلا جنحان يحفظ قبعته وشعارها
ياللي تبون العير ما فيها مفر عن النفير
........لكن سوقوها لو ان الموت حول ازوارها
معدي المرقاب
حنا نباء راس الهدا يسوده الود الكثير
ــــــــــ ما بيه صحرا قاحله يومي بها معصارها
قش الصلب تومي به العجه على ظهور الحمير
ـــــــــــ واهل البيوت ام الكرم يلقى الكرم في دارها
محمد
من لا يغبر شاربه ما دسمه والمستــذير
........يحلم يزور اغنى الممالك وانقطع ما زارها
لو شايب الرحمن ساومني شدادي بالحصير
......... قلت الله اكبر يالقلوب اللي تبيح اسرارها
معدي المرقاااب
ما وصلت الدعوى التحدي خل سيفك فالجفير
ـــــــــــ كم من شوارب غبرت مادسمت بغبارها
لو الغليم يستحي ويقدر العقل البصير
ــــــــــــ مجابها لين ابركت فوق الصفاه ابزارها
محمد
لا شفت راس الحربة اللي جاك ضاوي يا ظهير
........اقنع بميلات الزمان ولا تدور غارها
حبل الوفا ممـدود لكن الفرزدق عن جرير
.........يفرق بحاجة والعرب ما تستطيع انكارها
|