|
عايض النفيعي
[poem=font="Simplified Arabic,5,green,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
يا سهيل عيّا يبرد المس يا سهيل = الارض رمضا والهبايب سمايم
لو ما بديت وشفتك امع آخر الليل = لا قول ما تظهر على نجد دايم
توقص أوقاص أنوار بيض القناديل = وتفصل فصول الوقت فصل التوايم
معك اعتدال الجو ما يقبل الميل = لو تطلع( الجوزا ) وزان ( النعايم )
مالك شبيه الاّ المبشر بالانجيل = وآدم ترى وضعه لوضعك ملايم
ولدت من رحم الليال المقابيل = وأسمك سبقك ولا تبا لك تمايم
أفرح وأغني والبشاير زعاجيل = برد عليّه يا نسيم النسايم
نور الجدي محرق كبود الدواليل = والجو مرّه صحو وأمرار غايم
وشلون أبا اراعيك يالنجم أبو ذيل ؟ = والقيض في وجهي مسوي علايم
سبعة شهور امقيم .. وأعبر من امحيل ! = ضيق قدم رجلي وساع الخرايم
قمت أدّرج مثل ادّراج المحاحيل = أزايم الدنيا وأهلها مزايم
أحط مع درب المحبين وآشيل = مالي على درب المحبين لايم
من حنت المقهور .. وأدباكت الخيل = لآخر ملاحا نايحات الحمايم
واقف على ساق وقدم في نحى السيل = وخارت قوايه يا قوي العزايم
ما عاد إلي حيله .. ولا عاد إلي حيل = مار أسمعوا يا ناقلين النمايم
الله يبيض وجه بيض المواصيل = والله يسوّد وجه سود الظلايم
ما عاقب العشاق غير العواذيل = هالحين والاّ فالسنين القدايم
يأم العيون أم الرموش المظاليل = لو قلت لك عاشق .. ومغرم .. وهايم ؟
ماني معك سالم من القال والقيل = امن النقيلي صرت راعي جرايم
اللي عليّ ايكيل ويزوّد الكيل = ما كنني مسلم مصلي وصايم !!
أخذي خبر موجز بليا تفاصيل = مما بدالي عن لعين الرسايم
مريض لو أنّه سليم التحاليل ! = وامعاق لو أنّه سليم القوايم !
لا تدخلينه .. والهوى ماله ادخيل = خلّيه يسهج بين بيض العمايم
يا نور عينيّه ويا شمعة الجيل = شومي وأنا عن ما يقولون شايم
أمّا أنشدي عنّي عيال الرياجيل = والاّ عيال العجز نافر ورايم
ترى الدعاوي كلبّوها تساهيل = لو ( ساهر ) يدبّل عليّ القسايم
اجتزت في حبك جميع العراقيل = وأنا على جنبي ، وقاعد ، وقايم
وأقفى شبابي في ردود المراسيل = أشطب قوايم .. وأتصفّح قوايم
اظروفنا تهْدر .. وأحاسيسنا حيل ! = والحب ما يصرف بدل ( أوفر تايم )
جرّي على منابت ارموشك الميل = وأجر صوتي جر وأصحى يا نايم [/poem]
|